BARUMSA 57
Cubbuu Cimaa yoo Hojjette Maal Gochuu Qabda?
Yihowaa garaadhaa kan jaallattuu fi wanta isa gaddisiisu kam iyyuu raawwachuu dhiisuuf carraaqqii cimaa yoo goote illee, darbee darbee dogoggora raawwachuun kee hin oolu. Haa taʼu malee, cubbuun tokko tokko baayʼee cimaa taʼuu dandaʼa. (1 Qorontos 6:9, 10) Cubbuu cimaa yoo hojjette, Yihowaan si jaallachuu isaa akka hin dhiisne yaadadhu; inni dhiifama sii gochuu fi si gargaaruuf fedhii qaba.
1. Yihowaan dhiifama akka nuu godhuuf maal gochuu qabna?
Namoonni Yihowaa jaallatan cubbuu cimaa akka hojjetan yommuu hubatan baayʼee gaddu. Taʼus waadaa Yihowaan, “Cubbuun keessan diimaa dhiiga fakkaatu yoo taʼe illee, akkuma cabbii adii ni taʼa” jechuudhaan saba isaatiif gale irraa jajjabina argatu. (Isaayyaas 1:18) Garaadhaa yoo yaada geddaranne, Yihowaan guutummaatti dhiifama nuuf godha. Haa taʼu malee, yaada geddarachuu keenya akkamitti argisiisna? Wanta hojjechaa turretti garaadhaa gaabbinee wanta sana raawwachuu dhiisuu fi Yihowaan dhiifama akka nuuf godhu kadhachuudhaan kana gochuu dandeenya. Achiis ilaalcha ykn barsiifata dogoggoraa cubbuu sana raawwachuutti nu geesse dhiisuuf carraaqqii guddaa gochuu fi ulaagaalee Yihowaa qulqulluu taʼanii wajjin walsimnee jiraachuuf yaaluu qabna.—Isaayyaas 55:6, 7 dubbisi.
2. Yeroo cubbuu hojjennutti Yihowaan jaarsoliitti fayyadamee kan nu gargaaru akkamitti?
Yeroo cubbuu cimaa hojjennutti Yihowaan ‘jaarsolii gumii akka ofitti waammannu’ nu ajajeera. (Yaaqoob 5:14, 15 dubbisi.) Dhiironni muudaman kun Yihowaa fi hoolota isaa ni jaallatu. Isaan Yihowaa wajjin deebisnee hariiroo gaarii akka qabaannu nu gargaaruu kan dandaʼan akkamitti akka taʼe barataniiru.—Galaatiyaa 6:1.
Maarree jaarsoliin yeroo cubbuu cimaa hojjennutti kan nu gargaaran akkamitti? Jaarsoliin lama ykn sadii gorsa Kitaaba Qulqulluutti fayyadamanii nu sirreessu. Kana malees, yaada ykn jajjabina irra deebinee cubbuu akka hin hojjenne nu gargaaran nuu kennu. Hariiroo Yihowaa wajjin qabnu deebisnee hamma cimsannutti gumii keessatti wantoota tokko tokko akka hin raawwanne murteessuu dandaʼu. Jaarsoliin gumicha dhiibbaa gadhee irraa eeguuf, nama cubbuu cimaa hojjetee fi yaada geddarachuu dide kam iyyuu gumiidhaa baasu.
CAALAATTI BARADHU
Akkaataa Yihowaan yeroo cubbuu cimaa hojjennu itti nu gargaaru ilaalchisee hubannaa qabdu guddifadhu.
3. Cubbuu keenya himachuun michummaa Yihowaa wajjin qabnu haareffachuuf nu gargaara
Cubbuun hojjennu kam iyyuu Yihowaa ni gaddisiisa, kanaafuu cubbuu keenya isatti himachuun keenya sirrii dha. Faarfannaa 32:1-5 dubbisaa, achiis gaaffii kana irratti mariʼadhaa:
-
Cubbuu hojjenne dhoksuuf yaaluu mannaa Yihowaatti himachuun keenya gaarii kan taʼe maaliifi?
Cubbuu keenya Yihowaatti himachuu malees jaarsoliin gargaarsa akka nuuf godhan gaafachuun boqonnaa nuuf argamsiisa. VIIDIYICHA taphachiisaa, achiis gaaffii armaan gadii irratti mariʼadhaa.
-
Akkuma viidiyicha irratti ibsame jaarsoliin, Kaanon gara Yihowaatti akka deebiʼu kan isa gargaaran akkamitti?
Iftoominaa fi amanamummaadhaan jaarsoliitti dubbachuu qabna; isaanis nu gargaaruuf qophaaʼoo dha. Yaaqoob 5:16 dubbisaa, achiis gaaffii kana irratti mariʼadhaa:
-
Cubbuu hojjenne ilaalchisee dhugaa isaa dubbachuun keenya jaarsoliin nu gargaaruun akka isaanitti salphatu kan godhu akkamitti?
