MWAHA 57
Tiheeni Munaphwanelaanyu Weera Wakhala wi Moopaka Yoocheka Etokotoko?
Naamwi mmusivelaka Yehova mwawiiseela nave tho mwiilipixeryaka opaka yookhwela awe, ikwaha ikina, munanwerya ohesa. Nyenya soohesa ikina itokotoko opwaha ikina. (1 Korinto 6:9, 10) Wakhala wi moopaka yoocheka etokweene, muupuwele wi Yehova nivano onnoosivelaani. Owo onnachuna wookhurumuwelaani ni wookhaviheryaani.
1. Tiheeni nnaphwanelaahu weera wi Yehova anikhurumuwele?
Muchu yoowo onamusivela Yehova onnatepa othanana vaava onooneiye wi opaka yoocheka etokweene. Nyenya yoororomeliha yeeyo Yehova opankeiye wa achu awe ti yoohakararya: “Soocheka sanyu, nari iphilivinle ntoko nikhami, inamweelihiwa ntoko maralala.” (Isaiya 1:18) Wakhala wi noocharuwa ni murima woothene, Yehova onahaala onikhurumuwela. Nnooniherya hai ocharuwa? Wakhala wi noocharuwa mweeparipari, nnahaala ohiya weera yoonanara ni omveka Yehova wi anikhurumuwele. Voocharela, nnahaala wiilipixerya otoroka muupuwelo ni sookhovelela soonanara seiho saaneerinhe opaka yoocheka. Opwaha yeeyo, nnahaala wiilipixerya okhalaka mwawiiwanana ni yeeyo Yehova onaloceiye wi ti yaphaama.—Mwaalakhanye Isaiya 55:6, 7.
2. Ti mwawihai Yehova onaaphariheleiye atokweene wi enikhaviherye napaka yoocheka?
Wakhala wi noopaka yoocheka etokotoko, Yehova olonce wi ‘niwiichane asitokweene a mmulokoni.’ (Mwaalakhanye Tiyako 5:14, 15.) Atokweene annamusivela Yehova ni ipucepuche sawe. Awo annapharihela masuwelelo a Piipiliya aryaayano wi enikhaviherye olipiha onthamwene ahu wanaawiili.—Galasya 6:1.
Ti mwawihai asitokweene ananikhaviheryaaya wakhala wi noopaka yoocheka etokotoko? Asitokweene apiili naari araru enanwerya ompharihela Piipiliya wi enooniherye ntakhara heeni yeeyo nipankaahu eryaaya yoonanara. Nave tho awo anahaala onivaha sooleeliherya ni ikano inahaala onikhaviherya ohikookela opaka yoocheka. Akhweya awo anamoona okhala woochuneya wi nihipakeke makupa mmiteko mikina sa muloko variyari va elukuluku yammoori, ophiyerya nreherenrye makupa ahu oomunepani. Vano hanka wakhala wi muchu opaka yoocheka etokotoko nave ahicharuwa? Mmukhalelo yoowo, atokweene anahaala omwiikara mmulokoni muchu si yoowo wi ahaavolowele akina mmulokoni.
OHUSERYA MWAWIISEELA
Moone mukhalelo Yehova oneereiye anikhaviherye wakhala wi noopaka yoocheka etokotoko.
3. Ohikhuwa yoocheka onnanikhaviherya
Vaavaa nnachekaahu, ninnamuhiciha Yehova. Ti nthowa nene nnaphwanelaahu olokoha yoocheka ahu. Mwaalakhanye Salumu 32:1-5, nave voocharela muthokororye nikoho nla:
-
Ohiya weererya okhuwa yeeyo neenraahu, ntakhara heeni eryaaya yaphaama olokoha soocheka sahu wa Yehova?
Opwaha olokoha soocheka sahu wa Yehova, nnahaala tho okhala phaama wakhala wi nooveka nikhaviheryo wa atokweene. Moone EXILEMA, nave voocharela muthokororye nikoho nla.
-
Mu exilema, ti mwawihai atokweene yaamukhavihenryaaya Canon okookela wa Yehova?
