ESENUPANTOꞌ 57
Îꞌ koneka eꞌpai awanî imakuiꞌpî konekasaꞌya ya ipîra?
Jeová saꞌnamaya kureꞌne moropai ituꞌse aweꞌtoꞌ koneka yuꞌse awanî, tîîse imakuiꞌpî kupîya tiaron pensa. Tîîse, tiaron pensa imakuiꞌpî koneka uurînîkonya ipîra. (1 Coríntios 6:9, 10) Imakuiꞌpî ikonekasaꞌ amîrîya ya ipîra, enpanatakî kureꞌne asaꞌnamanen mîîkîrî Jeová. Jeová wanî imakuiꞌpî ankupîꞌpî kupî yuꞌse tîîwanmîra moropai amîrî anpîikaꞌtîpai awanî nîrî.
1. Îꞌ koneka eꞌpai uurînîkon wanî imakuiꞌpî kupîꞌpî uurînîkonya manni, mîrîrî kuꞌtoꞌpe Jeováya tîîwanmîra?
Jeová saꞌnamanen esewankonoꞌma ipîra, îꞌ pensa imakuiꞌpî konekasaiꞌya ya ipîra. Tîîse îꞌ taꞌpî Jeováya manni tîpemonkonoyamîꞌ pî, mîrîrîya uurînîkon yausinpa mararî pra: “Amîrînîkon nîkupîꞌpî imakuiꞌpî, mîrîrî wanî tanne suuyu kamisa panpe. Jeováya mîrîrî imakuiꞌpîkon kupî aimutun pe, tuna saꞌman panpe autî manni kaꞌ poi [taatoꞌ mîrîrî neve/snow], . . . [moropai] katoꞌka panpe.” (Isaías 1:18, TNM) Uurînîkon esewankonoꞌmasaꞌ ya ipîra, imakuiꞌpî unkupîꞌpîkon, mîrîrî kupî Jeováya tîîwanmîra. Oꞌnon yeꞌka pe mîrîrî yenpo uurînîkonya eꞌpainon? Imakuiꞌpî pî uurînîkon enpanata teesewankonoꞌmai, imakuiꞌpî kupî uurînîkonya rîn inîꞌrî moropai esaꞌtî uurînîkonya uyewankon ke mîrîrî kuꞌtoꞌpe Jeováya tîîwanmîra. Mîrîrî tîpo, uurînîkon esenumenkatoꞌkon moropai uyeserukon moꞌtanîpî uurînîkonya, imakuiꞌpî kupî uurînîkonya namai inîꞌrî. Moropai yairî uurînîkon koꞌmamî, Jeová maimu taasaꞌ manni yawîrî. — Eraꞌmakî Isaías 55:6, 7.
2. Imakuiꞌpî kuꞌsaꞌ uurînîkonya ya, oꞌnon yeꞌka pe Jeováya uurînîkon pîikaꞌtî soosi esanon wenai?
Anîꞌya kureꞌne imakuiꞌpî kuꞌsaꞌ ya, Jeováya taa ipî: “Soosi esanon yannoiya eꞌpai man.” (Eraꞌmakî Tiago 5:14, 15.) Jeová moropai ipemonkonoyamîꞌ saꞌnama soosi esanonya. Îꞌ epuꞌtî toꞌya manni Paapa Maimu yapai, mîrîrî yenkama toꞌya uurînîkon pîikaꞌtîkonpa, Jeová yonpa pe eꞌnîtoꞌpeꞌnîkon inîꞌrî. — Gálatas 6:1.
Oꞌnon yeꞌka pe soosi esanonya uurînîkon pîikaꞌtî, imakuiꞌpî kuꞌsaꞌ uurînîkonya ya ipîra? Asakîꞌnankon, tiaron pensa seurîwîꞌnankon soosi esanonya, Paapa Maimu yenkama yenpokonpa imakuiꞌpî pe unkupîꞌpîkon wanî epuꞌtoꞌpeꞌnîkon. Panamatoꞌkon tîrî toꞌya nîrî uurînîkon pia, imakuiꞌpî kupî uurînîkonya namai inîꞌrî. Tiaron pensa taa toꞌya uurînîkon esenyakaꞌma namai Emurukuntîntoꞌ Pataꞌseꞌ ta, meruntî ke Jeová yonpa pe uurînîkon ennaꞌpo pîkîrî inîꞌrî. Tîîse, mîîkîrî wanî ya ipîra imakuiꞌpî anrumakapai pra? Mîrîrî eꞌkupî yai, mîîkîrî yenpaꞌka soosi esanonya Paapa pemonkonoyamîꞌ koreꞌtapai, tiaronkon yakaꞌmaiya namai Emurukuntîntoꞌkon Pataꞌseꞌ ta.
