Kweꞌsxyuꞌ Jeuwaꞌs wala wẽdxithaꞌw, txãa paꞌka knxusuꞌj wẽjeçmeethaꞌw. Nawa maa eenteyuꞌ ãhmeesa paꞌka ewmeethaꞌw yũu (1 Korintios 6:9, 10). Pkaal kazxsate weteçxa kũj yahkxnu, Jeuwayuꞌ idxaꞌs peeykãhçxa peltunaĩna, txaꞌwẽy puꞌçxhina ewmeesaꞌs nvxihtkahn.

1. ¿Kĩh yũuwaꞌj jiꞌphkxthaꞌw Jeuwa peltunãykahn?

Teeçx nasa pkaalte weteçxa, wala nxuswaꞌj jiꞌphune Jeuwaꞌs peeykãhn ũs paꞌka. Nawa Jeuwayuꞌ wala kvxiisxãꞌjane nyaafxtey maꞌwne txãjx çxhabaꞌs kvxiisxãꞌj, ãçxhwa txaꞌwẽy. “Iꞌkweꞌsx pkaaltxiꞌs behsa naꞌwẽ yũun kaahte nawa ewmeesaꞌs nvxihtteyuꞌ çxihme naꞌwẽ yũuna”, Jeuwayuꞌ txãꞌwku ptaꞌsxiꞌ (Isaías 1:18). Ewmeesaꞌs jxukate ũus yahkxçxa nvxihtte Jeuwayuꞌ peltunaĩna. ¿Txãa weꞌwnisate maꞌw yũuçxa kxtey yuun kahakxthaꞌw? Pkaal paꞌka wala nxuswaꞌj jiꞌphuneꞌtkhaꞌw, nawa txaꞌwẽy ewmeesaꞌs nvxihtçxa, Jeuwaꞌs peltun pẽhyna. Txãꞌw yũuçxa Jeuwa yakh ew selpiina fxiꞌzeyaꞌ ewuunaꞌw (lẽeywe Isaías 55:6, 7).

2. ¿Pkaalte wetete Jeuwayuꞌ kweꞌsxtxiꞌs maꞌw kikh puꞌçxhi thẽꞌjsaweꞌsx yakh?

Pkaalte wetete Jeuwayuꞌ naꞌwne yuꞌkxpehe: Thẽꞌjsa congregacionteweꞌsxtxiꞌs mpaꞌyawe (lẽeywe Santiago 5:14, 15). Txãaweꞌsxyuꞌ espíritu santoju txhitxhniꞌsayã. Txãaweꞌsxaꞌ Jeuwan peeykãhaneꞌta saꞌ txaꞌwẽy idxnawa peeykãhaneꞌta. Txãa thẽꞌjsaweꞌsxyuꞌ wala jiisayã, kiꞌkin Jeuwa yakh namiku yuuyã puꞌçxhiyã (Gálatas 6:1).

Pkaalte wetete thẽꞌjsaweꞌsxyuꞌ, ¿maꞌw kitx puꞌçxhi? Thẽꞌjsaweꞌsxyuꞌ puꞌçxhineꞌta, Dxus eçte lẽeyna kaajiyuꞌjuneꞌta idx ãhmee yũuniꞌs, txaꞌwẽy kvxiisxãꞌjn yuꞌkxpehn pkaalte peena wetekahmeen. Thẽꞌjsa idx yakh weꞌwçxayuꞌ idxaꞌs kaajiyuꞌjneꞌta kĩh yũuwaꞌj jiꞌphtewa. Txaꞌwẽy pkaalte weteçxa pkaalaꞌs nvxihtyaꞌ walteyuꞌ, thẽꞌjsaweꞌsxyuꞌ congregacionu kutxiꞌjiyã, txãꞌw yũuçxayuꞌ congregacionaꞌs nweꞌwyaꞌ ãjayã.

 WEJXKWEÇXA PIYAN UꞌJWEKA

3. Pkaalaꞌs kbeesaaĩꞌteyuꞌ puꞌçxhina

Pkaalte wetete Jeuwayuꞌ wala nxusuꞌjne, txãa paꞌka pkaaltxiꞌs kbeesaaĩꞌwaꞌj jiꞌphnetkhaꞌw Jeuwan. Lẽeywe Salmo 32:1-5, txajuꞌ naa paapẽynisatxis paswe:

• Pkaalaꞌs suthteꞌ wala ewmeesana, ¿kĩh yũuçxa?

 4. Yakhthẽꞌj ewmee yũu ũspaꞌka kutxiꞌjneꞌta, ¿congregacionaꞌs maꞌw puꞌçxhiꞌkx?

Teeçx yakhthẽꞌj pkaalte weteçxa yuꞌptheꞌjyaꞌ waꞌlte, congregacionu kutxiꞌjneꞌta. Kĩhçxa txãa yakhwa pkhakheçmeeneꞌta saꞌ txaꞌwẽy weꞌweçmeeneꞌta. Txãꞌw yũuçxaneꞌta congregacionaꞌs nweꞌwe. Lẽeywe 1 Korintios 5:6, 11 vxiteꞌ 2 Juan 9-11, txajuꞌ naa paapẽynisatxis paswe:

• Pan vxit wẽeçxa leçxkweçxa levadura abte txãa masate jxuka peethẽhene. Yakhthẽꞌj pkaalte weteçxa yuꞌptheꞌjyaꞌ waꞌlte, ¿congregacionaꞌs jxuka suwuuyaꞌ ãjamaꞌk?, ¿kĩh yũuçxa?

 ¿AYTE PAꞌJ KĨHKXTHAꞌW PIYA?

Pkaalte weteçxa kiꞌ arrepentĩite Jeuwayuꞌ peltunaĩna.

¿Kĩh pasuguigk?

• ¿Maꞌw wala ewki pkaalaꞌs Jeuwan kbeesaaĩꞌte?

• ¿Kĩh yũuwaꞌj jiꞌphkxthaꞌw Jeuwa kweꞌsxtxiꞌs peltunãykahn?

• Pkaal kazxsate weteçxa, ¿kĩh yũuçxa thẽꞌjsatx pakwewaꞌj jiꞌphkxthaꞌw puꞌçxhkahn?