57 NUENƆ

Ena O Doo Lo O Si Gbɛnɛ Pɔrɔ A?

PLAY

Kereadoo o wereloo Jɛhova kaāna, sa gaa piiga lokwa oo doo lɔgɔ nu ebiire ye bu, siga sɔ̄ o dap tɛɛ̄ ekwɔ. Kerewo, siga tɛɛ̄ ekwɔ kuī ee ziī. (1 Pya Kɔrint 6:9, 10) Lo a le o si ziī e’agabah pɔrɔ, nyɛŋiabu kɔ Jɛhova sii ɔbɛ ewere a loo; e a le ekpɛ̄naloo e’aaloo a nɛ sa a yerebah nɛ.

1. Ena i ɛrɛ edoo lokwa Jɛhova i aaloo nɛ a?

Pya a wereloo Jɛhova wee ɛrɛ ekiɛ̄nu sɔ̄ ba suā kɔ ba esiae ziī e’agabah pɔrɔ. Mɛ yii Jɛhova yira nɛ pya ye nɛɛ wee wa nɛ egbɔ̄nyiɛ: “Kere dɛ̄dɛɛ̄ bui pɔrɔ lu miimii, ba elu ɛɛ doodoo snow.” (Aisaia 1:18) Lo i kiiya aaloo i pɔrɔ aābu dɛ̄dɛɛ̄ i beenyiɛ, Jɛhova e’aaloo i nɛ sa dee. I kiiya aaloo i pɔrɔ doodoo wa? Sɔ̄ pɔrɔ i bee si i kiɛ̄ kaāna sa i ɔbɛ, i bara Jɛhova kɔ a aaloo i nɛ. Lɛɛ i piiga lo ekwabahloo pɔrɔ ekɛɛrɛ ale dogo a bee doo kɔ i doo pɔrɔ a, sa piiga lo etɔɔ̄dum dookɛ̄ pya daakuu Jɛhova a ɛɛ le doo.—Buū Aisaia 55:6, 7.

2. Bu mɛ sīdee na Jɛhova wee su pya kanɛɛ i yeābah nɛ sɔ̄ i si pɔrɔ a?

Lo a le i esia ziī e’agabah pɔrɔ, nu Jɛhova kɔ i doo na e “kue pya kanɛɛ loo tɔ bɔŋanaloo Kraist.” (Buū Jemes 5:14, 15.) Pya nɛɛ alu etubobahloo ama wereloo Jɛhova le pya a ye taāŋabah. Ba nyim tura lo eyerebah i nɛ kɔ i sikɛ̄ nyɔɔnɛ Jɛhova ɛrɛ le gbanialoo.—Pya Galetia 6:1.

Bu mɛ sīdee na pya kanɛɛ wee i yerebah nɛ lo i si gbɛnɛ pɔrɔ a? Baɛ ale taa nɛɛ kanɛɛ wee i zuurabahtɔ̄ tɛ̄maloo Baibol. Ba wee i kɔ pya nu i dap doo nɛ, sa i yere mɛm loo lokwa ii sinakɛ̄ si lo pɔrɔ. Ba dap i ɔbɛ lɛɛloo esi pio tam bu bɔŋanaloo mmɛ sɔ̄ i gbanialoo kiikɛ̄ Jɛhova le esiakɛ̄ le le. Lokwa ba kpega bɔŋanaloo kɔ a bia ɛɛ, pya kanɛɛ wee kpo ɛrɛgeba nɛɛ a si gbɛnɛ pɔrɔ sa naa yiga ekiiya.

NƆ YERELOO

Piiga lo esuā kɛ̄ Jɛhova i yerebah nɛ doo sɔ̄ i si gbɛnɛ pɔrɔ, lɛɛ o doo ye yaa.

3. Sɔ̄ i kɔ i pɔrɔ siā wee doo kɔ i sikɛ̄ ɛrɛ le gbanialoo kiikɛ̄ Jɛhova le

Ɛrɛgeba pɔrɔ i si wee biirebu Jɛhova, nyɔɔwo i ɛrɛ ekɔ i pɔrɔ siā ye nɛ. Buū Le-yɔɔ 32:1-5, lɛɛ o agara ebip ama:

Ena anua a lee lo ekɔ i pɔrɔ siā nɛ Jɛhova taā i gɔ̄ ani?

Gbaāloo kɔ i pɔrɔ nɛ Jɛhova, i ɛrɛnage efɛɛloo lo i gbī yerebah aābah pya kanɛɛ. Bira lo VIDIO, lɛɛ o agara ebip a nyɔɔnɛ ama.

VIDIO: “Jɛhova Wee Zuurabahtɔ̄ Pya A Wereloo” (3:01)

Bu vidio ama, bu mɛ sīdee na pya kanɛɛ yerebah nɛ Canon kɔ a obia pii Jɛhova a?

Lu ebɛɛ̄ kɔ i kɔ kaka ue nɛ pya kanɛɛ sa kɔ dɛ̄dɛɛ̄ nu a bee sira wa nɛ; ba kpɛ̄naloo eyerebah i nɛ. Buū Jemes 5:16, lɛɛ o agara ebip ama:

Kɔ kaka ue nɛ pya kanɛɛ edoo kɔ a waɛ wa bah eyerebah i nɛ doodoo wa?

Kɔ o pɔrɔ siā, kɔ kaka ue nɛ pya kanɛɛ, sa su yerebah Jɛhova a nɛ

4. Kɛ̄ kpo nɛɛ lɛɛ bu bɔŋanaloo lu nu a dɔbiī doo

Nɛɛ a si gbɛnɛ pɔrɔ sa naa yiga enyɔɔnɛ daakuu Jɛhova, naale edapna le bu bɔŋanaloo Jɛhova. Elua ekpo ye lɛɛ bu bɔŋanaloo, sa ii le enyɔɔnɛ ye dania lɔgɔ nu ale kunɛ kɔ ue ye nɛ. Buū 1 Pya Kɔrint 5:6, 11 le 2 Jɔn 9-11, lɛɛ o agara ebip ama:

Dookɛ̄ nu a wee muunɛ nu wee muunɛ fituru doo, bu mɛ sīdee na nyɔɔnɛ nɛɛ elua ekpo danianu e’ɛrɛ pah nyɔɔ bɔŋanaloo a?

Gbɛnɛ-edo pya a bee lu ekpo e’obia lu bu bɔŋanaloo nyɔnɛbee kere zuurabahtɔ̄ a bee lu enɛ wa zi wa loo, a yerebah wa nɛ kɔ ba a suā kɔ nu ba bee dooe bee piya. (Le-yɔɔ 141:5) Bira lo VIDIO, lɛɛ o agara ebip a nyɔɔnɛ ama.