LESON 57
Ki Pou Arive si Ou Fer enn Pese Grav?
Mem si ou vremem kontan Zeova ek ou esey fer ou maximum pou pa fer nanye pou bles Li, parfwa ou pou fer bann erer. Selman, ena sertin pese ki pli grav ki lezot. (1 Korintien 6:9, 10) Si ou fer enn pese grav, rapel ki Zeova ankor kontan ou. Li anvi pardonn ou ek Li pou ed ou.
1. Ki nou bizin fer pou ki Zeova pardonn nou?
Bann ki kontan Zeova vremem sagrin kan zot realize ki zot inn fer enn pese grav. Me zot gagn rekonfor gras-a promes ki Zeova ti fer so pep: “Mem si zot pese rouz vif, sa bann pese-la pou vinn blan kouma lanez.” (Izai 1:18) Si nou vremem repanti, Zeova pou pardonn nou net. Kouma nou montre ki nou’nn repanti? Se kan nou vremem regret seki nou’nn fer, nou aret fer seki pa bon ek nou sipliy Zeova pou pardonn nou. Apre sa, nou fer zefor pou sanz nou move fason panse ouswa bann move labitid ki’nn amenn nou pou fer sa pese-la, ek nou esey fer nou best pou ena enn lavi ki fer Zeova kontan.—Lir Izai 55:6, 7.
2. Kouma Zeova servi bann ansien pou ed nou kan nou fer enn pese?
Si nou fer enn pese grav, Zeova dir nou ki nou “bizin apel bann ansien.” (Lir Zak 5:14, 15.) Sa bann zom ki Zeova finn swazir la, kontan Zeova ek so bann serviter. Zot inn gagn formasion ki bizin pou ed nou pou regagn enn bon lamitie avek Zeova.—Galat 6:1.
Kouma bann ansien kapav ed nou si nou’nn fer enn pese grav? De ouswa trwa ansien pou servi Labib pou explik nou kifer seki nou’nn fer pa bon. Zot pou osi donn nou bann konsey ek bann lankourazman pou ed nou pou ki nou pa refer enn pese. Kitfwa zot pou dir nou osi, ki nou pou nepli kapav partisip dan sertin aktivite dan lasanble, ziska ki nou refer nou relasion avek Zeova vinn for. Si enn dimounn fer enn pese grav ek ki li pa repanti, bann ansien pou exkli li pou ki li pena enn move inflians lor lezot dan lasanble.
ANOU GET INPE PLIS
Anou gete kouma ou kapav konpran ek apresie pli bien fason ki Zeova ed nou kan nou fer enn pese grav.
3. Konfes nou bann pese ed nou pou regagn nou relasion avek Zeova
Kan nou fer enn pese, nou fer Zeova so leker fermal. Alor, li normal ki nou konfes nou pese avek Li. Lir Psom 32:1-5, ek apre sa, get sa kestion-la ansam:
-
Kifer li bon ki nou konfes nou bann pese ar Zeova, olie ki nou esey kasiet zot?
Apre ki nou’nn konfes nou bann pese ar Zeova, nou kapav gagn rekonfor kan nou rod led bann ansien. Zwe VIDEO-la, ek apre sa, get sa kestion-la ansam:
-
Dan sa video-la, kouma bann ansien ti ed Canon pou retourn ar Zeova?
Nou bizin fran ek onet avek bann ansien, parski zot la pou ed nou. Lir Zak 5:16, ek apre sa, get sa kestion-la ansam:
-
Kifer li pli fasil pou bann ansien pou ed nou kan nou onet avek zot?
Ou bizin konfes ou bann pese, onet avek bann ansien, ek aksepte led ki Zeova pe donn ou avek boukou lamour
4. Kouma sa kapav ede kan exkli enn kikenn?
Si enn dimounn ki’nn fer enn pese grav refiz pou swiv bann prinsip Zeova, li pou nepli kapav form parti dan lasanble. Li pou exkli, ek nou pou nepli kapav frekant li ouswa mem koz avek li. Lir 1 Korintien 5:6, 11 ek 2 Zan 9-11, ek apre sa, get sa kestion-la ansam:
-
Parey kouma enn tigit levin fer lapat gonfle, ki lefe sa pou ena si bann manb lasanble frekant enn dimounn ki pa’nn repanti?
Boukou parmi bann ki’nn exkli finn retourn dan lasanble. Kifer? Mem si sa ti fer zot soufer kan zot ti exkli, sa ti ed zot pou realize ki seki zot ti fer pa bon. (Psom 141:5, NW) Zwe VIDEO-la, ek apre sa, get sa kestion-la ansam:
-
Dan sa video-la, kouma sa finn ed Sonja kan finn exkli li?
Kan exkli enn kikenn, kouma . . .
-
sa donn loner nom Zeova?
-
sa montre ki Zeova rezonab ek ena boukou lamour?
5. Zeova pardonn nou kan nou repanti
Zezi ti servi enn lexanp pou ed nou konpran seki Zeova resanti kan enn dimounn repanti. Lir Lik 15:1-7, ek apre sa, get sa kestion-la ansam:
-
Ki sa lexanp-la aprann ou lor Zeova?
Lir Ezekiel 33:11, ek apre sa, get sa kestion-la ansam:
-
Ki kitsoz inportan nou bizin fer pou montre ki nou’nn vremem repanti?
Parey kouma enn berze, Zeova vremem gagn traka so mouton
SERTIN DIMOUNN DIR: “Mo per pou dir bann ansien seki mo’nn fer, tansion mo exkli.”
-
Ki ou ti pou dir enn dimounn ki pans koumsa?
SEKI NOU’NN APRANN
Si nou’nn fer enn pese grav, Zeova pou pardonn nou si nou vremem regrete ek si nou determine pou aret fer seki pa bon.
Eski Ou Rapel?
-
Kifer li bon ki nou konfes nou bann pese ar Zeova?
-
Ki nou bizin fer pou ki Zeova pardonn nou bann pese?
-
Si nou fer enn pese grav, kifer nou bizin rod led bann ansien?
DEKOUVER
Gete kouma enn misie inn resanti mizerikord Zeova ki dekrir dan Izai 1:18.
Dan ki fason sa ede kan exkli enn kikenn?
“Exkli enn Dimounn—Eski Se enn Dispozision Ranpli ar Lamour?” (Latour Degard, 15 Avril 2015)
Aprann kouma ou kapav explik enn kikenn ki pa Temwin kifer parfwa enn dimounn exkli.
“Eski Bann Temwin Zeova Rezet Bann Ki Nepli Temwin Zeova?” (Lartik lor jw.org)
Dan lartik « Il fallait que je revienne vers Jéhovah, » aprann kifer enn misie ki’nn elwagn li ar laverite inn resanti ki Zeova ti ed li pou retourne.
“Labib Sanz Bann Dimounn” (Latour Degard, 1e Avril 2012, an Franse)
Ena Osi
KESTION KI POZE SOUVAN
Ki sa Inplike Etidie Labib Avek Bann Temwin Zeova?
Bann Temwin Zeova ofer bann letid Labib gratis, ek ou kapav servi ninport ki version Labib ki ou anvi. Santi ou lib pou invit bann manb ou fami ouswa bann kamarad ki ou anvi.
