TLAMACHTIL 57
¿Tlen moneki tikchiuas tla titlajtlakolchiuas?
Maski sapanoua tiktlasojtla Jehová uan timochijchikauas tikchiuas tlen kuali, xamo ualeua timotlapololtis uan tikchiuas itlaj tlen amo kuali. Pero onka seki tlamantli tlen okachi tlajtlakoli (1 Corintios 6:9, 10). Tla titlajtlakolchiuas, xikilnamikto Jehová amo mitskauas, ye kineki mitstlapojpoluis uan mitspaleuis.
1. ¿Tlen moneki tikchiuaskej para matechtlapojpolui Jehová?
Tla se tokni tlajtlakolchiua, moyolkokoua porque kitlasojtla Jehová. Pero Jehová kiyolseuia ika tlen okinmilui itekipanojkauan: “Maski namotlajtlakol yetos chichiltik ken escarlata, mokopas istak ken nieve” (Isaías 1:18). Tla melauak timoyolkopaj, Jehová techtlapojpoluia, ¿ken uelis tikteititiskej timoyolkopaj? Ijkuak sapanoua timoyolkokouaj porque otikchijkej tlen amo kuali, timochijchikauaj ayakmo ijkon tikchiuaj uan tiktlatlaujtiaj Jehová matechtlapojpolui. Noijki ijkuak ayakmo tikchiuaj tlen techyoltilana para titlajtlakolchiuaskej uan timochijchikauaj tiktlakamatij Jehová (xiktlajtolti Isaías 55:6, 7).
2. Tla titlajtlakolchiuaj, ¿ken techpaleuia Jehová ika tlayekankej?
Akin tlajtlakolchiua Jehová kinauatia: “Makinnotsa tlayekankej tlen katej itech tlanechikol” (xiktlajtolti Santiago 5:14, 15). Ninmej tlakamej kinpejpenaj ika espíritu santo, yejuan kitlasojtlaj Jehová uan itekipanojkauan, ikinon ninmej tokniuan uelis kipaleuiskej akin otlajtlakolchi para oksepa kuali mamouika iuan Jehová (Gálatas 6:1).
¿Ken uelis techpaleuiskej tlayekankej tla otitlajtlakolchijkej? Ome noso eyi tlayekankej techiluiskej ika Biblia tleka amo kuali tlen otikchijkej. Techiluiskej tlen moneki tikchiuaskej uan techyolchikauaskej para amo oksepa ijkon matikchiuakan. Xamo tlayekankej techiluiskej ayakmo uelis tikchiuaskej seki tlamantli kanin timonechikouaj hasta oksepa tikpiaskej chikauak totlaneltokilis. Tla akin otlajtlakolchi amo moyolkopa, kikixtiskej itech tlanechikol para amo kinmijtlakos oksekimej tokniuan.
MATIMOMACHTIKAN
Kuali matikajsikamatikan uan matikpatioitakan tlen Jehová kichiua para techpaleuis ijkuak titlajtlakolchiuaj.
3. Techpaleuis tla tikijtouaj ijkuak titlajtlakolchiuaj
Ijkuak tikchiuaj tlen amo kuali tikyolkokouaj Jehová, ikinon moneki tikiluiskej matechtlapojpolui. Xiktlajtoltikan Salmo 32:1-5 uan satepan xikitakan tlen namechmachtia.
-
¿Tleka moneki tikiluiskej Jehová ijkuak titlajtlakolchiuaj?
Noijki techpaleuis tla tikinmiluiaj tlayekankej matechpaleuikan. Xikitakan VIDEO uan satepan xikitakan tlen namechmachtia.
-
¿Tlen okichijkej tlayekankej para kipaleuiskej tokni?
Moneki tikinmiluiskej tlayekankej tlen melauak opanok uan amitlaj tiktlatiskej porque yejuan kinekij techpaleuiskej. Xiktlajtoltikan Santiago 5:16 uan satepan xikitakan tlen namechmachtia.
