ਇਹ ਸੱਚ ਹੈ ਕਿ ਅਸੀਂ ਯਹੋਵਾਹ ਨੂੰ ਬਹੁਤ ਪਿਆਰ ਕਰਦੇ ਹਾਂ ਅਤੇ ਪੂਰੀ ਕੋਸ਼ਿਸ਼ ਕਰਦੇ ਹਾਂ ਕਿ ਅਸੀਂ ਉਸ ਦਾ ਦਿਲ ਨਾ ਦੁਖਾਈਏ। ਪਰ ਫਿਰ ਵੀ ਸਾਡੇ ਸਾਰਿਆਂ ਕੋਲੋਂ ਕਦੇ-ਨਾ-ਕਦੇ ਗ਼ਲਤੀਆਂ ਹੋ ਜਾਂਦੀਆਂ ਹਨ ਅਤੇ ਕੁਝ ਗ਼ਲਤੀਆਂ ਜ਼ਿਆਦਾ ਗੰਭੀਰ ਹੁੰਦੀਆਂ ਹਨ। (1 ਕੁਰਿੰਥੀਆਂ 6:9, 10) ਜੇ ਅਸੀਂ ਕੋਈ ਗੰਭੀਰ ਪਾਪ ਕਰ ਬੈਠਦੇ ਹਾਂ, ਤਾਂ ਸਾਨੂੰ ਯਾਦ ਰੱਖਣਾ ਚਾਹੀਦਾ ਹੈ ਕਿ ਯਹੋਵਾਹ ਸਾਨੂੰ ਹਾਲੇ ਵੀ ਪਿਆਰ ਕਰਦਾ ਹੈ, ਉਹ ਸਾਨੂੰ ਮਾਫ਼ ਕਰਨ ਲਈ ਤਿਆਰ ਹੈ ਅਤੇ ਸਾਡੀ ਮਦਦ ਕਰਨੀ ਚਾਹੁੰਦਾ ਹੈ।

1. ਯਹੋਵਾਹ ਤੋਂ ਮਾਫ਼ੀ ਪਾਉਣ ਲਈ ਸਾਨੂੰ ਕੀ ਕਰਨ ਦੀ ਲੋੜ ਹੈ?

ਅਸੀਂ ਯਹੋਵਾਹ ਨੂੰ ਪਿਆਰ ਕਰਦੇ ਹਾਂ। ਇਸ ਲਈ ਜਦੋਂ ਸਾਨੂੰ ਅਹਿਸਾਸ ਹੁੰਦਾ ਹੈ ਕਿ ਸਾਡੇ ਤੋਂ ਗੰਭੀਰ ਪਾਪ ਹੋ ਗਿਆ ਹੈ, ਤਾਂ ਅਸੀਂ ਬਹੁਤ ਦੁਖੀ ਅਤੇ ਸ਼ਰਮਿੰਦੇ ਹੁੰਦੇ ਹਾਂ। ਪਰ ਸਾਨੂੰ ਯਹੋਵਾਹ ਦੇ ਇਸ ਵਾਅਦੇ ਤੋਂ ਦਿਲਾਸਾ ਮਿਲਦਾ ਹੈ: “ਭਾਵੇਂ ਤੁਹਾਡੇ ਪਾਪ ਸੁਰਖ਼ ਲਾਲ ਹੋਣ, ਉਹ ਬਰਫ਼ ਜਿੰਨੇ ਚਿੱਟੇ ਹੋ ਜਾਣਗੇ।” (ਯਸਾਯਾਹ 1:18) ਜੇ ਅਸੀਂ ਦਿਲੋਂ ਤੋਬਾ ਕਰੀਏ, ਤਾਂ ਯਹੋਵਾਹ ਸਾਨੂੰ ਪੂਰੀ ਤਰ੍ਹਾਂ ਮਾਫ਼ ਕਰ ਦੇਵੇਗਾ। ਪਰ ਅਸੀਂ ਇਹ ਕਿੱਦਾਂ ਦਿਖਾ ਸਕਦੇ ਹਾਂ ਕਿ ਅਸੀਂ ਦਿਲੋਂ ਤੋਬਾ ਕੀਤੀ ਹੈ? ਅਸੀਂ ਆਪਣੇ ਪਾਪ ʼਤੇ ਪਛਤਾਵਾ ਕਰਾਂਗੇ, ਗ਼ਲਤ ਕੰਮ ਛੱਡ ਦੇਵਾਂਗੇ ਅਤੇ ਯਹੋਵਾਹ ਤੋਂ ਦਿਲੋਂ ਮਾਫ਼ੀ ਮੰਗਾਂਗੇ। ਜਿਸ ਗ਼ਲਤ ਸੋਚ ਜਾਂ ਆਦਤ ਕਰਕੇ ਅਸੀਂ ਗੰਭੀਰ ਪਾਪ ਕੀਤਾ ਸੀ, ਉਸ ਨੂੰ ਬਦਲਣ ਲਈ ਅਸੀਂ ਸਖ਼ਤ ਮਿਹਨਤ ਕਰਦੇ ਰਹਾਂਗੇ। ਇਸ ਦੇ ਨਾਲ-ਨਾਲ ਅਸੀਂ ਯਹੋਵਾਹ ਦੇ ਅਸੂਲਾਂ ਮੁਤਾਬਕ ਚੱਲਣ ਦੀ ਪੂਰੀ ਕੋਸ਼ਿਸ਼ ਕਰਾਂਗੇ।—ਯਸਾਯਾਹ 55:6, 7 ਪੜ੍ਹੋ।

