UYONO 57
Wu Rhe Ruẹ Ọdandan Ọghwaghwa Vwo?
Dedevwo wu vwo ẹguọlọ kpahen i Jehova omamọ, wa ji damoma kẹnoma rẹn oborẹ ọnọ lẹrhiẹ tuekwẹre, ọkezẹko, wu ne ji ru sọ. Ọrẹn, edandan ezẹko eghwaghwa. (1 Corinthians 6:9, 10) Wu rhe ruẹ ọdandan ọghwaghwa, karorhọ taghene i Jehova o ji vwo ẹguọlọ kpahuọn; o vwo omwemẹ rọ nọ harhomuo, ji ha userhumu wẹn.
1. Me ye ne vi ru na sabu mẹrẹn ẹharhomu ọrẹ i Jehova?
Ihworho ri vwo ẹguọlọ kpahen i Jehova, e mwuomarhọ omamọ aye i rha mẹrẹnvwrurhe taghene aye i ruẹ ọdandan ọghwaghwa ne. Ọrẹn, aye ina sabu mẹrẹn omefuon nẹ oborẹ i Jehova o veri ha rẹn ihworho yi: “Dedevwo edandan are i họhọ ekwakwa ebobare, ene ru aye fon jerẹ imito.” (Isaiah 1:18) Arha ghwẹriẹ nẹ ẹhẹn rhe, Jehova ọnọ harhomu ọwan phẹlẹphẹlẹ. Marhẹ ene ru ghwẹriẹ? Oborẹ e ruru na nọ da ọwan omamọ, e vwe rhe ruie ghwomara-an, na ji rẹ i Jehova nọ harhomu ọwan. Habaye, na wian gbanhan wene orharhere iroro yanghene uruemru rọ lẹrherẹ ọwan ruẹ ọdandan na, na damoma nyerẹnmwu evwan egbagba i Jehova.—Se Isaiah 55:6, 7.
2. Marhẹ i Jehova o ru ha ekpako ukoko na ha userhumu rẹn ọwan erhe ruẹ ọdandan?
Orhianẹ e ruẹ ọdandan ọghwaghwa, Jehova ọ ta rẹn ọwan ne “se ekpako ukoko na.” (Se James 5:14, 15.) Ehworhare enana ra ha mwu na, i vwo ẹguọlọ kpahen i Jehova ọrhẹ igegede yi. Aye i mwuovwan rẹ aye ina ha userhumu rẹn ọwan kwaphiẹ onyerẹnkugbe ọwan rhẹ i Jehova rhọ.—Galatians 6:1.
Marhẹ ekpako na ine ru ha userhumu rẹn ọwan erhe ruẹ ọdandan ọghwaghwa? Ekpako awanva yanghene esa ine lele ọwan siyẹ, jeghwai ha i Baibol na kpọ ọwan vi. Aye ina ji yẹ ọwan irorẹdjẹ ọrhẹ urhebro ri na ha userhumu rẹn ọwan, ne je rhe ruẹ ọdandan na ọgbọrọrọ. Aye ina sabu ta rẹn ọwan ne je vwobọrhọ irueruo ezẹko uvuẹn ukoko na bọmọke ana rharhumu gbanhon izede ọrẹ ẹhẹn. Nẹ ekpako na i sabu sẹrorẹ ukoko na, aye ne le ohworho ro ruẹ ọdandan ọghwaghwa ro vwo kwe ghwẹriobọ nẹ ukoko na.
YONO KODO RHỌ
Yono oborẹ wu ne ru dabu vwẹruọ oborẹ i Jehova o ru ha userhumu rẹn ọwan erhe ruẹ ọdandan ọghwaghwa, ji vwo ọdaremẹro kpahiẹn.
3. Arha rhian ọdandan ọwan, ọ kwaphiẹ onyerẹnkugbe ọwan rhẹ i Jehova
Ọdandan re ruru ephian, ọ hobọte i Jehova, omarana, o fori na rhian ye riẹn. Se Psalm 32:1-5, orho ru, are i gba kpahenrhọ onọ ọnana:
-
Mesoriẹ orhomu na rhian edandan ọwan rẹn i Jehova ukperẹ ene ti aye nu?
Haba ọrẹ ana rhian edandan ọwan rẹn i Jehova, ọwan a ji mẹrẹn omefuon arha nekpẹn userhumu ekpako na. Kporo IVIDIO na, orho ru, are i gba kpahenrhọ onọ ọnana.
-
Uvuẹn ividio na, marhẹ ekpako na i ru ha userhumu rẹn i Canon rharhumu bru i Jehova?
O fori na dabu ta urhomẹmro rẹn ekpako na; aye ina dabu ha userhumu rẹn ọwan. Se James 5:16, orho ru, are i gba kpahenrhọ onọ ọnana:
-
Marhẹ urhomẹmro ra ta rẹn ekpako na, o ru lẹrhiẹ lọhọ rẹn aye ọke aye a guọlọ ha userhumu rẹn ọwan?
