FAKAAKOAGA 57
Ka e kua ka Taute e Koe e Agahala Kelea Lahi?
Pete kua hokulo e fakaalofa haau ki a Iehova mo e eketaha a koe ke ua taute ha mena ke fakamamahi a ia, ka e falu magaaho to hehē a koe. Ka ko e falu agahala kua kelea lahi. (1 Korinito 6:9, 10) Ka taute e koe e agahala kelea lahi, manatu na fakaalofa agaia a Iehova ki a koe; kua makai a ia ke fakamagalo mo e lagomatai a koe.
1. Ko e heigoa kua lata a tautolu ke taute ke moua e fakamagaloaga ha Iehova?
Ko lautolu kua fakaalofa ki a Iehova kua momoko mooli he mailoga kua taute e lautolu e agahala kelea lahi. Ka e moua e lautolu e mafanatia he maveheaga ha Iehova ma e tau tagata haana: “Pete he tuga e ie kula ha mutolu a tau hala, to hina ia po ke kiona.” (Isaia 1:18) Ka fakatokihala mooli a tautolu, to fakamagalo katoatoa e Iehova a tautolu. Fakatokihala fēfē a tautolu? Ha kua tokihala lahi a tautolu, ko e mena ia to fakaoti e tau gahua kelea ha tautolu mo e olelalo ki a Iehova ke fakamagalo mai. Ti gahua fakalahi a tautolu ke hiki e tau manatu po ke tau aga hepe ne takitaki atu ke he agahala, mo e lali ke momoui fakatatau ke he tau tuaga meā ha Iehova.—Totou Isaia 55:6, 7.
2. Fakaaoga fēfē e Iehova e tau motua ke lagomatai a tautolu ka agahala?
Ka taute e tautolu e agahala kelea lahi, tala mai a Iehova ke “ui atu . . . ke he tau patu he ekalesia [po ke fakapotopotoaga].” (Totou Iakopo 5:14, 15.) Ko e tau tagata nei ne kotofa kua fakaalofa ki a Iehova mo e tau mamoe haana. Kua fakaako a lautolu ke lagomatai a tautolu ke liu moua e fakafetuiaga mo Iehova.—Kalatia 6:1.
Lagomatai fēfē he tau motua a tautolu ka taute e agahala kelea lahi? Tokoua po ke tokotolu e motua ka fakahako a tautolu he fakaaoga e fakatonuaga he Tohi Tapu. To tala mai foki e lautolu e tau puhala aoga mo e tomatomaaga ke lagomatai a tautolu ke ua liu agahala. Liga fai magaaho he fakakaupā ai e lautolu e falu matagahua Kerisiano ato liu a tautolu ke malolō fakaagaaga. Ke puipui e fakapotopotoaga mai he tau fakaohoohoaga kelea, tuku ki tua he tau motua e tagata ne taute e tau agahala kelea lahi ti nakai fakatokihala.
KUMIKUMI FAKAHOKULO
Fakahokulo e loto fakaaue ke he lagomatai ha Iehova ki a tautolu ka taute e tautolu e agahala kelea lahi.
3. Lagomatai ki a tautolu ke talahau e agahala
Ko e agahala ne taute e tautolu kua fakamamahi a Iehova, ti latatonu ke tala age ki a ia. Totou Salamo 32:1-5, ti tutala ke he hūhū nei:
-
Ko e ha kua mitaki ma tautolu ke talahau e tau agahala ki a Iehova ka e nakai lali ke fufū ai?
Lafi ke he talahau e tau agahala ha tautolu ki a Iehova, fakatotoka foki a tautolu he kumi e lagomatai mai he tau motua. Tā e VITIŌ, ti tutala ke he hūhū nā.
-
He vitiō, lagomatai fēfē he tau motua a Canon ke liu ki a Iehova?
