Oy mëk xyjyatsokyë Jyobaa ets xyjyajëjpkudijë tijaty axëëk yajnayjyäˈäwëp, seguurë ko mdëgoyäämp näˈäganäˈäjëty. Ta poky kaytyeyë mëjwiin kajaabë ets ta mëdiˈibë kyaj (1 Korintʉ 6:9, 10). Ko mbokytyunët mëjwiin kajaa, jamyats ko duˈunyëmë Jyobaa mtsokäˈänyëty, mbokymyaˈkxäˈänyëty ets mbudëkëyaˈanyëty.

1. ¿Ti mbäät nduˈunëm parë Jyobaa xypyokymyaˈkxëm?

Ko tuˈugë jäˈäy mëdiˈibë tsyojkypyë Jyobaa tkupëky ko të jyantsy tyuundëgoy, jantsy axëëk nyayjyawëty. Perë Jyobaa duˈun jyotkujkmoˈoyëty extëm tˈanmääy ja nyax kyäjpn: “Oyë mboky të jyëmbity tsapts, wäˈätsäämp jantsy poop extëmë tëtsn” (Isaías 1:18). Pääty pën jodëmbijtëm amumduˈukjot, Jyobaa xypyokymyaˈkxäˈänëm. ¿Per tidën yˈandijpy njodëmbijtëm amumduˈukjot? Ko nmëkjäˈäwëm ti të nduˈunëm, nmastutëm ja poky kaytyey ets nˈanmäˈäyëmë Jyobaa waˈan xypyokymyaˈkxëm. Ta net nduˈunëmë mëjääw ets nyajtëgäjtsëm ja jot winmäˈäny, nmastutëm tii të xyajtuundëgoˈoyëm etsë net njukyˈäjtëm extëmë Jyobaa dyajnigutukë (käjpxë Isaías 55:6, 7).

2. Ko nbokytyuˈunëm, ¿wiˈixë Jyobaa dyajtunyë mëjjäˈäytyëjk parë xypyudëjkëm?

Jyobaa yˈanmaapy ja mëdiˈibë të pyokytyuny mëjwiin kajaa ets tmëtmaytyäˈägët “ja mëjjäˈäytyëjk mëdiˈibë tuundëp mä nduˈukmujkëm” (käjpxë Santiago 5:14, 15, TNM). Yäˈädë mëjjäˈäytyëjk tsyojktëbë Jyobaa ets ja myëguˈuktëjk, nyijäˈäwëdëp nanduˈun wiˈix mbäät xypyudëjkëm parë jatëgok oy nˈijtëm mëdë Jyobaa (Galasyʉ 6:1).

¿Wiˈix xypyudëkëyäˈänëm ja mëjjäˈäytyëjk ko nbokytyuˈunëm mëjwiin kajaa? Nimajtsk o nidëgëëk ja mëjjäˈäytyëjk xytyukˈixäˈänëm mä Biiblyë ko kyaj yˈoyëty mëdiˈibë të nduˈunëm. Xypyudëkëyäˈänëm ets xymyoˈoyäˈänëm ja ëwij käjpxwijënë parë kyaj jatëgok nbokytyuˈunëm. Mbäät nanduˈun xyˈanmäˈäyëm tijaty kyaj ndunäˈänëm tuk tiempë mä nduˈukmujkëm, axtë koonëm jatëgok oy nyajpatëm mëdë Jyobaa. Pën tuˈugë jäˈäy të pyokytyuny mëjwiin kajaa ets kyaj jyodëmbity, ta yaˈëxkaxäˈäny, net kyaj dyajmäˈädët ja myëguˈuktëjk.

 AK NIJAWË NIˈIGYË

3. Nˈokmaytyakëm ja poky kaytyey parë jatëgok oy nˈijtëm mëdë Jyobaa

Oy ti poky kaytyey nduˈunëm, axëëgë Jyobaa dyajnayjyawëty, pääty jëjpˈam ets ndukmëtmaytyakëm ti të nduundëgoˈoyëm. Käjpxtë Salmo 32:1-5 ets nimaytyäˈäktë mëdiˈibë yä yajtëëpy:

• ¿Wiˈix ndukˈoyˈatäˈänëm ko Jyobaa ndukmëtmaytyakëm ti të nduundëgoˈoyëm ets kyaj nguyuˈtsëm?

 4. Xypyudëjkëm niˈamukë ko tuˈugë jäˈäy yaˈëxkexy

Pën tuˈugë jäˈäy të pyokytyuny mëjwiin kajaa ets kyaj tnekymyëmëdowäˈänyë Jyobaa yˈanaˈamën, ta yaˈëxkexy ets kyaj mbäät nyekytyuny mä Diosë kyäjpn. Kyaj mëët nekytyuˈukmujkëm ni nganekymyëˈëˈëw nganekymyëgäjpxëm. Käjpxtë 1 Korintʉ 5:6, 11 etsë 2 Fwank 9-11, ets nimaytyäˈäktë mëdiˈibë yä yajtëëpy:

• Duˈun extëm ja lebaduurë dyajpëdëˈëgyë tsäjpkaaky jyëtsy, ¿waˈandaa nanduˈun dyajmäˈädët ja nmëguˈukˈäjtëm ko nduˈukmujkëm mët ja pokyjyaˈay mëdiˈibë kyaj jyodëmbity? ¿Ets tiko?

 TI TË NJÄJTËM

Jyobaa xypyokymyaˈkxäˈänëm ko nbokytyuˈunëm mëjwiin kajaa, per net ko njodëmbijtëm amumduˈukjot ets nmastutëm ja axëkˈäjtën.

Ajamyatsë

• ¿Wiˈix ndukˈoyˈatäˈänëm ko ndukmëtmaytyakëmë Jyobaa ti të nduundëgoˈoyëm?

• ¿Ti mbäät nduˈunëm parë Jyobaa xypyokymyaˈkxëm?

• Pën pokytyuˈunëm mëjwiin kajaa, ¿tiko yˈoyëty nˈamdoˈowëmë naybyudëkë mëjjäˈäytyëjk?