ƐZUKOALƐDEƐ 57
Na Saa Ɛyɛ Ɛtane Kpole Ɛ?
Ɛkulo Gyihova kpole yɛɛ ɛbɔ mɔdenle kpalɛ kɛ ɛnrɛyɛ debie biala mɔɔ bamaa yeali nyane la, noko ɔyɛ a ɛbayɛ nvonleɛ. Noko akee, ɛtane ne bie le kpole tɛla bie. (1 Kɔlentema 6:9, 10) Saa ɛyɛ ɛtane kpole bie a kakye kɛ ɔngile kɛ Gyihova ɛngulo wɔ; emomu, ɔkulo kɛ ɔfa ɔkyɛ wɔ na ɔboa wɔ.
1. Duzu a ɔwɔ kɛ yɛyɛ amaa Gyihova ava yɛ ɛtane ahyɛ yɛ a?
Saa menli mɔɔ kulo Gyihova la nwu kɛ bɛyɛ ɛtane kpole bie a bɛdi nyane kpalɛ. Noko ɛwɔkɛ ɛhye mɔɔ Gyihova bɔle ye menli ne la kyekye bɛ rɛle: “Bɛ ɛtane ne mɔ le kɔkɔlɛ weɔɔnwo bɔbɔ ɛdeɛ, noko bɛbayɛ fufule kɛ ezukɔtweaba.” (Ayezaya 1:18) Saa yɛnu yɛ nwo amgba a, Gyihova bava ahyɛ yɛ bɔkɔɔ. Kɛzi yɛnu yɛ nwo ɛ? Yɛdi mɔɔ yɛyɛ la anwo nyane kpole, ɔti yɛgyakyi ɛtaneyɛlɛ na yɛsɛlɛ Gyihova kɛ ɔva yɛ ɛtane ɔhyɛ yɛ. Akee yɛbɔ mɔdenle yɛkakyi adwenle ɛtane anzɛɛ yɛgyakyi subane mɔɔ maanle yɛyɛle ɛtane ne la, na yɛbɔ mɔdenle kɛ yɛbava Gyihova ngyinlazo mgbalɛ ne mɔ yɛabɔ yɛ ɛbɛla.—Kenga Ayezaya 55:6, 7.
2. Saa yɛyɛ ɛtane a kɛzi Gyihova dua mgbanyima ne mɔ anwo zo boa yɛ ɛ?
Saa yɛyɛ ɛtane kpole bie a, Gyihova se “[yɛvɛlɛ] asafo ne anu mgbanyima.” (Kenga Gyemise 5:14, 15.) Mrenyia ɛhye mɔ mɔɔ bɛkpa bɛ la kulo Gyihova nee ye mboane ne. Bɛtete bɛ kɛ bɛboa yɛ bɛmaa yɛziezie yɛ nee Gyihova avinli.—Galeehyeama 6:1.
Saa yɛyɛ ɛtane kpole bie a kɛzi mgbanyima ne mɔ boa yɛ ɛ? Mgbanyima nwiɔ anzɛɛ nsa bava Baebolo ne anu folɛdulɛ adenrɛdenrɛ yɛ. Eza bɛbamaa yɛ nzuzulɛ mɔɔ fɛta nee anwosesebɛmaanlɛ mɔɔ baboa yɛ amaa yɛanyɛ ɛtane bieko la. Bie a bɛnrɛmaa yɛnrɛyɛ gyimalilɛ bie mɔ wɔ asafo ne anu kɔkpula kɛ yɛ nwo bayɛ se wɔ sunsum nu la. Saa awie yɛ ɛtane kpole bie na yeannu ɔ nwo a mgbanyima ne mɔ tu ye amaa bɛabɔ asafo ne anwo bane bɛavi subane ɛtane biala anwo.
SUKOA DƆƆNWO
Sukoa kɛzi yɛyɛ ɛtane kpole a Gyihova boa yɛ la anwo debie na kile nwolɛ anyezɔlɛ.
3. Saa yɛka yɛ ɛtane a ɔboa ɔmaa yɛte kpɔkɛ bieko
Ɛtane biala mɔɔ yɛyɛ la maa Gyihova di nyane, ɔti ɔfɛta kɛ yɛka yɛkile ye. Kenga Edwɛne 32:1-5, na akee bɛzuzu kpuya ɛhye anwo:
-
Duzu ati a ɔle kpalɛ kɛ yɛbaha yɛ ɛtane yɛahile Gyihova na ɔnle kɛ yɛbɔ mɔdenle kɛ yɛfa yɛavea ye ɛ?
Saa yɛka yɛ ɛtane yɛkile Gyihova yɛwie a, eza ɔwɔ kɛ yɛkpondɛ moalɛ yɛfi mgbanyima ne mɔ ɛkɛ amaa yɛ nwo adɔ yɛ. Ye VIDIO ne, na akee bɛzuzu kpuya ɛhye anwo.
-
Wɔ vidio ne anu, kɛzi mgbanyima ne mɔ boale Canon maanle ɔziale ɔrale Gyihova ɛkɛ ɛ?
Ɔwɔ kɛ yɛka nɔhalɛ wienyi yɛkile mgbanyima ne mɔ; bɛwɔ ɛkɛ ne kɛ bɛboa yɛ. Kenga Gyemise 5:16, na akee bɛzuzu kpuya ɛhye anwo:
-
Duzu ati a yɛka nɔhalɛ yɛkile mgbanyima ne mɔ a ɔmmaa ɔnyɛ se kɛ bɛbaboa yɛ a?