Cubbuu kee Yihowaatti himadhu, jaarsoliittis dhugaa isaa dubbadhu, akkasumas gargaarsa Yihowaan siif kennu fudhadhu
4. Gumiidhaa baasuun faayidaa akkamii qaba?
Namni cubbuu cimaa hojjete tokko qajeelfama Yihowaa hordofuu yoo dide, miseensa gumichaa taʼee itti fufuu hin dandaʼu. Gumiidhaa baafamuu qaba, nutis isaa wajjin yeroo dabarsuu ykn isaa wajjin dubbachuu illee hin qabnu. Qorontos Tokkoffaa 5:6, 11 fi 2 Yohaannis 9-11 dubbisaa, achiis gaaffii kana irratti mariʼadhaa:
-
Akkuma raacitiin bukoo bukeessu, nama cubbuu hojjetee fi yaada hin geddarannee wajjin yeroo dabarsuun gumicha irratti dhiibbaa kan godhu akkamitti?
Namoonni gumiidhaa baafaman hedduun adabni isaaniif kenname kan isaan gaddisiise taʼus, yaada isaanii akka geddaratan waan isaan gargaareef gara gumiitti deebiʼuu dandaʼaniiru. (Faarfannaa 141:5) VIIDIYICHA taphachiisaa, achiis gaaffii armaan gadii irratti mariʼadhaa.
-
Viidiyoo kana irratti akkuma ibsame, Sooniyaan gumiidhaa baafamuun ishii kan ishii fayyade akkamitti?
Qophiin gumiidhaa baasuu . . .
-
maqaa Yihowaatiif ulfina kan fidu akkamitti?
-
Yihowaan sababa qabeessaa fi jaalala qabeessa taʼuu isaa kan argisiisu hoo akkamitti?
5. Yaada yoo geddaranne Yihowaan dhiifama nuuf godha
Yesuus fakkeenya namni tokko yeroo yaada geddaratu wanta Yihowaatti dhagaʼamu hubachuuf nu gargaaru dubbateera. Luqaas 15:1-7 dubbisaa, achiis gaaffii kana irratti mariʼadhaa:
-
Caqasni kun waaʼee Yihowaa maal si barsiisa?
Hisqiʼel 33:11 dubbisaa, achiis gaaffii kana irratti mariʼadhaa:
-
Yaada geddarachuun tarkaanfii barbaachisaa akkamii fudhachuu dabalata?
Akkuma tiksee tokkoo Yihowaan hoolota isaatiif baayʼee ni yaada
NAMOONNI TOKKO TOKKO AKKANA JEDHU: “Cubbuun hojjedhe jaarsoliitti yoon hime gumiidhaan baafama jedheen sodaadha.”
-
Nama akkas jedhee yaaduuf deebii akkamii kennita?
MAAL BARATTE?
Cubbuu cimaa yoo hojjenne, garuu immoo garaadhaa yoo gaabbinee fi cubbuu sana raawwachuu dhiisuuf yoo murteessine Yihowaan dhiifama nuuf godha.
Irra Deebii
-
Cubbuu keenya Yihowaatti himachuun keenya gaarii kan taʼe maaliifi?
-
Cubbuun keenya akka nuuf dhiifamuuf maal gochuu qabna?
-
Cubbuu cimaa yoo hojjenne, gargaarsa jaarsolii gaafachuu kan qabnu maaliifi?
QORANNOO DABALATAA GODHI
Namni tokko akkuma Isaayyaas 1:18 irratti ibsame, araara Yihowaa kan argate akkamitti akka taʼe ilaali.
Yihowaan Dhiifama Akka Isiniif Godhu Matumaa hin Shakkinaa (5:02)
Qophiin gumiidhaa baasuu faayidaa kan argamsiisu akkamitti?
Qophii gumiidhaa baasuu nama Dhugaa Baatuu hin taaneef akkamitti ibsuu akka dandeessu baradhu.
Seenaa jireenyaa “Gara Yihowaatti Deebiʼuun Barbaade” jedhu irraa, namni Yihowaa irraa fagaatee ture tokko Yihowaan gara isaatti akka isa deebise kan isatti dhagaʼame maaliif akka taʼe baradhu.
“Kitaabni Qulqulluun Jireenya Namootaa ni Jijjiira” (Masaraa Eegumsaa, Eblaa-Waxabajjii 2012)
Kanneen Armaan Gadiis ni Jaallatta Taʼa
GAAFFIIWWAN YEROO BAAYʼEE GAAFATAMAN
Qoʼannaan Kitaaba Qulqulluu Dhugaa Baatonni Yihowaa Geggeessan Maali Dha?
Qoʼannaa tolaan Dhugaa Baatonni Yihowaa geggeessan irratti, hiikkaa Kitaaba Qulqulluu kam iyyuu fayyadamuu dandeessa. Maatii ykn michoota kee affeeruu dandeessa.
