ELONGESO 57
Ine Pahe Ulinga Onkhali ku Huku?
Ove uhole unene Siovaa, kuhande okulinga otyipuka natyike matyimunumanesa, ine hatyo? Mahi pamwe upondola okuponyona okwate onkhali ku Huku. Pena ononkhali mbumwe ononene vali ko nonkhuavo. (1 Ova Kolindu 6:9, 10) Ine ulinga onkhali ononene, wahasoke okuti pahe ngotyo ku Siovaa kusilivila vali. Siovaa mekuevela, ekukuatesako ukale vali nawa.
1. Oityi tuna okulinga opo Siovaa etuevele?
Omunthu uhole Siovaa, unumana unene tyina amamono okuti walinga onkhali onene ku Huku. Mahi Siovaa wapopia onondaka ombu mbupameka mbati: “Namphila ononkhali mbenyi mbakuhuka unene ngotyinyanga otyinkhuhu, mambulingwa ononthuelu ambutundu too.” (Isaías 1:18) Naina, ine tyili tulivela umwe, Siovaa utupolela-po. Mahi omunthu ulivela ñgeni-ale? Omunthu tyina elivela umwe, uyekapo okulinga otyivi, elifefe ku Siovaa emupolele-po. Uliyunga umwe kovipuka aviho vipondola okumulingisisa vali onkhali, elikuatehila alinge etyi Siovaa apopia. — Tanga Isaías 55:6, 7.
2. Oñgeni Siovaa etukuatesako novakulu vewaneno?
Siovaa wapopia okuti ine tukwata onkhali, tuna ‘okuihana ovakulu vewaneno.’ (Tanga Tiaku 5:14, 15.) Ovakulu vewaneno vehole Siovaa, tupu vehole ovanthu aveho mewaneno. Ngwe valongesiwa etyi vena okulinga vakuateseko omunthu wakwata onkhali, akale vali epanga lya Siovaa. — Ova Galata 6:1.
Oñgeni ovakulu vewaneno vetukuatesako tyina tuamalingi onkhali? Ovakulu vewaneno vevali oo vetatu, mavatomphola no onthwe vetulekese mo Mbimbiliya omokonda yatyi etyi tualinga tyapengela unene. Mavetupopila ovipuka vimwe tupondola okulinga opo onkhali tueheiwane vali. Pamwe vapondola avetupolo ovilinga vimwe, atee vamona okuti pahe tukahi nawa moupanga wetu na Huku. Mahi ine omunthu umwe walinga onkhali onene, mahi ehelivele, kwe ngoti utupu-ale etyi alinga, opo una okupolwa mewaneno ahalingise vakuavo.
KUHANDE OKUNOÑGONOKA VALI?
Monoñgonoka oñgeni Siovaa etukuatesako tyina tuamalingi onkhali.
3. Tyina tuamapopi onkhali tualinga, tukala vali nawa
Tyina tualinga onkhali, ngotyo tuanumanesa Siovaa. Otyo tuesukisila okulipopia kwe. Tangei Salmo 32:1-5, amutomphola epulo eli:
-
Oityi tuna okupopila onkhali tualinga ku Siovaa, atueheiholeka?
Tyina tuamapopi onkhali tualinga ku Siovaa, opo tutule umwe omutima, tupu tuna okukeipopila ovakulu vewaneno. Talei OVIDIU, amutomphola epulo eli:
-
Oñgeni ovakulu vewaneno vakuatesako Canon akala vali epanga lya Siovaa?
Mokonda ovakulu vewaneno vahanda umwe vala okutukuatesako, tyina tuya pokuvepopila onkhali tualinga, tuna umwe okupopia otyili. Tangei Tiaku 5:16, amutomphola epulo eli:
-
Tyina usoka, okuti ovakulu vewaneno matyivepepukila okutukuatesako ine tuvepopila otyili, atupopi umwe atyiho tualinga?