ESENUPAKÎ INÎꞌ PANPÎꞌ
Eraꞌmakî oꞌnon yeꞌka pe Jeováya uurînîkon pîikaꞌtî eꞌpainon imakuiꞌpî ipîra kuꞌsaꞌ uurînîkonya ya.
3. Imakuiꞌpî kuꞌsaꞌ uurînîkonya ya, mîrîrî ekaremekî eꞌpai uurînîkon wanî
Imakuiꞌpî konekasaꞌ uurînîkonya ya, Jeová yewankonoꞌma uurînîkonya. Mîrîrî yeꞌnen, imakuiꞌpî ekaremekî eꞌpai uurînîkon wanî ipî. Eraꞌmakî Salmo 32:1-5. Tarîpai seeni itoꞌkoꞌ manni pî eseurîmatî:
-
Îꞌ waniꞌ awanî yeꞌnen morî pe wanî imakuiꞌpî unkupîꞌpîkon manni ekaremekî uurînîkonya Jeová pî moropai mîrîrî yenomî rîn?
Jeová pî ekaremekî tîpo, eꞌpîikaꞌtîntoꞌ saꞌkî soosi esanon pî. Mîrîrî kuꞌsaꞌya ya, morî pe amîrî ena. PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Seeni panton ya, oꞌnon yeꞌka pe soosi esanonya Canon pîikaꞌtîꞌpî awennaꞌpotoꞌpe inîꞌrî Jeová pia?
Yairon pe ekaremekî eꞌpai uurînîkon wanî soosi esanon pî. Moro toꞌ wanî uurînîkon pîikaꞌtîkonpa. Eraꞌmatî Tiago 5:16. Tarîpai seeni itoꞌkoꞌ manni pî eseurîmatî:
-
Îꞌ waniꞌ awanî yeꞌnen saꞌme pra wanî soosi esanon pia uurînîkon pîikaꞌtîtoꞌpe toꞌya, yairon pe uurînîkon ekaremeꞌsaꞌ ya toꞌ pî?
Imakuiꞌpî ankupîꞌpî ekaremekî Jeová pî, yairon pe ekaremekî soosi esanon pî moropai Jeová winîpai eꞌpîikaꞌtîntoꞌ yapiꞌkî
4. Imakuiꞌpî kuꞌnen yenpaꞌka eꞌpai wanî, mîrîrî wanî morî pe tamîꞌnawîronkon tonpe
Ipîra imakuiꞌpî kuꞌsaꞌ anîꞌya ya, moropai îꞌ wanî yairon ankonekapai pra awanîꞌ ya Jeová maimu yawîrî, Paapa pemonkonoyamîꞌ koreꞌta mîîkîrî koꞌmamî eserîke pra wanî. Mîîkîrî pemonkon yenpaꞌkasaꞌ eꞌpai wanî Paapa pemonkonoyamîꞌ koreꞌtapai, moropai uurînîkon eseurîma eserîke pra man mîîkîrî yarakkîrî. Eraꞌmatî 1 Coríntios 5:6, 11 moropai 2 João 9-11. Tarîpai seeni itoꞌkoꞌ manni pî eseurîmatî:
-
Mararon isaꞌmoto, tamîꞌnawîrî kîsereꞌna isaꞌmoiya. Oꞌnon yeꞌka pe imakuiꞌpî kuꞌnen yarakkîrî uurînîkon eseurîma ya, mîrîrîya tamîꞌnawîronkon emurukuntîntoꞌ tawonkon yakaꞌma eꞌpainon?
Tuꞌkankon epaꞌkaꞌsan, inkamoro ennaꞌpoꞌpî inîꞌrî Jeová pemonkonoyamiꞌ koreꞌta. Îꞌ waniꞌ awanî yeꞌnen mîrîrî eꞌkupîꞌpî? Saꞌme yenpaꞌkatoꞌ wanîꞌpî toꞌ pia, tîîse mîrîrîya toꞌ pîikaꞌtîꞌpî, îꞌ tînkupîꞌpîkon imakuiꞌpî pe wanî epuꞌtoꞌpe toꞌya, mîrîrî patapai morî kuꞌtoꞌpe toꞌya. (Salmo 141:5) PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:
-
Seeni panton ya, oꞌnon yeꞌka pe yenpaꞌkatoꞌya Sônia pîikaꞌtîꞌpî?
