MUTU 57
Kansi mukachita chimo ikulu mufunika kuchita tyani?
Olo kuti mukonda Yehova ndipo muyeja-yeja kupewa kuchita vinthu vingamukhumudwise, nthawe ziyakine mungaphoniyeshe vinthu viyakine. Komalomba machimo ayakine onkhala akulu kupambana ayakine. (1 Akorinto 6:9, 10) Mfundo ikulu ya mutu uno ni kuwona mwamene Yehova mwakufunila kukhululuka nothandiza munthu wachimwa. Keno mwachita chimo ikulu osataya ntima ndipo osaluŵa kuti Yehova aliyeleke kukukondani.
1. Kansi tufunika kuchita chinji kuti Yehova atikhululukile?
Ŵanthu okonda Yehova akumvwa chisoni ngako akaziŵa kuti achita chimo ikulu. Koma olo n’tetyo Yehova oŵatonthoja na lonjezo yakuti: “Olo machimo ŵanu ankhale asweta ngako, azatuŵe ngako.” (Yesaya 1:18) Tikalapa kufumila pansi pa ntima, Yehova okumbukilalinisoti machimo ŵasu ndipo otikhululukila na ntima wonse. Lomba tuwonesha tyani kuti talapa? Tulimvwila chisoni ngako chifukwa cha vatachita, tuviwelejelalinisoti, pavuli pake tusenga Yehova kuti atikhululukile. Komasoti tuchita khama kuti tileke olo kuganizila vinthu viipa vamene vichitisha kuti tichite chimo, kuyangijila pamene apa, tuyeja-yeja kukonkheja mfundo za Yehova za minkhalidwe iweme pa moyo wasu.—Ŵelengani Yesaya 55:6, 7.
2. Kansi Yehova okatishila ntchito tyani akulu kuti atiyavye tikachimwa?
Tikachita chimo ikulu Yehova otiuja kuti “tiite akulu a mpingo.” (Ŵelengani Yakobo 5:14, 15.) Akulu amene aŵa okonda Yehova na mbelele zake. Ove ophunzisiwa bwino mwangatiyavyile nacholinga chakuti tinkhalesoti paushamwali uweme na Yehova.—Agalatiya 6:1.
Kansi akulu otiyavya tyani tikachita chimo ikulu? Akulu aŵili olo atatu okatishila ntchito mfundo za m’Malemba potiyavya kuziŵa kuti vatachita ni viipa. Ove otipasa malangizo notilimbikisa na cholinga chotiyavya kuti tipewe kuzachitasoti chimo yamene iyo. Ove angatiuje kuti tileke kuchita vinthu viyakine mu mpingo kwa kanthawe mpaka pamene ushamwali wasu na Yehova paungayambesoti kutang’a. Pofuna kuteteza mpingo kuti unkhale utuŵa, akulu ochosa mu mpingo munthu wamene wachita chimo ikulu koma owoneshalini ntima wolapa.
VATI TIPHUNZILE
Tiwone vatingachite kuti tikotembeja vakutichitila Yehova potiyavya tikachita chimo ikulu.
3. Kuulula machimo ŵasu kutiyavya kuti tinkhalesoti paushamwali na Yehova
Tikachita chimo iliyonse Yehova okhumudwa, tetyo tingachite bwino kuulula kuli yove. Ŵelengani Salimo 32:1–5, ndipo pavuli pake mukambilane konsho iyi:
-
Ndaŵa yanji tufunika kuulula machimo ŵasu kwa Yehova mmalo momubisila?
Tikaulula machimo ŵasu kwa Yehova tufunikasoti kuuja akulu ndipo kuchita vamene ivi kuyavya kuti vinthu viyambesoti kutiyendela bwino. Lolelani VIDIYO, ndipo pavuli pake mukambilane konsho iyi.
-
Monga mwatawonela mu vidiyo, kansi akulu emuyavya tyani Canon kuti ajokele kwa Yehova?
Tikomasuka patufotokozela akulu za chimo yasu ndipo tikoŵauja vachendi veka-veka, ndaŵa ove ofuna kutiyavya. Ŵelengani Yakobo 5:16, ndipo pavuli pake mukambilane konsho iyi:
-
Ndaŵa yanji akulu ovutikalini kutiyavya tikoŵauja vachendi veka-veka vokhuza chimo yasu?
