Mboo paʼ o lôôn mbou nkouŋo Jéova tèʼ, mbing ntra lé gʉo choum sié é té yaŋa wô, ngouo o gʉa tso fʉʼ éfʉa no. Taʼ, tso méfʉa pou mbat ntchʉa métso (1 Korénto 6:9, 10). O lôôn fʉa no tépong yié a pou mbat tèʼ, o pôôn lé kouang ngié Jéova té ying nkouŋo wou wô; a né nkouŋo lé légé méfʉa mou mbing nkuiété wou.

1. Ta ngouo o gʉo lékô ta Jéova légé méfʉa mou?

Pʉa pié po kouŋo Jéova pou mmʉagté tèʼ afʉʼ yié po gʉoo no tépong yié a pou mbʉag. Taʼ, yôôn no yié Jéova la pʉé mbwo pʉa pé pou suiété létʉm sôb: «A lôôn ngouo yié méfʉa mi pang po lékô, mba é gé gʉo kouaʼ fôg paʼ méwui la» (Ésaya 1:18). Pégé lôôn mbou nkoubé ma wégé, mba Jéova gé pou tchousé wégé. Ayèe tchʉaté lékô? Ana paʼ pégé chʉéchʉé mmʉôgté mmo yié pégé gʉoo, nzaʼa lé ying ngʉo, mbing suingté Jéova ngié a tchousé wégé. Mbôônté, pégé léen nké saʼ tʉ lé waʼ ménkouaŋa laa méma tépong mié é la tsoté wégé lé fʉa no, mbing tra lé ying paʼ mbʉʉ Jéova né nzaté (toŋo Ésaya 55:6, 7).

2. Jéova yousé mélhié lékô lé lôg nkuiété wégé fʉʼ yié pégé fʉaa no?

Jéova gôôn né gning wuié a gʉoo no tépong yié a pou mbat tèʼ ngié «a tong mélhié tsèe tchouʼté pʉa Kristo» (toŋo Jag 5:14, 15). Mélhié kouŋo Jéova laa ménjʉnjʉo pé. Po gwiée méma mié é né nzaté lé lôg nkuiété gning wuié a fʉaa no lé ying ngwiée ntémté lé Jéova (Galatia 6:1).

Mélhié gʉo lékô ta nkuiété taʼ Kréeté wuié a gʉoo no tépong yié a pou mbʉag tèʼ? Mélhié mémbʉa ka ménta wô kuiété yé lé jouʼ ngié mmo yié a gʉoo pat. Po ying nnaa yé méntʉôgô mié é gé kuiété yé ta a lé ying fʉa yèe no wô. Ngouo po zaʼa lé ying nna tso méfaʼ tsèe tchouʼté mbwo yé lé lôg nzuiʼté fʉʼ yié a gé suiété na chʉo wé zuigé. Taʼ Kréeté lôôn ngʉo no tépong yié a pou mbat tèʼ, ndʉʼʉ lé koubé ma wé, mba mélhié gé kuilé yé tsèe tchouʼté lé lôg mbôônté tchouʼté na tsuié tépong.

 YING NKUIʼI NZIʼI

3. Gning zuing méno tépong mé péʼé, a kuiété yé lé zéŋé

Pégé gʉo no tépong péʼé, ayèe pou ngiaŋa Jéova tèʼ. Aa yèe ta pégé gwiée lé kièʼté chouŋo yé. Toŋo Zôbô ntsé 32:1-5, mbing ngôôn no na yôôn nzaté:

• Nti kô aa mbong lé gôôn méno tépong mégé mbwo Jéova ntchʉa lé tra lé lʉoon?

 4. Ngouo lékuilé gning wuié a gʉoo no tépong yié a pou mbat tèʼ tsèe tchouʼté kuiété lékô?

Gning lôôn ngʉo no tépong yié a pou mbʉag tèʼ, ndʉʼʉ lé yiŋé na mémbʉʉ Jéova, mba ngouo mé lé gniè yé tsèe tchouʼté wô. Mé gé kuilé yé tsèe tchouʼté, mé té gé ying gouôté yé wô, éké lé ying ngôôn no né yé wô. Toŋo 1 Korénto 5:6, 11 po 2 Jang 9-11, mbing ngôôn no na môôn ménzaté:

• Akô tchʉaté fʉʼ yié mé néŋé lévuur tsèe farine? Gning wuié a gʉoo no tépong yié a pou mbʉag tèʼ, ndʉʼʉ lé koubé, ngouo a lôg mèe méngégé ntoo tsèe tchouʼté?

 TA O ZIʼII KÔ?

Pégé lôôn ngʉo no tépong yié a pou mbʉag tèʼ, nkouaʼ mmʉagté mbing chan paʼ yié pégé té ying ngʉo wô, mba Jéova gé tchousé wégé.

Ta o né nkimté?

• Aa mbong lé gôôn méno tépong mié pégé gʉoo mbwo Jéova nti kô?

• Pégé gwiée lé gʉo lékô ta Ssé tchousé méfʉa mégé?

• Pégé lôôn ngʉo no tépong yié a pou mbat, mba pégé gwiée lé louô nkuiété mélhié nti kô?