(1) Popila Siovaa etyi walinga; (2) Popila ovakulu vewaneno atyiho walinga; (3) Tavela tyina Siovaa ekukuatesako
4. Omunthu okupolwa mewaneno tyimukuatesako
Ine omunthu walinga onkhali, ehesuku netyi alinga, aanye okulinga etyi Siovaa apopia, opo kapondola vali okukala mewaneno. Una okupolwa mewaneno, iya onthwe katupondola vali okukala nae nii okupopia nae. Tangei 1 Ova Kolindu 5:6, 11 na 2 Suau 9-11, amutomphola epulo eli:
-
Onthwe tutyii umwe okuti enthapi enyingi litutumukiswa vala nonkhiso yehehi. Pahe okusoka ku otyo, oñgeni omunthu wakwata onkhali otyo ehelivele, apondola okukalesa vakuavo mewaneno?
Ovanthu ovanyingi vapolelwe mewaneno pahe vakondoka, vapopia okuti vanumanene unene etyi vapolwa mewaneno. Mahi tupu vapopia okuti ine hakwapolelwe mewaneno, ñgeno kavetyimuene okuti etyi valinga tyapenga unene. (Salmo 141:5) Talei OVIDIU, amutomphola epulo eli:
-
Oñgeni okuapolwa mewaneno tyakuatesako omuhikuena tuamona movidiu?
Oñgeni okupola omunthu mewaneno tyilekesa okuti . . .
-
tuna onthilo nenyina lya Siovaa?
-
Siovaa kayekelela ovivi, mahi otyo tupu ehole ovanthu?
5. Siovaa weevela omunthu welivela
Sesusi wapopile tyimwe tunoñgonoke oñgeni Siovaa akala tyina tuamalingi onkhali pahe atulivele. Tangei Luka 15:1-7, amutomphola epulo eli:
-
Otesitu ei tuatanga, yekulongesa okuti Siovaa ukahi ñgeni?
Tangei Ezequiel 33:11, amutomphola epulo eli:
-
Oityi tyilinga omunthu vokuelivela umwe tyotyotyili?
Siovaa uhole onongi mbae, ngetyi omunthita esuka novipako viae
OVANTHU VAMWE VATI: “Ine ndyityipopila ovakulu vewaneno okuti nalinga onkhali, mavampholo mewaneno.”
-
Omunthu ngo oo, ñgeno wemutiwi ahasoke vali ngotyo?
ETYI WELILONGESA
Welilongesa okuti ine tukwata onkhali, mahi atulivele, atulikuatehila tuehetyipalaike vali, Siovaa utuevela.
Okupitulula
-
Oityi tyahandela okupopila Siovaa onkhali tualinga?
-
Oityi tuesukisa okulinga opo Siovaa etuevele ononkhali tulinga?
-
Ine tualinga onkhali, oityi tuesukisila okukapopia novakulu vewaneno?
KUHANDE OKUOVOLA VALI?
Ovidiu ei, ipopia oñgeni Siovaa apolela-po omukulu ou, ngetyi umwe apopia mu Isaías 1:18.
Onthele ei, ipopia oñgeni okupola omunthu mewaneno tyikuatesako ewaneno aliho, nomunthu watyo walinga onkhali ehelivele?
“Omokonda Yatyi Okupolwa Mewaneno Otyilekeso Tyoluembia” (Omutala Womulavi 15 ya Maio yo 2015)
Pahe ine omunthu umwe Wehembangi ukupula oityi ovanthu vamwe vapolelwa mewaneno, momutiwi? Onthele ei ityipopia.
“Okuti Onombangi mba Siovaa Kavapopi Vali Novanthu Vali Vongeleya Yavo?” (Mo jw.org)
Omukulu ou wayekelepo Siovaa, mahi pahe elivele akondoka. Wati: Siovaa wandyeta vali Kwe. Tanga onthele ei yokuati: “Ankho Ndyityii Umwe Okuti Ndyina Okukondoka ku Siovaa.”
“Ombimbiliya Ipilulula Omuenyo Wovanthu” (onthele Yomutala Womulavi)
