EISHOMO 57
Oine Kutwaza Ota Waakora Ekibi ky’Amaani?
N’obu oraabe nookunda Yehova kandi orikuteeraho kwetantara ekintu kyona ekirikumugwisa kubi, obumwe noobaasa kukora ekibi. Kwonka, ebibi ebimwe n’eby’amaani kukira ebindi. (1 Abakorinso 6:9, 10) Waakora ekibi ky’amaani, ijuka ngu Yehova tarikurekyera aho kukukunda, naaba ayeteekateekire kukusaasira n’okukuhwera.
1. Twine kukora ki Yehova kubaasa kutusaasira?
Abarikukunda Yehova nibagira enaku nyingi baakora ekibi ky’amaani. Kwonka eki Yehova yaaraganiise abantu be nikihuumuriza. Akagira ati: ‘Ebibi byanyu n’obu biraabe nibitukura nka karari, nibiija kwera nk’orubaare.’ (Isaaya 1:18) Omuntu yaayeteisiza kimwe ayihire aha mutima, Yehova naamusaasirira kimwe. Omuntu naayeteisa ata? Naayehurira kubi ahabw’ekibi eki akozire, arekyera aho kukikora, reero ayeshengyereza Yehova kumusaasira. Naakora n’amaani kuhindura emiteekateekyere ye egwire nari emize emureeteire kukora ekibi, kandi naateeraho kuguma naagyendera aha mitindo ya Yehova eshemeire.—Shoma Isaaya 55:6, 7.
2. Yehova naakoresa ata abareeberezi kuhwera okozire ekibi?
Yehova naagira ngu omuntu yaakora ekibi ky’amaani, aine kweta abareeberezi b’ekibiina. (Shoma Yakobo 5:14, 15.) Abashaija aba abatoorainwe nibakunda Yehova n’entaama ze. Baine byona ebirikwetengyesa kuhwera omuntu kugaruraho omukago gwe na Yehova.—Abagalatia 6:1.
Abareeberezi nibahwera bata omuntu yaakora ekibi ky’amaani? Abareeberezi babiri nari bashatu nibamuhana barikukoresa Ebyahandiikirwe. Kandi nibamuha n’obuhabuzi oburikubaasa kumuhwera kutagaruka kukora ekibi. Nibabaasa kutuubya aha buheereza bwe bw’Ekikristaayo obu arikwejumbamu, kuhitsya yaakirira kimwe omu by’omwoyo. Abareeberezi kubaasa kurinda ekibiina kutasiisikara, nibabinga omuntu orikukora ekibi ky’amaani kwonka akanga kweteisa.
SHWIJUMA GYE
Yongyera kwetegyereza oku Yehova arikuhwera omuntu yaakora ekibi ky’amaani.
3. Okwatura ekibi nikihwera omusiisi kukira
Buri kibi eki omuntu arikukora nikigwisa kubi Yehova, n’ahabw’ekyo naaba aine kukimwaturira. Shoma Zaaburi 32:1-5, kubaasa kugarukamu ekibuuzo eki:
-
Ahabw’enki ni kirungi kwaturira Yehova ekibi omu mwanya gw’okuteeraho kukishereka?
Okwongyera aha kwaturira Yehova ekibi, omuntu naatunga oburuhuuko yaashaba abareeberezi obuhwezi. Zaana VIDIYO, kubaasa kugarukamu ekibuuzo ekirikukurataho.
-
Omu vidiyo, abareeberezi bakahwera bata Canon kugarukira Yehova?
Twine kuba ab’amazima kandi tukagambira abareeberezi tutarikubashereka, ahakuba bateirweho kutuhwera. Shoma Yakobo 5:16, kubaasa kugarukamu ekibuuzo eki:
-
Ahabw’enki okozire ekibi yaagambira abareeberezi amazima nikiboorobera kumuhwera?
Yatura ekibi kyawe, gambira abareeberezi amazima goona, kandi ikiriza obuhwezi bwa Yehova obwa rukundo
4. Oku okubingwa omu kibiina kirikuhwera
Omuntu okozire ekibi ky’amaani yaayanga kukuratira emitindo ya Yehova, tarikubaasa kuguma omu kibiina. Naabingwa, kandi titurikukwatanisa nawe n’obu kwakuba okugamba nawe. Shoma 1 Abakorinso 5:6, 11 na 2 Yohaana 9-11, kubaasa kugarukamu ekibuuzo eki:
-
Nk’oku ekitumbisa kirikutumbisa engano, okukwatanisa n’omusiisi oyangire kweteisa nikishiisha kita ekibiina?
Baingi abaabingirwe bakeeteisa baagaruka omu kibiina, ahabw’okugira ngu okuhana okwo kukabahwera kwegarukamu, n’obu kuraabe nikureeta obusaasi. (Zaaburi 141:5) Zaana VIDIYO, kubaasa kugarukamu ekibuuzo ekirikukurataho.
-
Omu vidiyo, Sonja ku yaabingirwe omu kibiina akagasirwa ata?
Entebeekanisa y’okubingwa . . .
-
neehaisa eta eiziina rya Yehova ekitiinisa?
-
neeyoreka eta ngu Yehova n’omuringaaniza kandi owa rukundo?
5. Yehova naasaasira omusiisi yaayeteisa
Yesu akakoresa eky’okureeberaho ekirikutuhwera kwetegyereza oku Yehova arikwehurira omuntu yaayeteisa. Shoma Luka 15:1-7, kubaasa kugarukamu ekibuuzo eki:
-
Ekyahandiikirwe eki nikikwegyesa ki ahari Yehova?
Shoma Ezekieli 33:11, kubaasa kugarukamu ekibuuzo eki:
-
Okweteisa nikutwariramu kintu ki ekikuru?
Yehova ni nk’omuriisa, naafayo munonga aha ntaama ze
ABAMWE NIBAGIRA NGU: “Nintiina ngu ku ndagambire abareeberezi ekibi eki nkozire, niinyija kubingwa omu kibiina.”
-
Omuntu orikwehurira atyo noobaasa kumuhwera ota?
OMU BUGUFU
Omuntu yaakora ekibi ky’amaani kwonka akeeteisa ayihire aha mutima, kandi akamariirira kutagaruka kukikora, Yehova naamusaasira.
Okweijutsya
-
Waakora ekibi, ahabw’enki ni kirungi kukyaturira Yehova?
-
Twine kukora ki kubaasa kusaasirwa ebibi byaitu?
-
Omuntu yaakora ekibi ky’amaani, ahabw’enki aine kugambira abareeberezi kumuhwera?
JUMBURA EBINDI
Reeba oku omushaija omwe yaagasiirwe omu mbabazi za Yehova ezirikugambwaho omuri Isaaya 1:18.
Entebeekanisa y’okubingwa omu kibiina neebaasa kugasira eta buri omwe orikukwatwaho?
“Ekirikureetera Okubingwa Kuba Entebeekanisa ya Rukundo” (Omunaara gw’Omurinzi, Apuri 15, 2015)
Reeba oku orikubaasa kushoboororera otari Mujurizi wa Yehova entebeekanisa y’okubingwa.
“Abajurizi ba Yehova shi Nibacwa Abaabaire Bari omu Diini Yaabo?” (Eky’aha mukura)
Omu byafaayo “Nkaba Niinyenda Kugarukira Yehova,” manya ahabw’enki omushaija owaabaire ahabire arugire omu mazima, yaamanyire ngu Yehova niwe yaamuhweraire kugaruka.
“Baibuli Neehindura Emitwarize y’Abantu” (Omunaara gw’Omurinzi, Apuri 1, 2012)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