Ka wɔ ɛtane ne, ka nɔhalɛ kile mgbanyima ne mɔ na die moalɛ mɔɔ Gyihova fi ɛlɔlɛ nu fa maa la to nu
4. Kɛzi ɛdulɛ ngyehyɛleɛ ne boa yɛ la
Saa awie mɔɔ ɛyɛ ɛtane kpole la kpo kɛ ɔbali Gyihova ngyinlazo zo a, ɔnrɛhola ɔnrɛdɛnla asafo ne anu bieko. Bɛtu ye na yɛ nee ye ɛndu anzɛɛ yɛ nee ye ɛndendɛ bɔbɔ. Kenga 1 Kɔlentema 5:6, 11 yɛɛ 2 Dwɔn 9-11, na akee bɛzuzu kpuya ɛhye anwo:
-
Kɛ mɔɔ mgbɔvonle maa ɛdɔkɛ nyinyia la, saa yɛ nee ɛtanevolɛ mɔɔ ɛtɛnunle ɔ nwo la tu a kɛzi ɔbaha asafo ne ɛ?
Menli dɔɔnwo mɔɔ bɛdu bɛ la nzinlii ɛzia ɛra asafo ne anu ɔluakɛ ɛnee ɛdulɛ ne yɛ nyane ɛdeɛ, noko ɔmaanle bɛ adwenle rale bɛ nwo zo. (Edwɛne 141:5) Ye VIDIO ne, na akee bɛzuzu kpuya ɛhye anwo.
-
Wɔ vidio ne anu, kɛzi ɛdulɛ ne boale Sonja ɛ?
Kɛzi ɛdulɛ ngyehyɛleɛ ne . . .
-
te Gyihova duma nwo ɛ?
-
maa ɔda ali kɛ Gyihova te yɛ edwɛkɛ bo yɛɛ ɔlɛ ɛlɔlɛ ɛ?
5. Saa yɛnu yɛ nwo a Gyihova fa yɛ ɛtane kyɛ yɛ
Gyisɛse yɛle ndonwo bie mɔɔ boa yɛ ɔmaa yɛnwu kɛzi Gyihova te nganeɛ wɔ mekɛ mɔɔ awie kɛnlu ɔ nwo la. Kenga Luku 15:1-7, na akee bɛzuzu kpuya ɛhye anwo:
-
Duzu a ɛhye maa ɛnwu ye wɔ Gyihova anwo a?
Kenga Yizikeɛle 33:11, na akee bɛzuzu kpuya ɛhye anwo:
-
Duzu a ɔhyia kɛ awie yɛ amaa yeahile kɛ yenlu ɔ nwo a?
Gyihova le kɛ mboaneneavolɛ mɔɔ dwenle ye mboane nwo kpalɛ la
BIE MƆ KA KƐ: “Mesulo kɛ meka mekile mgbanyima ne mɔ kɛ meyɛ ɛtane a bɛbadu me.”
-
Duzu a ɛbaha wɔahile awie mɔɔ lɛ adwenle zɛhae la ɛ?
EDWƐKƐ TITILI
Saa yɛyɛ ɛtane kpole na yɛnu yɛ nwo amgba, na yɛbɔ mɔdenle yɛgyakyi ɛtaneyɛlɛ a Gyihova bava ahyɛ yɛ.
Ndinu
-
Duzu ati a ɔle kpalɛ kɛ yɛka yɛ ɛtane yɛkile Gyihova a?
-
Duzu a ɔwɔ kɛ yɛyɛ amaa bɛava yɛ ɛtane bɛahyɛ yɛ a?
-
Saa yɛyɛ ɛtane kpole bie a, duzu ati a ɔwɔ kɛ yɛkpondɛ moalɛ yɛfi mgbanyima ne mɔ ɛkɛ a?
KPONDƐ DƆƆNWO
Nea kɛzi nrenyia bie nyianle Gyihova anwunvɔnezelɛ ne mɔɔ bɛha nwolɛ edwɛkɛ wɔ Ayezaya 1:18 la azo nvasoɛ la.
Mmamaa Wɔ Adwenle Nu Yɛ Wɔ Kesee Wɔ Gyihova Anwunvɔnezelɛ Nwo Ɛlɛ (5:02)
Kɛzi ɛdulɛ ngyehyɛleɛ ne boa awie biala ɛ?
“Deɛmɔti Ɛdulɛ Le Nziezielɛ Mɔɔ Ɛlɔlɛ Wɔ Nu La” (Ɛzinzalɛ Arane, April 15, 2015)
Sukoa kɛzi ɛbahola wɔahilehile ɛdulɛ ngyehyɛleɛ ne anu wɔahile awie mɔɔ ɛnle Dasevolɛ la.
“Asoo Gyihova Alasevolɛ Kpo Menli Mɔɔ Dɛba Ne Bɛ Nee Bɛ A Sonle La Ɔ?” (Edwɛkɛ mɔɔ wɔ jw.org azo)
Wɔ anwubielɛ ne mɔɔ se “Ɛnee Ɔwɔ Kɛ Mesia Meba Gyihova Ɛkɛ” la anu, nea deɛmɔti nrenyia bie mɔɔ vile nɔhalɛ ne anu la dele nganeɛ kɛ Gyihova ɛmaa yezia ɔ nzi la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
