Vese maa-ní kutoo tuni-ní Jeová de chuʼun tuni ini-ní tágua ma saʼa-ní ja tajuʼvi ini-Ya, vese saá koo ji̱chi ja sanaa saʼa-ní kuachi. De iyo kuachi kaʼnu ji kuachi luli (1 Corintios 6:9, 10). De nú maa-ní saʼa-ní ɨn kuachi kaʼnu, núku̱ʼun ini-ní ja Jeová ma sndoo̱ kuiti̱-Ya maa-ní ja sɨkɨ ñukua; chi sá iyo tuʼva-Ya tágua kunee kaʼnu ini-Ya ji chíndeé-Ya nu̱u̱-ní.

1. ¿Naguá jiniñuʼun saʼa-yo tágua kunee kaʼnu ini Jeová nu̱u̱-yo?

Ta ɨn ñayí ja kutoo Jeová jíni̱-ji ja ni saʼa-ji ɨn kuachi kaʼnu, kukuéká tuni ini-ji. De Jeová kuáʼa-Ya tuʼun ndeé ini jín tuʼun yaʼa ja ni jeʼe-Ya nu̱u̱ ñuu-Ya: “Vese kuachi nda-ro niji̱ tanu ja kuaʼa escarlata, de kindoo kuijín tanu yu̱ʼva” (Isaías 1:18, TNM). Nú ndakani ndija ini-yo, Jeová kunee kaʼnu ndija ini-Ya nu̱u̱-yo. ¿De naguá kúni kaʼan ja ndakani ini-yo? Yaʼa yitaʼan jín ja tajuʼvi ini-yo ja sɨkɨ kuachi ja ni saʼa-yo, ja ma saʼa ka-yo ja nduu iyo vaʼa ji ja kakan táʼvi-yo nu̱u̱ Jeová ja na kunee kaʼnu ini-Ya nu̱u̱-yo. De sukua chuʼun ndija ini-yo ja nasa̱ma-yo na̱sa jani xini-yo axi ja ma saʼa ka-yo tiñu ja ni saʼa ja ni kinunkava-yo nu̱u̱ kuachi, de chuʼun ini-yo kundee-yo tanu kachi nda tuʼun ndoo Jeová (kaʼvi-ní Isaías 55:6, 7, TNM).

2. Ta kinunkava-yo nu̱u̱ ɨn kuachi, ¿na̱sa chíndeé Jeová nu̱u̱-yo ta jatiñu-Ya nda anciano?

Jeová kachi-Ya tuʼun yaʼa nu̱u̱ ɨn ñayí ja kinunkava nu̱u̱ ɨn kuachi kaʼnu: “de cana ro ndá te̱e cúñáʼnú ja̱ jíto nchivi̱ cándíja” (kaʼvi-ní Santiago 5:14, 15). Nda teé kuñaʼnu yaʼa ja espíritu santo ni ka̱ji, ka kutoo-de Jeová ji nda ñayí ñuu-Ya, de ka iyo tuʼva-de tágua chíndeé-de nu̱u̱-yo ja ná kitaʼan vaʼa tuku-yo jín Yandios (Gálatas 6:1).

¿Na̱sa ka chíndeé nda anciano nu̱u̱-yo nú kinunkava-yo nu̱u̱ ɨn kuachi kaʼnu? Uu-de axi uni-de kuu ka chindeé-de nu̱u̱-yo jín Biblia tágua jakuʼun ini-yo ja ndu iyo vaʼa ja ni saʼa-yo. Suni ka taji-de tuʼun vaʼa ji tuʼun ndeé ini ja jiniñuʼun-yo tágua ma kinunkava tuku-yo nu̱u̱ kuachi. Sanaa nda anciano ka kachi-de nasaa tiempo ma kuu saʼa-yo sava nda tiñu nu̱u̱ congregación, nde ndasaʼa nda̱a̱-yo maa-yo. Nú ɨn ñayí saʼa-ji ɨn kuachi kaʼnu de nduu ndakani ini-ji, nda anciano ka saʼa expulsar-de ñayí ñukua tágua koo ndoo ini congregación.

 NÁ KUTUʼVA KA-YO SƗKƗ TUʼUN YAʼA

3. Nú nakani-yo sɨkɨ kuachi saʼa-yo chíndeé ja nduvaʼa-yo

Naani kuachi ja saʼa-yo saʼa ja kukuéká ini Jeová, ñukua kuu ja jiniñuʼun ja nakani-yo nu̱u̱-Ya kuachi ja ni saʼa-yo. Ka kaʼvi-ní Salmo 32:1-5, TNM de ka ndatuʼun-ní sɨkɨ nda tuʼun yaʼa:

• ¿Nakú ɨn ja vaʼa maa-yo kuu ja nakani-yo nu̱u̱ Jeová kuachi ja ni saʼa-yo de ma chisa̱ʼvi-yo?

 4. Expulsión ja vaʼa maa-yo kuu

Nú ɨn ñayí ja ni saʼa ɨn kuachi kaʼnu nduu kúni kandija nda tuʼun ja tetiñu Jeová, ma kuu ka satiñu-ji nu̱u̱ Yandios jín congregación. De ka saʼa expulsar-ji. Ñukua kuu ja nduu kitaʼan-yo de suni nduu kaʼan-yo jín ñayí ñukua. Ka kaʼvi-ní 1 Corintios 5:6, 11 ji 2 Juan 9-11, de ka ndatuʼun-ní sɨkɨ nda tuʼun yaʼa:

• Ta jani ini-yo sɨkɨ ejemplo levadura ja saʼa ja ndáa̱ ñujan sta̱a̱ tila, ¿a káʼán-ní ja ku̱ú stíví nu̱u̱ congregación nú kitaʼan-yo jín ɨn ñayí ja ni saʼa ɨn kuachi kaʼnu de nduu ndakani ini-ji? ¿Nakú?

 JA NI KUTUʼVA-YO

Nú saʼa-yo ɨn kuachi kaʼnu de chuʼun ini-yo tágua ma kinunkava tuku-yo, Jeová kunee kaʼnu ini-Ya nu̱u̱-yo.

Tuʼun núku̱ʼun ini

• ¿Nakú ɨn ja vaʼa maa-yo kuu ja nakani-yo nu̱u̱ Jeová kuachi ja ni saʼa-yo?

• ¿Naguá jiniñuʼun saʼa-yo tágua kunee kaʼnu ini Jeová nu̱u̱ nda kuachi ja ni saʼa-yo?

• Nú saʼa-yo ɨn kuachi kaʼnu, ¿nakú jiniñuʼun ja kakan-yo nu̱u̱ nda anciano tágua chíndeé-de nu̱u̱-yo?