اَسی یہوواہ نُوں بوہت پیار کرنے آں تے ایہو جیہا کوئی وی کم نئیں کرنا چاہندے جدے توں اوہ دُکھی ہووے۔ پر فیر وی کدی کدار ساڈے کولوں غلطیاں ہو جاندیاں نیں تے کجھ غلطیاں بوہت وڈیاں ہوندیاں نیں۔ (‏1-‏کُرنتھیوں 6:‏9، 10‏)‏ جے تواڈے کولوں کوئی سنگین گُناہ ہو وی جاندا اے تے یاد رکھو کہ یہوواہ توانوں پیار کردا رہوے گا۔ اوہ توانوں معاف کرن لئی تیار رہندا اے تے تواڈی مدد کرنا چاہندا اے۔‏

1.‏ سانوں یہوواہ کولوں معافی لین لئی کیہہ کرنا چاہی دا اے؟‏

جدوں یہوواہ نُوں پیار کرنے والے کسے بندے کولوں سنگین گُناہ ہو جاندا اے تے اوہ غم دے بوجھ تھلے دَب جاندا اے۔ پر یہوواہ دے ایس وعدے توں اوہنوں تسلی تے حوصلہ مِلدا اے کہ جے تیرے گُناہ لال سُرخ وی ہون تے اوہ برف وانگوں چٹے ہو جان گے۔‏ (‏یسعیاہ 1:‏18‏)‏ جے اَسی دلوں توبہ کراں گے تے یہوواہ سانوں معاف کر دے گا۔ پر توبہ کرن چ کیہہ کجھ شامل ہوندا اے؟ ایہدے چ اپنی غلطی تے پچھتانا، غلط کم نُوں چھڈنا تے یہوواہ کولوں معافی لئی مِنت کرنا شامل اے۔ نالے اپنی سوچ تے اوہناں عادتاں نُوں بدلنا وی شامل اے جنہاں دی وجہ توں اَسی گُناہ کیتا سی۔ ایہدے علاوہ یہوواہ دے معیاراں مطابق زندگی گزارن دی کوشش کرنا وی سچی توبہ کرن دا ثبوت ہوندا اے۔—‏یسعیاہ 55:‏6، 7 نُوں پڑھو۔‏

2.‏ جدوں اَسی کوئی گُناہ کرنے آں تے یہوواہ بزرگاں دے ذریعے ساڈی مدد کیویں کردا اے؟‏

یہوواہ نے سانوں نصیحت کیتی اے کہ جے ساڈے کولوں کوئی سنگین گُناہ ہو جائے تے سانوں کلیسیا دے بزرگاں نُوں بلا‌نا چاہی دا اے۔ (‏یعقوب 5:‏14، 15 نُوں پڑھو۔)‏ بزرگ یہوواہ خدا تے اوہدے بندیاں نال بوہت پیار کردے نیں۔ اوہناں نُوں ساڈی مدد کرن دی تربیت دِتی گئی اے تاکہ اَسی یہوواہ نال اپنے ٹُٹے ہوئے رشتے نُوں جوڑ سکئے۔—‏گلتیوں 6:‏1‏۔‏

جے ساڈے کولوں کوئی سنگین گُناہ ہو جائے تے بزرگ ساڈی مدد کیویں کردے نیں؟ دو یاں تِن بزرگ پاک کلام دی مدد نال ساڈی درستی کردے نیں۔ اوہ سانوں حوصلہ تے چنگے مشورے دیندے نیں تاکہ اَسی فیر گُناہ نہ کرئیے۔ شاید اوہ سانوں کہن کہ اَسی اوہدوں تک کلیسیا چ کجھ کم نئیں کر سکدے جدوں تک یہوواہ نال ساڈا رشتہ بحال نئیں ہو جاندا۔ جے سنگین گُناہ کرن والا کوئی بندہ توبہ نئیں کردا تے بزرگ اوہنوں کلیسیا چوں کڈھ دیندے نیں تاکہ اوہدا بھیڑا اثر کلیسیا تے نہ پووے۔‏

 ہور سوچ‌وچار لئی

3.‏ گُناہ دا اِقرار کرن نال یہوواہ نال ساڈا رشتہ فیر توں جُڑ سکدا اے

جدوں اَسی گُناہ کرنے آں تے یہوواہ نُوں تکلیف پونچ دی اے۔ ایس لئی ضروری اے کہ اَسی اوہدے حضور اپنے گُناہ دا اِقرار کرئیے۔ زبور 32:‏1-‏5 نُوں پڑھو تے فیر ایس سوال تے گل بات کرو:‏

• ساڈے لئی ایہہ چنگا کیوں ہوئے گا کہ اَسی اپنے گُناہواں نُوں لُکا‌ن دی بجائے یہوواہ دے حضور ایہناں دا اِقرار کرئیے؟‏

 4.‏ کسے نُوں کلیسیا چوں کڈھن دا کیہہ فائدہ ہوندا اے؟‏

جے سنگین گُناہ کرن والا کوئی بندہ یہوواہ دے اصولاں تے چلن توں اِنکار کر دیندا اے تے اوہ کلیسیا چ نئیں رہ سکدا۔ اوہنوں کلیسیا چوں کڈھ دِتا جاندا اے تے فیر اَسی اوہدے نال نہ تے کوئی میل‌جول رکھنے آں تے نہ ای کوئی گل بات کرنے آں۔ 1-‏کُرنتھیوں 5:‏6،‏ 11 تے 2-‏یوحنا 9-‏11 نُوں پڑھو تے فیر ایس سوال تے گل بات کرو:‏

• جیویں تھوڑے جہے خمیر نال سارا آٹا خمیر ہو جاندا اے اونویں ای توبہ نہ کرن والے بندے نال میل‌جول رکھن دا کلیسیا تے کیہہ اثر ہو سکدا اے؟‏

 خلاصہ

جے ساڈے کولوں کوئی سنگین گُناہ ہو جائے تے سانوں دلوں توبہ کرنی چاہی دی اے۔ نالے سانوں ایہہ ارادہ کرنا چاہی دا اے کہ اَسی دُبارہ اوہ گُناہ نئیں کراں گے۔ اِنج یہوواہ سانوں معاف کرے گا۔‏

دہرائی

• سانوں یہوواہ دے حضور اپنے گُناہواں دا اِقرار کیوں کرنا چاہی دا اے؟‏

• سانوں کیہہ کرنا چاہی دا اے تاکہ یہوواہ ساڈے گُناہ معاف کر دَوے؟‏

• جے ساڈے کولوں کوئی سنگین گُناہ ہو جائے تے سانوں بزرگاں کولوں مدد کیوں لینی چاہی دی اے؟‏