2. ਗੰਭੀਰ ਪਾਪ ਹੋਣ ਤੇ ਯਹੋਵਾਹ ਬਜ਼ੁਰਗਾਂ ਜ਼ਰੀਏ ਕਿਵੇਂ ਸਾਡੀ ਮਦਦ ਕਰਦਾ ਹੈ?

ਜੇ ਸਾਡੇ ਕੋਲੋਂ ਗੰਭੀਰ ਪਾਪ ਹੋ ਜਾਵੇ, ਤਾਂ ਯਹੋਵਾਹ ਸਾਨੂੰ ਕਹਿੰਦਾ ਹੈ ਕਿ ਅਸੀਂ ‘ਮੰਡਲੀ ਦੇ ਬਜ਼ੁਰਗਾਂ ਨੂੰ ਬੁਲਾਈਏ।’ (ਯਾਕੂਬ 5:14, 15 ਪੜ੍ਹੋ।) ਇਹ ਬਜ਼ੁਰਗ ਯਹੋਵਾਹ ਅਤੇ ਉਸ ਦੇ ਲੋਕਾਂ ਨਾਲ ਬਹੁਤ ਪਿਆਰ ਕਰਦੇ ਹਨ। ਉਹ ਚੰਗੀ ਤਰ੍ਹਾਂ ਜਾਣਦੇ ਹਨ ਕਿ ਯਹੋਵਾਹ ਨਾਲ ਦੁਬਾਰਾ ਰਿਸ਼ਤਾ ਜੋੜਨ ਵਿਚ ਕਿਵੇਂ ਸਾਡੀ ਮਦਦ ਕਰਨੀ ਹੈ।—ਗਲਾਤੀਆਂ 6:1.