Oꞌnon yeꞌka pe yenpaꞌkatoꞌya . . .
-
uurînîkon pîikaꞌtî Jeová eseꞌ yapurîtoꞌpe?
-
uurînîkon yenupa, Jeová wanî yairon kuꞌnen pe moropai saꞌnamanen pe?
5. Îꞌ pensa imakuiꞌpî unkupîꞌpîkon rumaka uurînîkonya, tîîwanmîra ikupî Jeováya
Jesusya panton ekaremekîꞌpî uurînîkon pîikaꞌtîpa, epuꞌtoꞌpe uurînîkonya oꞌnon yeꞌka pe Jeová esepuꞌtî, pemonkonya imakuiꞌpî rumakasaꞌ ya. Eraꞌmatî Lucas 15:1-7. Tarîpai seeni itoꞌkoꞌ manni pî eseurîmatî:
-
Îꞌ pî seeni imenukasaꞌya uurînîkon yenupa Jeová pî?
Eraꞌmatî Ezequiel 33:11. Tarîpai seeni itoꞌkoꞌ manni pî eseurîmatî:
-
Îꞌ koneka eꞌpai uurînîkon wanî, yenpotoꞌpe imakuiꞌpî unkupîꞌpîkon manni, mîrîrî rumakaꞌpî uurînîkonya?
Carneiroyamîꞌ eraꞌmanen panpe, Jeováya tîpoitîrîtonon pîinama.
TIARONKONYA TAA: “Îꞌ kupîꞌpîuya manni, mîrîrî ekaremeꞌsauꞌya ya soosi esanon pî, uurî yenpaꞌka toꞌya.”
-
Îꞌ taaya eꞌpainon pemonkon pî, mîrîrî panpe mîîkîrî esenumenka ya?
Îꞌ PÎ ESENUPA PÎ NAN?
Imakuiꞌpî ipîra ikuꞌsaꞌ uurînîkonya ya, mîrîrî kupî Jeováya tîîwanmîra eꞌpainon. Mîrîrî eꞌkuꞌtoꞌpe, imakuiꞌpî rumaka eꞌpai uurînîkon wanî uyewankon ke moropai îꞌ wanî yairî ankonekapai eꞌpai uurînîkon wanî.
Enpanatapaiꞌnîkon
-
Îꞌ waniꞌ awanî yeꞌnen morî pe wanî ekaremeꞌtoꞌpe Jeová pî, imakuiꞌpî unkupîꞌpîkon pî?
-
Îꞌ koneka eꞌpai uurînîkon wanî imakuiꞌpî kupîꞌpî uurînîkonya manni, mîrîrî kuꞌtoꞌpe Jeováya tîîwanmîra?
- Imakuiꞌpî ipîra ikuꞌsaꞌ uurînîkonya ya, îꞌ waniꞌ awanî yeꞌnen soosi esanon wenai, eꞌpîikaꞌtîntoꞌ yuwa eꞌpai uurînîkon wanî?
INÎꞌ PANPÎꞌ ESENUPAPAI NAN?
Eraꞌmakî oꞌnon yeꞌka pe tiwin warayoꞌ epuꞌtîꞌpî, uurînîkon eraꞌma Jeováya tîꞌnokoꞌpî pe, Isaías 1:18 ya taasaꞌ manni yawîrî.
Oꞌnon yeꞌka pe imakuiꞌpî kuꞌnen yenpaꞌka wanî morî pe tamîꞌnawîronkon tonpe?
Eraꞌmakî oꞌnon yeꞌka pe ekaremekîya eꞌpainon Jeová Maimu Ekaremeꞌnen rîn pî, îꞌ see mîrîrî yenpaꞌkatoꞌ.
Tiwin warayoꞌya yairon rumakaꞌpî. Eraꞌmatoꞌpe îꞌ wanî awanî yeꞌnen eesenumenkaꞌpî mîîkîrî yuꞌse Jeová wanîꞌpî inîꞌrî, seeni panton eraꞌmakî: “Jeová pia ennaꞌpo eꞌpai uurî wanîꞌpî”.
“Paapa Maimuya Pemonkonyamîꞌ Inkaꞌma” (A Sentinela, 1 Abril kapoi pî, 2012 konoꞌ pî)
