Vutuhu tua lema mua kama Yehova, kaha tue ku lihakela kapandi ka ku liniunga ku vize vi hasa ku mu vuisa vusiua, kasi vintsimbu vimo tu ka sevuka. Vunoni vumo vupi, vua pua vua kama ku hiana vukuavo. (1 Kolintu 6:9, 10) Nga mu ka vulumuna vupi vua kama, kati mu ka suve ngecize Yehova ka likelele ku mi lema, kaha ali na cizango ca vutuntu ca ku mi ecela na ku mi kuasa.

1. Vika tua pande ku linga mangana Yehova a tu ecele?

Vamo va lema Yehova ve ku ivua vusiua vua kama, mu ve ku nongonona ngecize va na lingi vupi vua kama. Vutuhu ngoco, ve ku uana ku lembezieka ku mezi a kulahesele Yehova vantu veni ngueni: “Vutuhu vipi vienu via tili ngengu, vi ka vuka to ngue mema a ku konda.” (Isaya 1:18) Nga tu aluluka mu vusunga, Yehova a ka tu ecela mu vutuntu. Vika ca lomboloka ku aluluka? Ca pua ku liveya mua kama vupi vu tu na lingi, ku likelavuo kaha na ku vundila Yehova linga a tu ecele. Cikuavo naua, tua pande ku lihakela kapandi ka ku alulula visinganieka via ku vihia, ni vilinga vize via tu lingisile ku vulumuna, na ku linga cose mu ku yoya muaya vitume via ku lela via Yehova.—Tandenu Isaya 55:6, 7.

2. Vati Yehova ue ku pangesa vakuluntu mu cikungulukilo mu ku tu kuasa nga tua vulumuna?

Nga tua lingi vupi vua kama, Yehova ua tu sikile ngueni tu “sane vakuluntu va mbunga.” (Tandenu Tiango 5:14, 15.) Ava vamala va ku hangula va lema Yehova na vampanga veni. Kaha va va longesa mua ku tu kuasela linga tu hiluise vusamba vuetu na Yehova.—Ngalata 6:1.

Vati vakuluntu ve ku tu kuasa nga tu na lingi vupi vua kama? Vakuluntu vavali ni vatatu, ve ku tu sungamesa na vimamuna via mu Mbimbiliya. Kaha naua ve ku tu kaniamesa na ku tu hana vinguli via cili, vize vi ka tu kuasa linga kati naua tu linge vupi vuaco. Kaha va hasa ku tu vindika ku linga vimo mu cikungulukilo, noho tu na kanguka vuino mu lutsilielo. Cikuavo naua, nga muntu na lingi vupi vua kama vunoni ka liveye, vakuluntu ve ku mu uisa linga kati a sambuisile vakuavo mu cikungulukilo.

 TANTEKEYENU VIKUAVO

3. Ku litavela vupi vuetu ce ku tu kuasa ku kanguka

Vupi vuose vu tue ku linga tue ku vulumuina Yehova, ngeci mukemuo tue ku litavela kuli ikeye. Tandenu Visamo 32:1-5, kaha simutuilenu ha cihula eci:

• Vika ca puila ca cili ku litavela vupi vuetu kuli Yehova kati ku vu sueka?

 4. Vati ku uisa muntu mu cikungulukilo ce ku kuasa?

Nga muntu na lingi vupi vua kama kaha a viana vitume via Yehova, ka pandele naua ku pua mutamba ua cikungulukilo. Ve ku mu uisa, kaha netu naua tue ku likela ku likata neni, ni vene ku mu handekesa. Tandenu 1 Kolintu 5:6, 11 na 2 Yoano 9–11, kaha simutuilenu ha cihula eci:

• Ngeci mua cimbaluila ce ku futunuisa mukamo ua mbolo, vati ku likata na mukua vupi ke ku aluluka ci hasa ku vihisa cikungulukilo?

 VI MU NA LILONGESA

Nga tua lingi vupi vua kama, vunoni tua liveye mu vusunga na ku lihakela kapandi ka ku hona ku linga vupi, Yehova a ka tu ecela.

Mpupulule

• Vika ca puila ca cili ku litavela vupi vuetu kuli Yehova?

• Vika tua tondeka ku linga mangana va tu ecele ku vipi vietu?

• Nga tua lingi vupi vua kama, omo lia vika tua pande ku tonda vukuasi vua vakuluntu?