ਬਜ਼ੁਰਗ ਕਿੱਦਾਂ ਸਾਡੀ ਮਦਦ ਕਰਨਗੇ? ਦੋ ਜਾਂ ਤਿੰਨ ਬਜ਼ੁਰਗ ਸਾਨੂੰ ਮਿਲਣਗੇ ਅਤੇ ਬਾਈਬਲ ਵਿੱਚੋਂ ਸਮਝਾਉਣਗੇ ਕਿ ਅਸੀਂ ਜੋ ਕੀਤਾ, ਉਹ ਕਿਉਂ ਗ਼ਲਤ ਹੈ। ਉਹ ਸਾਨੂੰ ਕੁਝ ਸਲਾਹਾਂ ਅਤੇ ਸੁਝਾਅ ਦੇਣਗੇ ਤਾਂਕਿ ਅਸੀਂ ਆਪਣੀ ਗ਼ਲਤੀ ਨਾ ਦੁਹਰਾਈਏ। ਉਹ ਸ਼ਾਇਦ ਇਹ ਫ਼ੈਸਲਾ ਕਰਨ ਕਿ ਜਦੋਂ ਤਕ ਯਹੋਵਾਹ ਨਾਲ ਸਾਡਾ ਰਿਸ਼ਤਾ ਦੁਬਾਰਾ ਮਜ਼ਬੂਤ ਨਹੀਂ ਹੋ ਜਾਂਦਾ, ਉਦੋਂ ਤਕ ਅਸੀਂ ਭਗਤੀ ਨਾਲ ਜੁੜੇ ਕੁਝ ਕੰਮਾਂ ਵਿਚ ਹਿੱਸਾ ਨਹੀਂ ਲੈ ਸਕਦੇ। ਪਰ ਜੇ ਇਕ ਵਿਅਕਤੀ ਗੰਭੀਰ ਪਾਪ ਕਰਨ ਤੋਂ ਬਾਅਦ ਵੀ ਤੋਬਾ ਨਹੀਂ ਕਰਦਾ, ਤਾਂ ਬਜ਼ੁਰਗ ਉਸ ਨੂੰ ਮੰਡਲੀ ਵਿੱਚੋਂ ਛੇਕ ਦੇਣਗੇ ਤਾਂਕਿ ਮੰਡਲੀ ਦੇ ਬਾਕੀ ਭੈਣਾਂ-ਭਰਾਵਾਂ ਉੱਤੇ ਬੁਰਾ ਅਸਰ ਨਾ ਪਵੇ।

 ਹੋਰ ਸਿੱਖੋ

3. ਪਾਪ ਕਬੂਲ ਕਰਨ ਨਾਲ ਰਾਹਤ ਮਿਲਦੀ ਹੈ

ਗੰਭੀਰ ਪਾਪ ਕਰ ਕੇ ਅਸੀਂ ਯਹੋਵਾਹ ਦਾ ਦਿਲ ਦੁਖੀ ਕਰਦੇ ਹਾਂ। ਇਸ ਲਈ ਸਾਨੂੰ ਉਸ ਅੱਗੇ ਆਪਣੇ ਪਾਪ ਕਬੂਲ ਕਰਨੇ ਚਾਹੀਦੇ ਹਨ। ਜ਼ਬੂਰ 32:1-5 ਪੜ੍ਹੋ। ਫਿਰ ਇਸ ਸਵਾਲ ʼਤੇ ਚਰਚਾ ਕਰੋ:

• ਆਪਣੇ ਪਾਪ ਲੁਕਾਉਣ ਦੀ ਬਜਾਇ ਯਹੋਵਾਹ ਸਾਮ੍ਹਣੇ ਇਨ੍ਹਾਂ ਨੂੰ ਕਬੂਲ ਕਰਨਾ ਕਿਉਂ ਵਧੀਆ ਗੱਲ ਹੈ?

