57 YACHACHIKUY
¿Imam kanman hatun huchaman wichiykuptinchik?
Diosta tukuy sunquykiwan kuyaspaykipas wakinpiqa hatun huchamanmi wichiykuwaq (1 Corintios 6:9, 10). Haykapipas chaynapi tarikuspaykiqa yuyariy Jehova Dios pampachasunaykita, manam pantarusqaykiraykuchu payqa saqirusunki.
1. ¿Huchallikuruq imayna kaptintaq Jehova Diosqa pampachaykunqa?
Pipas Diosta kuyachkaspan hatun huchaman wichiykuspanqa llumpay llakisqam tarikun. Ichaqa Diosmi niwanchik: “Pukay-pukayña huchaykichik kaptinpas, ritita hinam yuraqyachisaq”, nispa (Isaias 1:18). Arí, sunqumanta wanakuptinchikqa Diosqa pampachaykuwanchikmi. Ichaqa, ¿imaynatam sunqumanta wanakunanchik? Chaypaqqa mana allin ruwasqanchikmantam pesakunanchik hinaspam mana allin ruwasqanchiktaqa manaña ruwananchikchu. Chaymantapas, Diosninchiktam mañakunanchik pampachaykuwananchikpaq. Kallpanchakunanchiktaqmi mana allinkunapi manaña piensanapaqpas, huchaman aysawaqninchik kaqkunata saqinapaqpas chaynataq Diospa munasqanman hinaña kawsakunapaqpas (leey Isaias 55:6, 7).
2. ¿Imaynatam Diosqa huchallikuqta punta apaqkunawan yanapan?
Hatun huchaman wichiykuqkunatam Dios nin: “Iñiqkuna ukupi punta apaqkunatayá qayakuchun”, nispa (leey Santiago 5:14, 15). Iñiqkunapi punta apaqkunaqa Jehova Diosta hinaspa iñiqmasinchikkunatam kuyanku. Paykunaqa allin yachachisqam kachkanku huchallikuq runata yanapaykunankupaq, chaynapi Diosman kutirikunanpaq (Galatas 6:1).
Pipas hatun huchaman wichiykuptinqa iñiqkunapi punta apaqkunam iskay utaq kimsa huñunakunku hinaspam bibliawan rimapayanku mana allin ruwasqanmanta cuentata qukunanpaq. Ninkutaqmi huchallikuyman manaña wichiykunanpaq imata ruwananpaqpas. Ichapas punta apaqkunaqa huchallikuqta ninqa huñunakuypi imapipas yanapakusqanta saqinanpaq. Huchallikuq yanapasqa kachkaspa mana wanakuspanmi ichaqa qarqusqa kanqa. Chaynataqa tantianku wakin iñiqmasinku allin kanankupaqmi.
ASTAWAN YACHAYKUSUN
Jehova Diosqa anchata kuyawasqanchikraykum tukuyta ruwaspa yanapawanchik hatun huchamanña wichiykuptinchikpas.
3. Huchanchikta willakuyqa allinninchikpaqmi
Huchaman wichiykuspaqa Diostam llakichinchik, chaymi huchanchikmanta willakunanchik. Leeychik Salmos 32:1-5 hinaspa rimariychik:
-
¿Imanasqataq huchallikuruspaqa mana pakaspa lliwta Diosman willakunanchik?
Huchallikurusqanchikmanta Diosman willakuspanchikpas sunqunchik tiyaykunanpaqmi punta apaqkunapa yanapakuyninta maskananchik. VIDEOTA qawaykuychik hinaspa rimariychik:
-
Videopi qawasqanchik iñiqmasinchik Diosman kutirikunanpaq, ¿imaynatam punta apaqkuna yanaparqa?
Imam kaqtam punta apaqkunaman willakunanchik. Punta apaqkunaqa yanapaykuytam munawanchik. Leeychik Santiago 5:16 hinaspa qatiqninmanta rimariychik:
-
¿Imanasqataq punta apaqkunamanqa imam kaqta willakunanchik?
