Tin biaha, lo bo comete fayo a pesar cu bo ta stima Jehova hopi y ta haci esfuerso pa evita di hacie tristo. Sinembargo, tin pica ta mas serio cu otro. (1 Corintionan 6:9, 10) Si bo a comete un pica serio, corda esaki: Jehova no a stop di stima bo, y e ta cla pa pordona bo y yuda bo.

1. Kico nos mester haci pa Jehova pordona nos?

Hende cu ta stima Jehova ta bira masha tristo ora nan realisa cu nan a comete un pica serio. Pero Jehova ta consola nan cu e promesa cu el a haci na su pueblo: “Maske boso picanan ta cora manera sanger, nan lo bira blanco manera sneeuw.” (Isaias 1:18) Si nos arepenti di curason, Jehova lo pordona nos completamente. Con nos ta demostra cu nos a arepenti? Nos ta demostra esey ora nos ta sinti duele profundo di loke nos a haci, ta stop di haci loke ta malo y ta pidi Jehova pa pordona nos. Despues, nos ta haci tur nos esfuerso pa cambia cualkier mal pensamento of custumber cu a hiba nos na comete e pica. Anto, nos ta sigui haci esfuerso pa biba di acuerdo cu Jehova su normanan moral limpi.—Lesa Isaias 55:6, 7.

2. Con Jehova ta uza e ancianonan pa yuda nos ora nos peca?

Si nos comete un pica serio, Jehova ta bisa nos pa “yama e ancianonan di congregacion.” (Lesa Santiago 5:14, 15.) E ancianonan ta stima Jehova y su carnenan. Nan a siña con pa yuda nos drecha nos relacion cu Jehova.​—Galationan 6:1.

Con e ancianonan ta yuda nos si nos comete un pica serio? Dos of tres anciano lo uza texto di Bijbel pa mustra nos dicon loke nos a haci ta robes. Ademas, nan lo duna nos bon conseho y animacion cu por yuda nos pa no bolbe comete pica serio. Kisas nan por bisa nos tambe cu nos no por haci cierto cos den congregacion te ora cu nos tin un bon amistad cu Jehova atrobe. Si un persona cu a comete pica serio no arepenti, e ancianonan lo expulsa e persona aki for di e congregacion pa e no influencia otro hende den congregacion.

 KICO MAS NOS POR SIÑA?

3. Ora nos confesa nos pica, nos por drecha nos amistad cu Jehova

Cualkier pica cu nos comete ta duel Jehova. Pesey, nos tin cu confesa na dje. Lesa Salmo 32:1-5. Despues, analisa e siguiente pregunta:

• Dicon ta bon pa nos confesa nos picanan na Jehova en bes di purba sconde nan?

 4. Cu kico expulsion ta yuda?

Si un persona cu a comete un pica serio ta nenga di obedece Jehova su normanan, e no por forma parti mas di e congregacion. E persona ey ta ser expulsa, y pesey nos no ta pasa tempo mas cu ne ni papia cu ne. Lesa 1 Corintionan 5:6, 11 y 2 Juan 9-11. Despues, analisa e siguiente pregunta:

• Mescos cu zuurdeeg ta fermenta henter un mansa, con pasamento di tempo cu un pecador cu no a arepenti ta afecta e congregacion?

 RESUMEN

Si nos a comete un pica serio pero nos ta sinti duele profundo di loke nos a haci y nos ta determina pa no bolbe comete e pica ey, Jehova lo pordona nos.

Repaso

• Dicon ta bon pa nos confesa nos picanan na Jehova?

• Kico nos mester haci pa Jehova pordona nos picanan?

• Si nos a comete un pica serio, dicon ta bon pa nos busca yudansa cerca e ancianonan?