ISAMBILILO 57
Mungacita Uli Ndi Cakuti Mwacita Uluyembu Ulwipisye?
Nanti icakuti mwatemwa Yeova nupya mukaezya na amaka ukukanacita ivingamusosya, ilingi mukaluvyanya. Nomba imembu zimwi zikaipisya ukucila izyuze. (1 Kolinto 6:9, 10) Ndi cakuti mwacita uluyembu ulwipisye, mwaiusya ukuti Yeova atatiile ukumutemwa nupya akulondesya ukumwelela nu kumwazwa.
1. I vyani vino tulinzile ukucita pakuti Yeova atwelele?
Aatemwa Yeova yakauvwa sana uyi ndi cakuti yamanya ukuti iyacita uluyembu ulwipisye. Nomba yakakomeleziwa sana ndi cakuti yuvwa amazwi yano Yeova walaya antu yakwe akuti: “Amaifyo inu nanti yangayenzya cee, nemo namayafula nga nayo yamaswepa mpe.” (Ezaya 1:18) Ndi cakuti twalapila, Yeova alatwelela nu kwililako. I vyani vino tulinzile ukucita pa kulanga ukuti itulapila? Tulinzile ukuvwa uyi pali vino ituluvyanya, kuta ukucita iviipe alino nu kulenga uwelelo kuli Yeova. Lyene tulinzile ukuombesya ukusenula imyelenganyizizye itu nanti imiyele ingalenga tuyembuke, nu kwezya na amaka ukucita vino Yeova akalonda.—Belengini Ezaya 55:6, 7.
2. Uzye Yeova akaomvya uli ya eluda ukutwazwa nga twayembuka?
Ndi cakuti twacita uluyembu ulwipisye, Yeova watunena ukuti tulinzile ukunena “ya eluda ya mu cilongano.” (Belengini Yakobo 5:14, 15.) Ya eluda yaa yatemwa Yeova na yonsi aakamuombela. Yasambiliziwa ivya kutwazwa pakuti tuye na ucuza usuma na Yeova nupya.—Galatiya 6:1.
Uzye ya eluda yakacita uli pakuti yatwazwe ndi cakuti twacita uluyembu ulwipisye? Ya eluda yaili nanti yatatu yakaomvya Malembo, pakuti yatwazwe ukumanya ukuti vino twacisile iviipe. Nupya yakatunena vimwi vino tungacita ivingatwazwa ukukanayembuka nupya. Yangatunena ukuta ukucita vimwi umu cilongano ukufikila lino ucuza witu na Yeova wazipa. Ndi cakuti umuntu uwatayembuka asikulapila, ya eluda yangazinga umuntu wiyo pakuti yacingilile amu cilongano.
LONDELEZYINI NA VYUZE
Sambililini pakuti muvwikisye nu kutandika ukutaizya sana pali vino Yeova akatwazwa ndi cakuti twacita uluyembu ulwipisye.
3. Kunena Yeova vino ituluvyanya kungatwazwa ukuya ya cuza yakwe nupya
Uluyembu lonsi luno tungacita lukasosya Yeova, fwandi tulinzile ukulenga uwelelo kuli aliwe. Belengini Masamu 32:1-5, alino mulanzyanye iuzyo lii:
-
U mulandu ci uno cacindamila ukunena Yeova vino ituluvyanya ukucila ukufisa?
Ndi cakuti twanena ya eluda ukuti yatwazwe pa cisila ca kunena Yeova vino ituluvyanya, tukauvwa ningo sana. Tambini VIDYO, alino mulanzyanye iuzyo ilyatililondelelapo.
-
Muli vidyo, uzye ya eluda iyazwa uli ya Canon kuwela kuli Yeova?
Tulinzile ukuitemelwa nu kuya acisinka lino tukunena ya eluda vino ituluvyanya pano yayelako ku kutwazwa. Belengini Yakobo 5:16, alino mulanzyanye iuzyo lii:
-
Uzye cingangukila uli ya eluda ukutwazwa ndi cakuti tuli acisinka lino tukulanda nayo?