Nnaphwanela okhala oororomeleya wa atokweene; awo anachuna onikhaviherya. Mwaalakhanye Tiyako 5:16, nave voocharela muthokororye nikoho nla:
-
Ntakhara heeni onnakhala wookhweya wa atokweene onikhaviherya wakhala wi nooloca eparipari wa yaawo?
Mulokohe yoocheka anyu, mukhale oororomeleya wa atokweene, nave mweemererye nikhaviheryo noosivela na Yehova
4. Wiikariwa mmulokoni nikhaviheryo na Yehova
Wakhala wi muchu opaka yoocheka etokweene nave anakhooca weera yeeyo Yehova onaloceiye wi ti yaphaama, hanaphwanela otitelela opaka makupa a muloko. Muchu owo onniikariwa mmulokoni, nave hiyaano ninnahiya olocano naari ochekula ni yoowo. Mwaalakhanye 1 Korinto 5:6, 11 ni 2 Yohani 9-11, nave voocharela muthokororye nikoho nla:
-
Leverina onnamururuvaliha tiriku oothene. Ti mwawihai okhala vamoha ni namacheka ohinacharuwa oneeraaya ovolowele muloko woothene?
Ancipale yaawo yiikariwe mmulokoni, ohoolo waya, yaakookela mmulokoni. Eyo enneereya nthowa nawi naamwi olaka waari wawiicela, waaheeriha wi awo ehuseryavo echu. (Salumu 141:5) Moone EXILEMA, nave voocharela muthokororye makoho ala:
-
Mu exilema, ti mwawiihai wiikariwa mmulokoni waamukhavihenryaaya Sonia?
Ti mwawiihai wiikariwa mmulokoni . . .
-
onacicimihaaya nsina na Yehova?
-
onooniheryaaya wi Yehova tawookololowa ni oosivela?
5. Yehova onnanikhurumuwela vaavaa nnacharuwaahu
Yesu aahipharihela niphwanaphwaniho nimoha nenlo nnanikhaviherya wiiwexexa ti mwawiihai Yehova onooneiye vaavaa muchu onacharuweiye. Mwaalakhanye Luka 15: 1-7, nave voocharela muthokororye nikoho nla:
-
Yoorepa ela enanihusiha eheeni vooloca sa Yehova?
Mwaalakhanye Ezekiyeli 33:11, nave voocharela muthokororye nikoho nla:
-
Tiheeni eri yoochuneya opaka wi nooniherye wi noocharuwa mweeparipari?
Hiiha ntoko mukukhula, Yehova onnakhapelela moopwacha ipuchepuche sawe
ACHU AKINA ANI: “Wakhala wi kohaaleela atokweene yeeyo kipankaaka, awo anahaala okiikara mmulokoni.”
-
Tiheeni mwaahaalaanyu omuleela muchu onuupuwela hiiha?
MUKWASU
Wakhala wi noopaka yoocheka etokweene, Yehova onanwerya onikhurumuwela. Wi ela yeereye, nnaphwanela ocharuwa ni murima woothene ni okhala oolakelela ohiya opaka yeeyo eri yoonanara.
Makoho awuuluulela
-
Ntakhara heeni eryaaya yaphaama olokoha soocheka sahu wa Yehova?
-
Tiheeni nnaphwanelaahu weera wi soocheka sahu sikhurumuweliwe?
-
Wakhala wi noopaka yoocheka etokweene, ntakhara heeni nnaphwanelaahu oveka nikhaviheryo na atokweene?
OTHOLATHOLA
Moone mukhalelo mulopwana mmoha oonneiye ikharari sa Yehova inalociwa mu Isaiya 1:18.
Ti mwawiihai wiikariwa mmulokoni onaakhaviheryaaya oothene avoloweliwe?
“Ntakhara Heeni Wiikariwa Mmulokoni Marehereryo Oosivela” (Mulipeleli a 15 a Apirili a 2015)
Moone mukhalelo munahaalaanyu omutharihela muchu yoowo ohiri Namoona a Yehova vooloca sa wiikariwa mmulokoni.
Mwaalakhanye yaweereya “Eu precisava voltar para Jeová,” wi moone ntakhara heeni mulopwana mmoha aahin’ye eparipari oonneiye wi Yehova aamukeriha wanaawiili wa yoowo.
“A Bíblia muda a vida das pessoas” (A Sentinela, 1.º de abril de 2012)
