Le ge o rata Jehofa kudu, e bile o šoma ka thata gore o se ke wa mo kweša bohloko, ka dinako tše dingwe o tlo fela o dira diphošo. Eupša diphošo tše dingwe ke tše dikgolo go feta tše dingwe. (1 Bakorinthe 6:​9, 10) Bjale ge o ka dira sebe se segolo, dula o gopola gore Jehofa o sa go rata e bile o nyaka go go lebalela le go go thuša.

1. Re swanetše go dira eng gore Jehofa a re lebalele?

Batho bao ba ratago Jehofa ba kwa bohloko kudu ge ba dirile sebe se segolo. Eupša Jehofa o ba kgothatša kudu ka mantšu ao a kilego a botša batho ba gagwe a gore: “Le ge dibe tša lena di ka hwibila go etša madi, di tla šweufala go etša kapoko.” (Jesaya 1:​18) Ge e ba re itshola go tšwa pelong, Jehofa o tlo re lebalela. Re bontšha bjang gore re a itshola? Re bontšha gore re tloga re itshola ge e ba re e kwa bohloko ka phošo yeo re dirilego, re e tlogela e bile re kgopela gore Jehofa a re lebalele. Le gona, re šoma ka thata gore re tlogele go nagana dilo tše mpe goba mekgwa yeo e re dirišitšego sebe. Ke moka ra leka ka thata gore re phele ka melao ya Jehofa.​—Bala Jesaya 55:​6, 7.

2. Jehofa o diriša bagolo bjang gore ba re thuše ge re dirile sebe?

Jehofa o re ge re dirile sebe se segolo, “[re] bitše bagolo ba phuthego.” (Bala Jakobo 5:​14, 15.) Bagolo ba, ba rata Jehofa le batho bao ba mo hlankelago. Jehofa o ba rutile gore ba kgone go re thuša go lokiša segwera sa rena le yena.​—Bagalatia 6:1.

Bagolo ba re thuša bjang ge re dirile sebe se segolo? Bagolo ba babedi goba ba bararo, ba tlo diriša mangwalo a ka Beibeleng go re thuša go bona gore selo seo re se dirilego ke phošo. Le gona ba tlo re kgothatša, ba ba ba re botša dilo tšeo di ka re thušago gore re se sa dira sebe seo gape. Ba ka re botša le gore re se sa dira dilo tše itšego ka phuthegong, go ba go fihlela segwera sa rena le Jehofa se boetše sekeng. Ge e ba motho yoo a dirilego sebe se segolo a sa itshole, bagolo ba tlo mo kgaola goba ba mo ntšha ka phuthegong, e le gore a se ke a fetetša ba bangwe ka phuthegong ka mekgwa ya gagwe e mebe.

 ITHUTE KA MO GO TSENELETŠEGO

3. Ge re ipobola dibe tša rena, segwera sa rena le Jehofa se tlo boela sekeng

Sebe se sengwe le se sengwe seo re se dirago se kweša Jehofa bohloko, ka gona re dira gabotse ge re mmotša gore re dirile sebe. Balang Psalme 32:​1-5, gomme le boledišaneng ka potšišo e latelago:

• Ke ka baka la’ng re swanetše go botša Jehofa dibe tša rena go e na le go leka go di uta?

 4. Go na le mehola efe ge motho a kgaolwa?

Ge motho yoo a dirilego sebe se segolo a gana go phela ka melao ya Jehofa o a kgaolwa, gomme a se sa ba karolo ya phuthego. Ga re sa phela le yena, e bile ga re mmolediše. Balang 1 Bakorinthe 5:​6, 11 le 2 Johane 9-11, gomme le boledišaneng ka potšišo e latelago:

• Go no swana le ge komelo goba yeast e bidiša hlama (dough), ge e ba motho yo a sa itsholego e sa le karolo ya phuthego a ka feleletša a dirile gore go be bjang ka phuthegong?

 O ITHUTILE ENG?

Ge e ba re dirile sebe se segolo eupša re tloga re itshola e bile re nyaka go tlogela go dira dilo tše mpe, Jehofa o tlo re lebalela.

Dipotšišo

• Ke ka baka la’ng re swanetše go ipobola dibe tša rena go Jehofa?

• Re swanetše go dira’ng gore Jehofa a re lebalele?

• Ge e ba re dirile sebe se segolo, ke ka baka la’ng re swanetše go ya go bagolo gore ba re thuše?