Hewaʼae na no öʼomasiʼö Yehowa, ba sindruhu-ndruhu öforege enaʼö lö öfalua zi möi fangafökhö dödönia, hizaʼi itaria öfalua zala. So zala sabölö ebua moroi ba zala tanö böʼö. (1 Korindro 6:9, 10) Na no öfalua horö sebua, törö tödöu wa iʼomasiʼö nasa ndraʼugö Yehowa. Omasi ia iʼefaʼö zalamö ba itolo ndraʼugö.

1. Hadia zinangea tafalua enaʼö iʼefaʼö zalada Yehowa?

Abu sibai dödö niha sangomasiʼö Yehowa na no ifalua horö sebua. Hizaʼi terara dödönia na itörö tödönia mbuʼusa li Yehowa ba nono mbanuania: ”He no hulö ndro waʼoyo horömi, ba tobali afusi sibai hulö esi.” (Yesaya 1:18) Na sindruhu-ndruhu tafalalini gera-erada, hasambalö iʼefaʼö zalada Yehowa. Hewisa wangoromaʼöda wa no tafalalini gera-erada? Sindruhu-ndruhu taʼandrö waʼebolo dödönia ba zala si no tafalua ba taböhöli wamalua daʼö saʼae. Taʼandrö göi khö Yehowa enaʼö iʼefaʼö zalada. Aefa daʼö, taforege wolawa fangera-ngera hegöi si lö sökhi si toʼölö tafalua samarou yaʼita ba wamalua horö. Taʼodödögö göi woloʼö goi-goi satulö moroi khö Yehowa.—Baso Yesaya 55:6, 7.

2. Hewisa wangogunaʼö Yehowa ira satua sokubaloi ba wanolo yaʼita na no tafalua horö sebua?

Na no tafalua horö sebua, iʼandrö khöda Yehowa enaʼö ’taʼalui ndra satua sokubaloi ba mbanua niha Keriso’. (Baso Yakobo 5:14, 15.) Ira satua sokubaloi andre laʼomasiʼö Yehowa hegöi biri-birinia. No tebeʼe khöra wanuturu lala si tobali fanoloda enaʼö ifuli teʼatulöʼö wahuwusada khö Yehowa.—Galatia 6:1.

Hewisa ndra satua sokubaloi ba wanolo yaʼita na no tafalua horö sebua? So darua mazui datölu ndra satua sokubaloi, laʼogunaʼö ayati moroi ba Zura Niʼamoniʼö sangoromaʼö hadia mbörö wa fasala nifaluada andrö. Labeʼe göi wanuturu lala hegöi mene-mene enaʼö lö ifuli tafalua zala andrö. Te lahalö gangetula wa so ösa halöwö si tebai tafalua bakha ba mbanua niha Keriso irege no ifuli teʼabölöʼö ita ba wamati. Na so zamalua horö sebua si lö mamalalini era-era, laʼefasi ia ba mbanua niha Keriso ira satua sokubaloi enaʼö telumöʼö mbanua niha Keriso moroi ba gamuatania si lö sökhi andrö.

 ODÖDÖGÖ NASA WANGALUI

3. Moguna tafatunö horö si no tafalua

Gofu hadia horö nifaluada, möi fangafökhö dödö Yehowa daʼö. Börö daʼö, moguna tafatunö khönia horö si no tafalua. Baso Zinunö 32:1-5, ba beʼe wanema li ba wanofu daʼa:

• Na tafatunö khö Yehowa horö si no tafalua ba lö taforege waminiʼö horö andrö, hadia mbuania khöda?

 4. Moguna gamakhoita sanandrösa ba wangefasi

Na so zamalua horö sebua, ba lö omasi ia iʼoʼö goi-goi Yehowa, tebai saʼae tobali ia ösi nomo mbanua niha Keriso. Laʼefasi ia moroi ba mbanua niha Keriso ba tebai saʼae fahuhuo mazui fariawö ita khönia. Baso 1 Korindro 5:6, 11 hegöi 2 Yohane 9-11, ba beʼe wanema li ba wanofu daʼa:

• Hulö simane ragi nifaruka ba hamo darigu, hadia lua-luania na fariawö niha si lö mamalalini era-era ba mbanua niha Keriso?

 RAHU-RAHU WAMAHAʼÖ

Na no tafalua horö sebua, hizaʼi sindruhu-ndruhu maniasa ita ba tahalö gangetula wa lö saʼae tafalua zi lö sökhi andrö, hasambalö wa iʼefaʼö horöda Yehowa.

Hadia Wamahaʼö si Tola Öhalö?

• Hadia mbuania na tafatunö khö Yehowa horö si no tafalua?

• Hadia zinangea tafalua enaʼö teʼefaʼö horöda?

• Na no tafalua horö sebua, hadia mbörö wa taʼandrö wanolo khö ndra satua sokubaloi?