Rhian edandan enọ, ta urhomẹmro rẹn ekpako na, jeghwai rhiabọ dede userhumu ri Jehova o tiobọnuẹ wẹn rhẹ ẹguọlọ
4. Oborẹ ẹkwaphiẹrhotọre re le ohworho nẹ ukoko, o ru ha userhumu rẹn ọre leri ọrhẹ ukoko na
Ohworho orho ruẹ ọdandan ọghwaghwa, jeghwai ten evwan egbagba eri Jehova, ọrhọ sabu rhiẹ usuẹn ukoko na-a. Ne le yi nẹ ukoko na, ọwan i vwe rhe lelie ruẹ kugbe yanghene lelie tẹmro dede-e. Se 1 Corinthians 5:6, 11 ọrhẹ 2 John 9-11, orho ru, are i gba kpahenrhọ onọ ọnana:
-
Jerẹ oborẹ emru rọ lẹrhẹ ibrẹdi phie, ọ lẹrhiẹ phie, erhe ruẹ kugbe rhẹ oruọdandan ro vwo kwe ghwẹriẹ, marhẹ ono ru hobọte ukoko na?
Imizu buebun re leri nẹ ukoko bi, i ghwẹrioma rhiẹ ukoko na fọkime, dedevwo ọghwọghwu rọ miama ya yẹrẹ aye, ọ lẹrherẹ aye rhe taghene aye i rusọ. (Psalm 141:5) Kporo IVIDIO na, orho ru, are i gba kpahenrhọ onọ ọnana.
-
Uvuẹn ividio na, userhumu ọgo yi Sonja ọ mẹrẹnren fọkime e le rie nẹ ukoko?
Marhẹ ẹkwaphiẹrhotọre re le ohworho nẹ ukoko o ru . . .
-
brọghọ rhẹ odẹ i Jehova?
-
djephia taghene i Jehova o roro rẹn ọwan, o ji vwo ẹguọlọ kpahen ọwan?
5. Jehova ọ harhomu ọwan arha ghwẹriẹ
Jesu o dje udje rọ lẹrherẹ ọwan vwẹruọ oborẹ oma o ruẹ i Jehova, ohworho ọrhọ ghwẹriẹ. Se Luke 15:1-7, orho ru, are i gba kpahenrhọ onọ ọnana:
-
Me yẹ ọnana o yoniruon kpahen i Jehova?
Se Ezekiel 33:11, orho ru, are i gba kpahenrhọ onọ ọnana:
-
Udjoghwẹ ọghoghanren ọgo ya na kpare, ne djephia taghene a ghini ghwẹriẹ ne?
Jehova ọ dabu hẹrote igegede enẹyen, jerẹ oborẹ osuingegede o ruẹ
OBORẸ IHWORHO EZẸKO A TA: “Mia zofẹn taghene mi rha ta rẹn ekpako na kpahen ọdandan mẹ, ene le mẹ nẹ ukoko.”
-
Me wu na ta rẹn ohworho ro vwo aruẹ iroro ọrana?
ME WU YONORIN?
Erhe ruẹ ọdandan ọghwaghwa, ọrẹn, nọ dare ọwan omamọ, ji vwo omwemẹ re ne je ru oborẹ obiomurun, Jehova ọnọ harhomu ọwan.
Ẹzẹkoko
-
Mesoriẹ orhomu na rhian edandan ọwan rẹn i Jehova?
-
Me ye ne vi ru ni Jehova ọ sabu harhomu edandan ọwan?
-
Erhe ruẹ ọdandan ọghwaghwa, mesoriẹ o fo na nekpẹn userhumu ekpako na?
GUỌLỌ IYẸNRẸN ERỌRỌ
Ni oborẹ i Jehova o ru dje aruẹ arodọmẹ ra hunute uvuẹn Isaiah 1:18 rẹn ọhworhare owu.
Erhe le ohworho nẹ ukoko, erere ọgo yọ yẹ ihworho ephian ro sekpahen?
Yono oborẹ wu ne ru dje rẹn ohworho ro vwo rhiẹ Oseri Jehova, oborẹ ọsoriẹ e le ohworho nẹ ukoko ọkezẹko.
“Iseri Jehova a Kẹnoma Rẹn Ihworho re le nẹ Ukoko Aye?” (Urhomu-ẹmro rọ ha uvuẹn itanẹti)
Uvuẹn ikuegbe na “Ofori ni mi Rharhumu Bru i Jehova,” yono oborẹ ọsoriẹ ọhworhare owu ro nẹ ukoko na bi, o roro taghene i Jehova ọ rharhumu rhiabọ dedie rhiẹ ukoko ọnẹyen ne.
