DILONGESHA DIA 57
Wewe muenze mpekatu, tshiudi mua kuenza ntshinyi?
Nansha muudi munange Yehowa bikole ne udienzeja bikole bua kuepuka malu adi mua kumunyingalaja, kudi anu misangu iudi mua kutupakana. Tshidibi, imue mpekatu itu mibi mipite mikuabu. (1 Kolinto 6:9, 10) Wewe muenze mpekatu mutambe bubi, wavuluka ne: Yehowa ki mmulekele dikunanga to; mmusue kukubuikidila ne kukuambuluisha.
1. Tudi ne bua kuenza tshinyi bua Yehowa kutufuila luse?
Padi bantu badi banange Yehowa bajingulula ne: mbenze mpekatu mutambe bubi, badi banyingalala bikole menemene. Kadi Yehowa udi ubakolesha ku muoyo ne mêyi aa: “Nansha mudi mpekatu yenu mikunze kunzuu, neyivuijibue mitoke anu bu neje.” (Yeshaya 1:18) Tuetu banyingalale ne muoyo mujima, Yehowa neatubuikidile. Kadi mmunyi mutudi mua kunyingalala? Tudi tumvua bibi menemene bua tshitudi benze, tulekela kutshienza, ne tulomba Yehowa bua atufuile luse. Pashishe tudienzeja bua kulekela meji mabi anyi bikadilu bibi bivua bitufikishe ku dienza mpekatu, ne tuenza muetu muonso bua kutumikila mikenji miakane ya Yehowa.—Balayi Yeshaya 55:6, 7.
2. Mmushindu kayi udi Yehowa ukuata mudimu ne bakulu bua kutuambuluisha patudi tuenza mpekatu?
Patudi tuenza mpekatu munene, Yehowa udi utulomba bua ‘tubikile bakulu ba mu tshisumbu.’ (Balayi Yakobo 5:14, 15.) Bakulu aba mbanange Yehowa ne bantu badi bamuenzela mudimu. Mbabalongeshe mua kutuambuluisha bua tudie kabidi bulunda buimpe ne Yehowa.—Galatiya 6:1.
Mmunyi mudi bakulu batuambuluisha patudi tuenza mpekatu munene? Bakulu babidi anyi basatu nebatubele ne mukanda wa Nzambi bua tshilema tshitudi benze. Nebatupeshe kabidi mibelu ne nebatuleje tshia kuenza bua katuenji kabidi mpekatu to. Badi mua kutukandika bua katuenji imue midimu mu tshisumbu, too ne padi bulunda buetu ne Yehowa bulua kabidi bukole. Bua kukuba bena Kristo netu mu tshisumbu bua kababanyangi kudi muntu udi muenze mpekatu kadi kayi unyingalala, bakulu badi bipata muntu au mu tshisumbu.
BUELA MU BUONDOKE
Vudija dianyisha bua mudi Yehowa utuambuluisha patudi tuenza mpekatu munene.
3. Kutonda mpekatu kudi kuenza bua tuakaje bulunda ne Yehowa
Patudi tuenza mpekatu, tudi tunyingalaja Yehowa ; nanku tudi ne bua kumutondelayi. Balayi Misambu 32:1-5, pashishe nuandamune lukonko elu:
-
Bua tshinyi bidi ne mushinga bua tuetu kutondela Yehowa mpekatu yetu pamutu pa kushala bapuwe?
Tuetu bamane kutondela Yehowa mpekatu yetu, mbimpe tuyileje kabidi bakulu bua batuambuluishe. Dîba adi tudi tusulakana. Tangilayi FILME, pashishe nuandamune lukonko ludi lulonda.
-
Mu filme eu, mmunyi muvua bakulu bambuluishe Canon bua kupingana kudi Yehowa?
Mbimpe tuambile bakulu mpekatu yetu patoke ne muoyo mujima; badiku bua kutuambuluisha. Balayi Yakobo 5:16, pashishe nuandamune lukonko elu:
-
Bua tshinyi kuambila bakulu mpekatu yetu patoke kudi kubapepejila malu bua batuambuluishe bimpe?
