तुमचं यहोवावर मनापासून प्रेम असलं, आणि त्याला न आवडणाऱ्‍या गोष्टींपासून दूर राहायचा तुम्ही पुरेपूर प्रयत्न करत असला, तरी कधी ना कधी तुमच्या हातून लहान-मोठ्या चुका होतील. पण काही चुका जास्त गंभीर असतात. (१ करिंथकर ६:९, १०) जर तुमच्या हातून एखादं गंभीर पाप झालं तर हे लक्षात असू द्या, की यहोवाचं तुमच्यावर अजूनही प्रेम आहे. तुम्हाला क्षमा करायला आणि तुम्हाला मदत करायला तो नेहमी तयार आहे.

१. यहोवाने आपल्याला क्षमा करावी म्हणून आपण काय केलं पाहिजे?

यहोवावर प्रेम करणाऱ्‍या एखाद्या व्यक्‍तीला जेव्हा याची जाणीव होते, की आपल्या हातून एक गंभीर पाप घडलंय तेव्हा त्याला खूप दुःख होतं. पण यहोवाने आपल्या लोकांना दिलेल्या या वचनामुळे अशा व्यक्‍तीला खूप सांत्वन मिळतं: “तुमची पापं रक्‍तासारखी लाल असली, तरी ती बर्फासारखी शुभ्र केली जातील.” (यशया १:१८) जर आपण मनापासून पश्‍चात्ताप केला तर यहोवा आपल्याला पूर्णपणे क्षमा करेल. पण मनापासून पश्‍चात्ताप करण्यात कोणत्या गोष्टी सामील आहेत? पहिली गोष्ट म्हणजे, आपण केलेल्या चुकीबद्दल आपल्याला मनापासून वाईट वाटतं. त्यामुळे आपण ती चूक करायचं सोडून देतो. यासोबतच आपण यहोवाला कळकळीने प्रार्थना करून माफी मागतो. त्यानंतर, ज्या चुकीच्या विचारांमुळे किंवा सवयींमुळे आपण ते पाप केलं, त्यांवर मात करण्यासाठी आपण मेहनत घेतो. तसंच, आपण यहोवाच्या शुद्ध स्तरांप्रमाणे जगायचा प्रयत्न करतो.—यशया ५५:६, ७ वाचा.

२. आपल्या हातून पाप होतं तेव्हा यहोवा वडिलांद्वारे आपल्याला कशी मदत करतो?

यहोवा आपल्याला सांगतो की जर आपल्या हातून एखादं गंभीर पाप झालं, तर आपण “मंडळीच्या वडिलांना बोलवावं.” (याकोब ५:१४, १५ वाचा.) पवित्र शक्‍तीद्वारे नियुक्‍त केलेल्या या बांधवांचं यहोवावर आणि त्याच्या कळपातल्या मेंढरांवर खूप प्रेम आहे. ते यहोवासोबत पुन्हा चांगलं नातं जोडायला आपल्याला मदत करू शकतात. त्यासाठी त्यांना प्रशिक्षण देण्यात आलंय.—गलतीकर ६:१.

आपल्या हातून गंभीर पाप झालं असेल तर वडील आपल्याला कशी मदत करतील? दोन किंवा तीन वडील आपली चूक सुधारण्यासाठी आपल्याला बायबलमधून सल्ला देतील. हे पाप आपल्या हातून पुन्हा होऊ नये म्हणून बायबलमधला सल्ला कसा लागू करायचा, हे ते आपल्याला सांगतील आणि आपल्याला प्रोत्साहनही देतील. तसंच, यहोवासोबतचं आपलं नातं पुन्हा मजबूत होईपर्यंत मंडळीच्या काही कार्यांमध्ये सहभाग घेण्याच्या बाबतीत ते कदाचित आपल्यावर काही बंधनं घालतील. पण जेव्हा गंभीर पाप करणारी व्यक्‍ती पश्‍चात्ताप करत नाही, तेव्हा वडील तिला बहिष्कृत करण्याचा निर्णय घेतात. वाईट प्रभावांपासून मंडळीचं संरक्षण व्हावं म्हणून ते असं करतात.

 आणखी जाणून घेऊ या

३. पाप कबूल केल्यामुळे आपल्याला फायदा होतो

आपण जेव्हा पाप करतो तेव्हा खरंतर यहोवाचं मन दुखावत असतो. म्हणून त्याच्याजवळ आपलं पाप कबूल करणं योग्यच आहे. स्तोत्र ३२:१-५ वाचा, आणि मग या प्रश्‍नावर चर्चा करा:

• आपण केलेलं पाप लपवण्यापेक्षा ते यहोवाजवळ कबूल करणं का चांगलंय?

 ४. बहिष्कृत करणं ही एक प्रेमळ तरतूद आहे

गंभीर पाप करणारी एखादी व्यक्‍ती जेव्हा यहोवाच्या स्तरांप्रमाणे जगायला नकार देते, तेव्हा ती मंडळीचा भाग राहू शकत नाही. अशा व्यक्‍तीला बहिष्कृत केलं जातं. त्यानंतर आपण तिच्याशी कोणताही संबंध ठेवत नाही, इतकंच काय तर आपण तिच्याशी बोलतही नाही. १ करिंथकर ५:६, ११ आणि २ योहान ९-११ वाचा, आणि मग या प्रश्‍नावर चर्चा करा:

• ज्या प्रकारे खमीर संपूर्ण पिठाला फुगवतं, त्याच प्रकारे पश्‍चात्ताप न करणाऱ्‍या व्यक्‍तीशी संबंध ठेवल्यामुळे पूर्ण मंडळीवर वाईट प्रभाव कसा पडू शकतो?

 थोडक्यात

आपल्या हातून गंभीर पाप झालं, तरीसुद्धा जर आपल्याला त्याबद्दल मनापासून वाईट वाटत असेल, आणि ती चूक पुन्हा न करण्याचा जर आपण निश्‍चय केला असेल, तर यहोवा आपल्याला नक्की क्षमा करेल.

उजळणी

• यहोवाजवळ आपलं पाप कबूल करणं का चांगलंय?

• आपल्या पापांची क्षमा व्हावी म्हणून आपण काय केलं पाहिजे?

• आपण गंभीर पाप केलं असेल, तर आपण मंडळीतल्या वडिलांची मदत का घेतली पाहिजे?