Mwanena Yeova vino imuluvyanya, kuya acisinka lino mukulanzyanya na ya eluda, alino nu kuzumila uwazwilizyo ukufuma kuli Yeova
4. Vino ukuzinga kukaazwa amu cilongano nu watayembuka
Ndi cakuti uwatayembuka wakana ukulondela masunde yakwe Yeova, angazingwa umu cilongano. Ndi cakuti caya vivyo tutalinzile ukulacitila ivintu ivili vyonsi pamwi nawe nanti sile ukulanda nawe. Belengini 1 Kolinto 5:6, 11; na 2 Yoani 9–11, alino mulanzyanye iuzyo lii:
-
Wakwe viivi kwene vino icitutumusi cikatutumula umunya, uzye ukuvwana nu muntu uwatazingwa kungalenga umu cilongano muye uli?
Aingi azinzilwe mpiti yawela kuli Yeova, nanti cakuti kuzingwa kwalenzile yuvwe sana uyi, kwayazwile ukumanya ukuti vino yacisile vyali iviipe. (Masamu 141:5) Tambini VIDYO, alino mulanzyanye iuzyo ilyatililondelelapo.
-
Muli vidyo ii, uzye ukuzingwa kwali kwazwa uli ya Sonja?
Uzye ukuzinga . . .
-
kukalenga uli izina lyakwe Yeova ukucindikwa?
-
kukalanga uli ukuti Yeova waya nu mulinganya nu kutemwa?
5. Yeova akatwelela nga twalapila
Yesu waomvizye icilangililo icikatwazwa ukumanya vino Yeova akayuvwa ndi cakuti umwi walapila. Belengini Luka 15:1-7, alino mulanzyanye iuzyo lii:
-
Uzye ci cikumusambilizya cani pali Yeova?
Belengini Ezekelo 33:11, alino mulanzyanye iuzyo lii:
-
I cintu ci cimwi icicindame cino tulinzile ukucita pa kulanga ukuti itulapila umu cumi?
Wakwe vino kacema akasakamala imfwele zyakwe, avino na Yeova akacita
YAMWI YAKALANDA UKUTI: “Nkutiina ukuti ndi cakuti nanena ya eluda vino induvyanya, namazingwa.”
-
I vyani vino munganena umuntu akuyuvwa vivyo?
VINO TWASAMBILILA
Ndi cakuti twacita uluyembu ulwipisye nomba twalapila ukufuma pa nsi ya mwenzo nu kuta ukucita iviipe, Yeova alatwelela.
I vyani vino mwasambilila?
-
U mulandu ci uno cacindamila ukunena Yeova vino ituluvyanya?
-
I vyani vino tulinzile ukucita pakuti Yeova atwelele?
-
U mulandu uno tulinzile ukunenela ya eluda ukuti yatwazwe ndi cakuti twacita uluyembu ulwipisye?
LONDELEZYINI
Lolini vino Yeova uvwilile umonsi umwi uluse ulwalondololwa pali Ezaya 1:18.
Uzye ukuzinga kungazwa yonsi amu cilongano nu watazingwa?
“Ukuzinga Umwi Umu Cilongano Inzila Yakulangilamo Ukutemwa” (Lupungu Lwa Mulinzi, Epuleo 15, 2015)
Lolini vino mungalondolwela umwi asi Nte umulandu uno umwi angazingilwa insita zimwi.
“Uzye ya Nte Yakwe Yeova Yakapata Antu Yano Yapepanga Nayo Mpiti?” (Cipande ca pa intaneti)
Umwi lyasi lyakuti “Nalondesyanga Ukuwela Kuli Yeova,” sambililini vino umonsi umwi uwafumile umu cumi wayuvwanga ukuti Yeova u wamuwezizye kuli aliwe.
“Baibo Ikaavwa Antu Ukusenuka” (Lupungu Lwa Mulinzi, Epuleo 1, 2012)
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye Isambililo Lya Baibo Ali Cani?
Zanini masuko ku mauzyo pali vino tukasambilizya antu Baibo ukwaula ukuyalipilisya.