Lata a tautolu ke atāina mo e tutala fakamooli ke he tau motua; ha ko lautolu haia ke lagomatai a tautolu. Totou Iakopo 5:16, ti tutala ke he hūhū nei:
-
Ko e ha kua mukamuka e tau motua ke lagomatai a tautolu ka tutala fakamooli ki a lautolu?
Talahau e agahala haau, tutala fakamooli ke he tau motua, mo e talia e lagomatai fakaalofa ha Iehova
4. Puhala kua lagomatai e tuku ki tua
Kaeke ke nakai talia he tagata ne taute e agahala kelea lahi e tau tuaga ha Iehova, to nakai fakaatā a ia ke fai vala he fakapotopotoaga. Tuku a ia ki tua, ti nakai lafi po ke nakai tutala foki a tautolu ki a ia. Totou 1 Korinito 5:6, 11 mo e 2 Ioane 9-11, ti tutala ke he hūhū nei:
-
Tuga e mena fakaea ke ea e falaoa, lauia fēfē e fakapotopotoaga he lafi mo e tagata agahala ne nakai fakatokihala?
Tokologa ne tuku ki tua kua liliu mai he magaaho fakamui ke he fakapotopotoaga ha ko e akonaki, pete he mamahi ka kua mailoga e lautolu e hehē ha lautolu. (Salamo 141:5) Tā e VITIŌ, ti tutala ke he hūhū nā.
-
He vitiō, lagomatai fēfē ki a Sonja he tuku ki tua?
Maeke fēfē e fakatokaaga ke tuku ki tua . . .
-
ke fakalilifu e higoa ha Iehova?
-
ke fakakite kua tonu mo e fakaalofa a Iehova?
5. Fakamagalo e Iehova a tautolu ka fakatokihala
Fakaaoga e Iesu e fakataiaga ke lagomatai a tautolu ke maama e logonaaga ha Iehova ka fakatokihala e tagata. Totou Luka 15:1-7, ti tutala ke he hūhū nei:
-
Ko e heigoa he mena nei ne fakaako ki a koe hagaao ki a Iehova?
Totou Esekielu 33:11, ti tutala ke he hūhū nei:
-
Ko e heigoa e lakaaga aoga kua putoia he fakatokihala?
Tuga e leveki mamoe, hokulo e levekiaga ha Iehova ke he tau mamoe haana
PEHĒ FALU TAGATA: “Matakutaku au ke tala age e agahala haaku ke he tau motua neke tuku au ki tua.”
-
Ko e heigoa haau ka talahau ke he tagata kua logona pihia?
MANATU KATOA
Ka taute e tautolu e agahala kelea lahi ka e fakatokihala mooli mo e fakamakamaka ke ua liu ke taute e hehē, to fakamagalo e Iehova a tautolu.
Liu Fakamanatu
-
Ko e ha kua mitaki ma tautolu ke talahau e tau agahala ki a Iehova?
-
Ko e heigoa ha tautolu kua lata ke taute ke fakamagalo e tau agahala ha tautolu?
-
Ka taute e tautolu e agahala kelea lahi, ko e ha kua lata a tautolu ke kumi lagomatai mai he tau motua?
KUMI FOKI
Kitia e puhala ne logona he taha tagata e fakaalofa noa ha Iehova ne fakamaama he Isaia 1:18.
Aoga fēfē e tuku ki tua ki a lautolu oti kua putoia ai?
“Kakano ko e Foakiaga Fakaalofa e Tuku ki Tua” (Ko e Kolo Toko, Me 15, 2015)
Iloa e puhala ke fakamaama e tuku ki tua ke he tagata ne nakai ko e Fakamoli a Iehova.
He tala “Lata Au ke Liu ki a Iehova,” iloa e kakano he tagata ne tafea kehe he kupu mooli ne logona kua futia mai e Iehova.
“Hiki he Tohi Tapu e Tau Momoui” (Ko e Kolo Toko, Aperila-Iuni 2012)
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