-
Tla tikinmiluiaj tlayekankej tlen melauak opanok, ¿uelis okachi techpaleuiskej? ¿Tleka?
Xikijto tlen amo kuali otikchi, xikinmilui tlayekankej tlen melauak opanok uan xikkauili Jehová mamitspaleui porque ye mitstlasojtla.
4. Ijkuak ikaj kikixtiaj itech tlanechikol techmaluiaj
Tla akin otlajtlakolchi amo kineki moyolkopas, kikixtiaj itech tlanechikol. Tejuan ayakmo iuan timouikaj nion iuan timotlapouiaj. Xiktlajtoltikan 1 Corintios 5:6, 11 uan 2 Juan 9-11 uan satepan xikitakan tlen namechmachtia.
-
Ijkon ken levadura kixokolia nochi tixtli, ¿timokuayejyekoua noijki mitsijtlakos tla timouika iuan akin otlajtlakolchi uan amo kineki moyolkopas? ¿Tleka?
Maski sekimej okinkixtijkej itech tlanechikol oksepa omokopkej, ¿tleka? Maski omoyolkokojkej ijkuak tlayekankej inuan omotlapouijkej, satepan omokuayejyekojkej tlen okinmiluijkej uan omoyolkopkej (Salmo 141:5). Xikitakan VIDEO uan satepan xikitakan tlen namechmachtia.
-
¿Ken okipaleui Sonia ijkuak okikixtijkej itech tlanechikol?
¿Ijkuak ikaj kikixtiaj itech tlanechikol...
-
... ken kichipaua itoka Jehová?
-
... ken kiteititia Jehová nochi kichiua ika melajkayotl uan techtlasojtla?
5. Jehová techtlapojpoluis tla timoyolkopaj
Tlen okijto Jesús techpaleuia matikajsikamatikan ken momachilia Jehová ijkuak ikaj moyolkopa. Xiktlajtoltikan Lucas 15:1-7 uan satepan xikitakan tlen namechmachtia.
-
¿Tlen techmachtia itech Jehová tlen okijto Jesús?
Xiktlajtoltikan Ezequiel 33:11 uan satepan xikitakan tlen namechmachtia.
-
¿Tlen uelis tikchiuaskej para tikteititiskej melauak timoyolkopaj?
Jehová ken se tlajpixki, kineki kinmaluis itekipanojkauan.
SEKIMEJ KIJTOUAJ: “Amo nikneki nikinmiluis tlayekankej tlen opanok, tla nikinmiluis nechkixtiskej itech tlanechikol”.
-
¿Tlen tikiluis tla ikaj ijkon mokuayejyekoua?
XIKILNAMIKTO
Tla titlajtlakolchiuaj pero melauak timoyolkopaj uan ayakmo tikchiuaj tlen amo kuali, Jehová techtlapojpoluis.
Matikojpauikan
-
¿Tleka moneki tikiluiskej Jehová ijkuak titlajtlakolchiuaj?
-
¿Tlen moneki tikchiuaskej para matechtlapojpolui Jehová?
-
Tla titlajtlakolchiuaj, ¿tleka moneki tikinmiluiskej tlayekankej matechpaleuikan?
NIN NOIJKI MITSPAKTIS
Xikita ken Jehová okiknomatki se tlakatl ijkon ken kijtoua Isaías 1:18.
¿Ken tlapaleuia ijkuak ikaj kikixtiaj itech tlanechikol?
“Tikintlasojtlaj ijkuak tikinkixtiaj itech tlanechikol” (Akin Tetlapouijtok, 15 de mayo 2015)
Xikita ken uelis tikyekiluis ikaj tlen amo iTlaixpantijka Jehová tleka sekimej kinkixtiaj itech tlanechikol.
Xikita ken se tlakatl okimachili Jehová oksepa okiyoltilantoka para makitekichiuili, tlamachtil itoka “Omonekiaya oksepa niktekichiuilis Jehová”.
“Biblia okinpatili innemilis” (Akin Tetlapouijtok, 1 de abril 2012)
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