 4. ਛੇਕੇ ਜਾਣ ਦੇ ਪ੍ਰਬੰਧ ਦੇ ਫ਼ਾਇਦੇ

ਜੇ ਇਕ ਵਿਅਕਤੀ ਗੰਭੀਰ ਪਾਪ ਕਰਦਾ ਹੈ ਅਤੇ ਯਹੋਵਾਹ ਦੇ ਅਸੂਲਾਂ ਨੂੰ ਮੰਨਣ ਤੋਂ ਇਨਕਾਰ ਕਰ ਦਿੰਦਾ ਹੈ, ਤਾਂ ਉਹ ਮੰਡਲੀ ਦਾ ਹਿੱਸਾ ਨਹੀਂ ਬਣਿਆ ਰਹਿ ਸਕਦਾ। ਇਸ ਕਰਕੇ ਉਸ ਨੂੰ ਛੇਕ ਦਿੱਤਾ ਜਾਂਦਾ ਹੈ। ਅਸੀਂ ਅਜਿਹੇ ਵਿਅਕਤੀ ਨਾਲ ਕੋਈ ਮੇਲ-ਜੋਲ ਨਹੀਂ ਰੱਖਦੇ, ਇੱਥੋਂ ਤਕ ਕਿ ਉਸ ਨਾਲ ਗੱਲ ਵੀ ਨਹੀਂ ਕਰਦੇ। 1 ਕੁਰਿੰਥੀਆਂ 5:6, 11 ਅਤੇ 2 ਯੂਹੰਨਾ 9-11 ਪੜ੍ਹੋ। ਫਿਰ ਇਸ ਸਵਾਲ ʼਤੇ ਚਰਚਾ ਕਰੋ:

• ਥੋੜ੍ਹਾ ਜਿਹਾ ਖਮੀਰ ਆਟੇ ਦੀ ਪੂਰੀ ਤੌਣ ਨੂੰ ਖਮੀਰਾ ਕਰ ਦਿੰਦਾ ਹੈ। ਉਸੇ ਤਰ੍ਹਾਂ ਜੇ ਅਸੀਂ ਅਜਿਹੇ ਵਿਅਕਤੀ ਨਾਲ ਮੇਲ-ਜੋਲ ਰੱਖਾਂਗੇ ਜਿਸ ਨੂੰ ਆਪਣੇ ਪਾਪ ਦਾ ਕੋਈ ਪਛਤਾਵਾ ਨਹੀਂ, ਤਾਂ ਮੰਡਲੀ ʼਤੇ ਕੀ ਅਸਰ ਪੈ ਸਕਦਾ ਹੈ?

 ਹੁਣ ਤਕ ਅਸੀਂ ਸਿੱਖਿਆ

ਭਾਵੇਂ ਸਾਡੇ ਕੋਲੋਂ ਗੰਭੀਰ ਪਾਪ ਹੋ ਜਾਂਦਾ ਹੈ, ਪਰ ਜੇ ਅਸੀਂ ਆਪਣੀ ਗ਼ਲਤੀ ਦਾ ਦਿਲੋਂ ਪਛਤਾਵਾ ਕਰਦੇ ਹਾਂ ਅਤੇ ਠਾਣ ਲੈਂਦੇ ਹਾਂ ਕਿ ਅਸੀਂ ਉਹ ਗ਼ਲਤੀ ਦੁਬਾਰਾ ਨਹੀਂ ਕਰਾਂਗੇ, ਤਾਂ ਯਹੋਵਾਹ ਸਾਨੂੰ ਮਾਫ਼ ਕਰ ਦੇਵੇਗਾ।

ਤੁਸੀਂ ਕੀ ਕਹੋਗੇ?

• ਯਹੋਵਾਹ ਅੱਗੇ ਆਪਣੇ ਪਾਪ ਕਬੂਲ ਕਰਨੇ ਵਧੀਆ ਗੱਲ ਕਿਉਂ ਹੈ?

• ਯਹੋਵਾਹ ਤੋਂ ਆਪਣੇ ਪਾਪਾਂ ਦੀ ਮਾਫ਼ੀ ਪਾਉਣ ਲਈ ਸਾਨੂੰ ਕੀ ਕਰਨ ਦੀ ਲੋੜ ਹੈ?

• ਜਦੋਂ ਸਾਡੇ ਕੋਲੋਂ ਕੋਈ ਗੰਭੀਰ ਪਾਪ ਹੋ ਜਾਂਦਾ ਹੈ, ਤਾਂ ਸਾਨੂੰ ਬਜ਼ੁਰਗਾਂ ਦੀ ਮਦਦ ਕਿਉਂ ਲੈਣੀ ਚਾਹੀਦੀ ਹੈ?