Tonda mpekatu webe, ambila bakulu malu onso patoke, ne witabe diambuluisha didi Yehowa ukupesha ne dinanga
4. Mudi kuipata muntu mu tshisumbu kuikale ne mushinga
Muntu udi muenze mpekatu munene yeye mubenge bua kutumikila mikenji ya Yehowa, badi bamuipata mu tshisumbu. Dîba adi katuena kabidi mua kulamakana nende anyi kuyukila nende to. Balayi 1 Kolinto 5:6, 11 ne 2 Yone 9-11, pashishe nuandamune lukonko elu:
-
Anu mudi luevene lubandisha bukula busopa, mmunyi mudi kulamakana ne muenji wa mpekatu udi kayi munyingalale kunyanga tshisumbu?
Bantu ba bungi bavuabu bipate mu tshisumbu bakalua kupingana kudi Yehowa bualu nansha muvua dinyoka adi dibatonde, diodi ke diakabambuluisha bua kuakaja tshilema tshiabu. (Misambu 141:5) Tangilayi FILME, pashishe nuandamune lukonko ludi lulonda.
-
Mu filme eu, mmunyi muvua dipata Sonja mu tshisumbu dimuambuluishe?
Mmunyi mudi dipata muntu mu tshisumbu . . .
-
dipesha dîna dia Yehowa bunême?
-
dileja ne: Yehowa udi Nzambi wa dinanga udi kayi ne malu makole?
5. Yehowa udi utufuila luse patudi tunyingalala
Yezu wakafila tshilejilu tshidi tshituambuluisha bua kumona mudi Yehowa umvua padi muntu unyingalala bua mpekatu udiye muenze. Balayi Luka 15:1-7, pashishe nuandamune lukonko elu:
-
Bualu ebu budi bukulongesha tshinyi bua Yehowa?
Balayi Yehezekele 33:11, pashishe nuandamune lukonko elu:
-
Mmalu kayi atudi ne bua kuenza bua kuleja ne: tudi banyingalale?
Yehowa udi utabalela mikoko yende ne muoyo mujima anu mutu mulami wa mikoko wenza
BAMUE BATU BAMBA NE: “Ndi ntshina bua kuambila bakulu mpekatu wanyi, bualu badi mua kulua kungipata mu tshisumbu.”
-
Ntshinyi tshiudi mua kuambila muntu udi wamba nanku?
TSHIA KUKUATA
Tuetu benze mpekatu munene, banyingalale ne muoyo mujima, ne badisuike bua kubenga kuenza malu mabi, Yehowa neatufuile luse.
Diambulula
-
Bua tshinyi mbia mushinga bua tuetu kutondela Yehowa mpekatu yetu?
-
Bua Yehowa kutubuikidila mpekatu yetu, tudi ne bua kuenza tshinyi?
-
Tuetu benze mpekatu munene, bua tshinyi tudi ne bua kukeba diambuluisha kudi bakulu?
BIA KUTANGILA KABIDI
Mona muvua Yehowa mufuile muntu mukuabu luse anu mudibi bileja mu Yeshaya 1:18.
Padi Yehowa ukufuila luse, Ikala mushindike ne: mmukufuidilamu luse (5:02)
Bua tshinyi dipata muntu mu tshisumbu didi diambuluisha bantu bonso bavua mpekatu au mulenge?
“Bua tshinyi dipatshibua nndongoluelu wa dinanga?” (Tshibumba tshia Nsentedi, 15/4/2015)
Mona muudi mua kumvuija muntu udi kayi Ntemu bua tshinyi imue misangu batu bipata muntu mu tshisumbu.
“Bantemu ba Yehowa batu bepuka bantu bakadi balekele buntemu anyi?” (Tshiena-bualu tshia mu jw.org)
Bala tshitupa tshia “Ngakajinga bua kupingana kudi Yehowa,” umone bua tshinyi muntu uvua muye kule ne bulelela wakumvua ne: Yehowa uvua mumupingajamu.
“Bible utu ushintulula bantu” (Tshibumba tshia Nsentedi, 1/4/2012)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
