Atoobʼ ta inawaaj wach i Jehová ruukʼ chuʼnchel akʼux eh maʼ inawaaj ta atiʼbʼisam rukʼux ruukʼ taqeh i ne nabʼan, wilik pech ne tiqʼehbʼik. Xa reʼ laʼ wilik taqeh mahk xti nim wach (1 Corintios 6:​9, 10). Mi reʼ hat nim wach amahk kʼoloq pan akʼux chi reʼ Jehová maʼ ne ta tiruqʼebʼ, ne iraaj rukuyum amahk eh ne tirutobʼeej.

1. ¿Chajariik ko ruman chi naqabʼanam reh chi reʼ Jehová ne irukuy qamahk?

Noq jenoʼ kʼachareel iraaj wach i Jehová eh irukoj rehtaal chi xubʼan jenaj nimlaj mahk, maʼ suq ta chik irikʼraaj riibʼ. Xa reʼ laʼ reʼ Jehová iruyeew rukowiil rukʼux ruukʼ taqeh qʼorik xuqʼor reh i rutinamiit najtir cho qʼiij: «Atoobʼ ta xa chʼuwaʼ taq chik wach awánima ruum amahk, reʼ hin neenukanaaʼ chi xa jeʼ chik saqpotzʼik laj suutzʼ» (Isaías 1:​18). Mi xqayotʼ qakʼux ruum xqabʼan reʼ Jehová ne irukuy qamahk. ¿Chajariik iraaj ruqʼorom chi naqayotʼom qakʼux? Iraaj ruqʼorom chi intiʼbʼik qakʼux chi riij i maʼ holohik ta xqabʼan, inqakanaaʼ rubʼanariik eh inqapahqaaj kuybʼal qamahk reh i Jehová. Jeʼ reʼ noq, naqakojom qakʼux reh rujaljiik taqeh inqakapaaj eh taqeh xubʼan chi xojmahkunik eh ne inqatoqʼaaʼ rukojariik pan qakʼachariik taqeh rukʼuhbʼaal saq wach i Jehová (chawil Isaías 55:​6, 7).

2. Mi xojmahkunik, ¿nikʼwach qatoobʼjik irubʼan i Jehová noq irukoj taqeh kʼamal bʼeeh?

Reʼ ajwach irubʼan jenoʼ nimlaj mahk, reʼ Jehová iruqʼor reh i naʼojbʼal wilih: «Chuqʼoreej taqeh i kʼamal bʼeeh reh i molaabʼ» (chawil Santiago 5:​14, 15, TNM). Reʼ taqeh winaq wilih sikʼooj kiwach ruukʼ santo laj uxlabʼal, inkaaj wach i Jehová eh inkaaj woʼ wach taqeh tentzun, tijimaj taqeh reh qatoobʼjik eh chi ne inkikowej i qamigohiil ruukʼ i Dios (Gálatas 6:1).

¿Nikʼwach qatoobʼjik inkibʼan taqeh kʼamal bʼeeh mi xqabʼan jenoʼ nimlaj mahk? Kiʼibʼ oon ixibʼ chi kʼamal bʼeeh ne qojkitobʼeej rureqariik chi riij ruukʼ i Santo Laj Huuj chaaj woʼ reet maʼ holohik ta xqabʼan. Eh ne woʼ inkiyeew qaholohik naʼojbʼal eh rukowiil qakʼux reh chi maʼ ne ta chik inqabʼan i mahk reʼreʼ. Mareh taqeh kʼamal bʼeeh wilih ne inkiqʼor qeh chi wilik taqeh kamanik maʼ ne ta chik inqabʼan pan molaabʼ, reʼ keh ko na chik kiqʼorom qeh jaruuj noq hoj oq chik kow pan uxlabʼal. Mi jenoʼ kʼachareel irubʼan jenoʼ nimlaj mahk eh maʼ iruyotʼ ta rukʼux, reʼ taqeh kʼamal bʼeeh nakisam chi testigo reh Jehová reh rukoʼljiik i molaabʼ ruukʼ i maʼ holohik ta irubʼan.

 CHATZʼIR RIIJ I KʼAHCHIʼ ATIJEM

3. Ruqʼorariik i qamahk ne qojrutobʼeej reh chi ne qojkowjik pan uxlabʼal

Reʼ mahk inqabʼan irutiʼbʼisaj rukʼux i Jehová ruum aj reʼ, naqaqʼorom reh i xojmahkunik wiiʼ. Chawil taq i Salmo 32:​1-5 eh tiqʼoroq taq chi riij:

• Jeʼ rukabʼ xqil pan texto, ¿chajariik ne inqakʼul mi xqakebʼaaʼ (xqakʼol) i qamahk chuwach i Jehová? Ruum aj reʼ, ¿chaaj woʼ reet ko ruman chi ne inqaqʼor i qamahk reh i Jehová?

 4. Noq inehsjik jenoʼ chi testigo reh Jehová reh chi maʼ ne ta iruchʼuwaʼreej wach i molaabʼ

Mi jenoʼ irubʼan jenoʼ nimlaj mahk eh maʼ iraaj ta runimam taqeh rukʼuhbʼaal i Jehová, maʼ ne ta chik irubʼan chi ne inwihʼik chi testigo reh Jehová pan molaabʼ. Jeʼ reʼ noq maʼ qojwihʼik ta chik ruukʼ eh ni xa ta chik inqaqʼoreej. Chawil taq i 1 Corintios 5:​6, 11 eh 2 Juan 9-​11, eh tiqʼoroq taq chi riij:

• Jeʼ rukabʼ xawil pan texto, reʼ chʼambʼesbʼal iruchʼambʼisaj chuʼnchel i qʼoor reh i kaxlan wiʼk, jeʼ reʼ noq ¿chajariik ne irukʼul i molaabʼ mi reʼ hoj xojwihʼik chi kixilak i maʼ inkiyotʼ ta kikʼux? ¿Chaaj woʼ reet jeʼ reʼ inaqʼor?

 KʼOLOQ PAN AKʼUX

Mi laʼ pan korik xqayotʼ qakʼux chi riij i nimlaj mahk xqabʼan eh mi xqakoj qakʼux chi maʼ ne ta chik inqabʼan, reʼ Jehová ne irukuy qamahk.

Reʼ xkahnik pan akʼux

• ¿Chaaj woʼ reet qʼeʼ atoobʼ chi ne inqaqʼor i qamahk reh i Jehová?

• ¿Chajariik naqabʼanam reh chi reʼ Jehová ne irukuy qamahk?

• Mi xqabʼan jenoʼ nimlaj mahk, ¿chaaj woʼ reet naqapahqaam qatoʼbʼaal keh taqeh kʼamal bʼeeh?