ISIFUNDO 57
Kuyini Okumele Ukwenze Nxa Ungenza Isono Esikhulu?
Lanxa umthanda sibili uJehova njalo uzama ngamandla akho wonke ukumthokozisa, zikhona izikhathi lapho ozamphambanisela khona. Kodwa-ke amanye amaphutha ayizono ezinkulu kuJehova. (1 KwabaseKhorinte 6:9, 10) Nxa ungenza isono esinjalo, hlala ukhumbula ukuthi uJehova uyabe elokhu ekuthanda futhi ezimisele ukukuthethelela lokukuncedisa ukuthi ulungisise ubungane bakho laye.
1. Kumele senzeni nxa sifuna ukuthi uJehova asithethelele?
Abantu abamthandayo uJehova bayazisola nxa bangenza isono esikhulu. UJehova ubaduduza ngamazwi la athi: “Lanxa izono zenu zibomvu gebhu, zizakwenziwa zibe mhlophe njengongqwaqwane.” (U-Isaya 1:18) Nxa singaphenduka okweqiniso uJehova uzasixolela. Kodwa kutshoni ukuphenduka? Kutsho ukuzisola ngenhliziyo yonke ngalokho esikwenzileyo, sizimisele ukungakuphindi njalo sicele ukuthi uJehova asithethelele. Ngemva kwalokho kumele sizimisele ukwenza akufunayo njalo sibalekele imicabango kumbe izenzo ezibangele ukuthi senze isono leso.—Bala u-Isaya 55:6, 7.
2. UJehova usebenzisa obani ukuze ancedise umuntu owenze isono esikhulu?
UJehova ukhuthaza umuntu owenze isono esikhulu ukuthi ‘abize abadala bebandla.’ (Bala uJakhobe 5:14, 15.) Abadala bayamthanda uJehova njalo bayazithanda lezimvu zakhe. Bafundisiwe ukuthi bangamncedisa njani umuntu onjalo ukuthi alungisise ubungane bakhe loJehova.—KwabaseGalathiya 6:1.
Abadala bamncedisa njani umuntu owenze isono esikhulu? Bayamqondisa besebenzisa iBhayibhili, bamcebise njalo bamkhuthaze ukuze angaphindi enze isono esifananayo. Lokhu kwenziwa ngabadala ababili loba abathathu. Okunye abangakwenza yikwekelisa lowomuntu ukwenza eminye imisebenzi yebandla okwesikhathi esithile aze alungisise ubungane bakhe loJehova. Kodwa nxa engazimiselanga ukuphenduka, abadala bayamsusa ebandleni ukuze bavikele ibandla.
GEBHA UJULE
Engxenyeni le uzabona ukuthi uJehova umncedisa njani umuntu owenze isono esikhulu.
3. Ukuvuma isono kwenza siphinde sibe ngabangane bakaJehova
Loba yisiphi isono umuntu asenzayo sizwisa uJehova ubuhlungu. Yikho kumele sivume izono zethu kuye. Bala iHubo 32:1-5 beselixoxa ngombuzo lo:
-
Kungani kuqakathekile ukuthi sivume izono zethu kuJehova?
Nxa sesisivumile isono sethu kuJehova, kumele sitshele labadala bebandla ukuze basincedise. Bukelani IVIDIYO beselixoxa ngombuzo olandelayo.
-
Abadala bamncedisa njani uCanon ukuthi aphinde abe ngumngane kaJehova?
Akumelanga sibafihlele lutho abadala ngoba bafuna ukusinceda. Bala uJakhobe 5:16 beselixoxa ngombuzo lo:
-
Kunceda ngani ukutshela abadala iqiniso?
UJehova uyamncedisa ngothando umuntu ovuma isono sakhe njalo atshele abadala iqiniso
4. Ukususa umuntu ongaphendukiyo kunceda ngani?
Nxa umuntu owenze isono esikhulu engafuni ukuphenduka akumelanga aqhubeke eyingxenye yebandla ngoba kafuni ukuphila ngendlela kaJehova. Umuntu onjalo uyasuswa ebandleni futhi kuyabe kungasamelanga sikhulume laye. Bala u-1 Khorinte 5:6, 11 lo-2 Johane 9-11 beselixoxa ngombuzo olandelayo:
-
Njengoba nje imvubelo ibilisa inhlama, ukuba lobudlelwano lesoni esingafuni ukuphenduka kuliphambanisa njani ibandla?
Ukususwa kubuhlungu sibili kodwa abanengi abasuswayo bacina bephendukile ebandleni. Lokhu kungenxa yokuthi ukususwa kubanceda babone ukuthi bebephambanise kangakanani. (IHubo 141:5) Bukelani IVIDIYO beselixoxa ngombuzo olandelayo.
-
Ukususwa kwamnceda njani uSibonile?
Ukususwa ebandleni . . .
-
kulidumisa njani ibizo likaJehova?
-
kutshengisani ngoJehova?
5. UJehova uyasithethelela nxa siphenduka okweqiniso
UJesu wasebenzisa umzekeliso osinceda sizwisise ukuthi uJehova uzwa njani nxa umuntu owonileyo ephenduka. Bala uLukha 15:1-7 beselixoxa ngombuzo lo:
-
Umzekeliso lo usifundisani ngoJehova?
Bala uHezekheli 33:11 beselixoxa ngombuzo olandelayo:
-
Kuyini okumele umuntu akwenze ukuze kukhanye ukuthi usephendukile?
UJehova usithanda ngendlela umalusi athanda ngayo izimvu zakhe
ABANYE BATHI: “Ngiyesaba ukutshela abadala ngesono sami ngoba ngingacina ngisusiwe.”
-
Ungamncedisa njani umuntu otshonjalo?
ISIFINQO
UJehova uzasithethelela nxa sizisola okweqiniso ngesono esisenzileyo futhi sizimisele ukungasiphindi.
Ufundeni?
-
Kusinceda ngani ukuvuma izono zethu kuJehova?
-
Kumele senzeni nxa sifuna ukuthi uJehova asithethelele?
-
Kungani kumele sitshele abadala nxa senze isono esikhulu?
THOLA OKUNENGI
Bukela ividiyo le ubone ukuthi eyinye indoda yakubona njani ukuthi uJehova uyathethelela njengoba kutshiwo ku-Isaya 1:18.
Bala isihloko lesi uzwe ukuthi ukususwa kumnceda njani umuntu owonileyo kanye lebandla lonke.
“Kungani Ukususa Ebandleni Kuyisenzo Esitshengisa Uthando?” (INqabayokulinda, April 15, 2015)
Bala isihloko lesi ukuze ubone ukuthi ungamchasisela njani umuntu ongasoFakazi indaba yokususwa ebandleni.
Bala isihloko esithi “Ngasengifuna Ukubuyela KuJehova” uzwe ukuthi eyinye indoda eyayisitshiye ukukhonza uJehova yenzani ukuze ibuyele kuye.
“IBhayibhili Liyamntshintsha Umuntu” (INqabayokulinda, April 1, 2012)
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