Ululani chimo yanu, nkhalani owona ntima kuli akulu ndipo londelani thandizo yachikondi ya Yehova
4. Kansi kuchosa munthu wosalapa mu mpingo kuli na ubwino wotyani?
Keno munthu wachita chimo ikulu koma ofunalini kulapa komasoti kukonkheja mfundo za m’Malemba ofunikalini kunkhala mu mpingo. Vikaŵa tetyo munthu wamene uyo ochosewa mu mpingo ndipo tufunikalini kutandala naye olo kulaŵijana naye. Ŵelengani 1 Akorinto 5:6, 11 na 2 Yohane 9-11, ndipo pavuli pake mukambilane konsho iyi:
-
Monga mwayuchitila isiti kufufumisha fulawu yakanyiwa, kansi kutandala na munthu wachita chimo wamene aliye lape kungakhuze tyani mpingo wonse?
Ŵanthu anyinji amene enze echosewa mu mpingo ejokelasoti chifukwa cha chilango chenze epasiwa, olo kuti chilango chamene icho chenze choŵaŵa, chiŵayavya kuziŵa kuti venze echita venze viipa ngako. (Salimo 141:5) Lolelani VIDIYO, ndipo pavuli pake mukambilane konsho iyi.
-
Monga mwatawonela muvidiyo iyi, kansi kuchosewa mu mpingo kwimuyavya tyani Sonja?
Kansi kuchosa munthu wosalapa mu mpingo . . .
-
kulemekeza tyani zina ya Yehova?
-
kuwonesha tyani kuti Yehova ni wachilungamo komasoti wachikondi?
5. Yehova okhululukila munthu wamene walapa
Yesu ekatishila ntchito fanizo yamene yutiyavya kumvwisha mwakumvwila Yehova munthu wochimwa akalapa. Ŵelengani Luka 15:1–7, ndipo pavuli pake mukambilane konsho iyi:
-
Kansi fanizo yamene iyi yukuphunzisani chinji za Yehova?
Ŵelengani Ezekieli 33:11, ndipo pavuli pake mukambilane konsho iyi:
-
Kansi munthu ofunika kuchita chinji kuti awoneshe kuti walapa?
Molingana na chiŵeta, Yehova osamalila ngako mbelele zake
ŴANTHU AYAKINE ONENA KUTI: “Nuyopa kuti nikaulula chimo yangu kuli akulu anichose mu mpingo.”
-
Kansi munthu wamene ali na maganizo oteti mungamuyavye tyani?
MFUNDO ZACHIDULE
Keno munthu wachita chimo ikulu nolapa kufumila pansi pa ntima komasoti wasimikijila mu ntima kuti azachitelinisoti chimo yamene iyo, Yehova omukhululukila.
Makonsho oweleja
-
Ndaŵa yanji tufunika kuulula machimo ŵasu kwa Yehova?
-
Kansi tufunika kuchita chinji kuti Yehova atikhululukile machimo ŵasu?
-
Keno tachita chimo ikulu, ndaŵa yanji tufunika kusenga akulu kuti atiyavye?
PHUNZILANI VINYINJI
Onani mwechiwoneshela Yehova chifundo chutomolewa pa Yesaya 1:18 kuli munthu muyakine.
Kansi kuchosa munthu wosalapa kumuyavya tyani munthu wamene uyo komasoti ŵanthu ayakine mu mpingo?
“Kuchosa ŵanthu osalapa kuyavya” (Nsanja ya Olonda, 15 April, 2015)
Onani mwamungafotokozele munthu wamene ni Mbonilini chifukwa chake nthawe ziyakine munthu ochosewa mu mpingo.
“Kansi mupewa ŵanthu amene kale enze m’chipembezo chanu?” (Nkhani yapa webisaiti)
Mu nkhani yakuti “Niziŵa kuti nufunika kujokela kwa Yehova,” onani chifukwa chake munthu muyakine ewona kuti Yehova wamuyavya kujokela kuli yove.
“Baibolo yuchinja moyo wa ŵanthu” (Nsanja ya Olonda, 1 April, 2012)