Huchaman wichiykuspaqa Diosmanmi willakunayki, punta apaqkunamanpas imam kaqtam willakunayki, hinaspapas nisusqaykitam kasukunayki.
4. Mana wanakuqta qarquyqa llapanchikpa allinninchikpaqmi
Pipas hatun huchaman wichiykuspan qalaypaq mana wanakuqqa qarqusqam kanan. Qarqusqa kasqanraykum paywanqa manaña hukllawakuchwanchu nitaq rimachwanchu. Leeychik 1 Corintios 5:6, 11 hinaspa 2 Juan 9-11, chaymantañataq qatiqninmanta rimariychik:
-
Aslla levadurawanmi masapas puqun. Chayrayku, ¿allinchu kanman huchanmanta mana wanakuqwan hukllawakuyninchik? ¿Imaynanpi?
Qarqusqa kasqankum achkata yanaparqa mana allin ruwasqankumanta cuentata qukunankupaq hinaspa Jehova Diosman kaqmanta kutimunankupaq (Salmos 141:5). VIDEOTA qawaykuychik hinaspa qatiqninmanta rimariychik:
-
¿Soniataqa yanaparqachu qarqusqa kasqan mana allin ruwasqankunamanta cuentata qukunanpaq?
Pipas qarqusqa kaptinqa:
-
¿Imanasqataq Jehova Diospa sutinqa manaña pinqaypiñachu?
-
¿Imaynatam yachanchik Dios kuyawasqanchikta hinaspa mana allin ruwaykunata chiqnisqanta?
5. Huchanchikmanta wanakuptinchikqa Diosqa pampachaykuwanchikmi
Jesusmi rikchanachiywan willakurqa pipas huchanmanta wanakuptin Jehova Dios kusikusqanmanta. Leeychik Lucas 15:1-7 hinaspa qatiqninmanta rimariychik:
-
Kay willakuywanqa, ¿Jehova Dios imayna kasqantam Jesusqa yachachiyta munarqa?
Leeychik Ezequiel 33:11 hinaspa qatiqninmanta rimariychik:
-
Pipas Diospa pampachasqan kayta munaqqa, ¿imatam saqinan?
Jehova Diosqa oveja michiq hinam, llapanchikmantam llakikun.
WAKINKUM NINKU: “Manchakunim punta apaqkunaman huchayta willakuytaqa, huchallikurusqayta yacharuspankuqa qarquruwanqachá”, nispa.
-
Chaynata nisuptiki, ¿ima niwaqtaq?
YUYARIYKUSUN
Hatun huchaman wichiykuptinchikpas sunqumanta wanakuspa chay mana allinkunata manaña ruwaptinchikqa Jehova Diosqa pampachaykuwasunmi.
¿Ima niwaqtaq?
-
¿Imanasqataq allin Jehova Diosman huchanchikta willakuyqa?
-
¿Imatam ruwananchik huchanchikta Jehova Dios pampachawananchikpaq?
-
¿Imanasqataq punta apaqkunaman willakunanchik hatun huchaman wichiykuspaqa?
ASTAWAN YACHANAYKIPAQ
Isaias 1:18 nisqanpim nin Jehova Diosqa pampachakuykuq kasqanta, chaytam huk runa yacharurqa. Paymanta videopi qawaykuy.
Amayá iskayrayasunchu Jehova Dios kuyakuqllaña kasqanmantaqa (5:02)
¿Imanasqataq pipapas qarqusqa kayninqa kikinpaqpas chaynataq ñuqanchikpaqpas allin? Chayta kaypi leeykuy.
“Diosqa corregiwaspanchikmi kuyawasqanchikta qawachin” (Willakuq, 15 mayo 2015)
¿Imaynatataq mana testigo kaqman willachwan imanasqa pipas qarqusqa kasqanmanta? Chaymanta leeykuy.
¿Imaynatam huk runa yacharurqa payman kutirikunanpaq Dios yanapasqanta? Paymanta kaypi leeykuy.
“Bibliam imayna kawsasqanta cambiarqa” (Tarinkim jw.org nisqanpi)
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
