Masqui Jehovata lluy śhun’uyquiwan cuyalpis, pero ayveces palpuluchwanmi juchaman. Pero canmi mas jatun juchacunapis (1 Corintios 6:9, 10). Jatun juchacta lulaluptiquipis, yalpay Jehová manam caćhaycuśhunquichu, aśhwanpa listum cayan perdonaśhunayquipä ñatac yanapaśhunayquipä.

1. ¿Imactam lulananchic Jehová perdomananchicpä?

Mayanpis Jehovata cuyá jatun juchaman palpulul alli-allictam llaquicun. Pero Jehová nimanchicmi: ‘Juchanchiccuna masqui yawarnü puca cayaptinpis, nievinü yulä-yuläman muyuycachiśhamá caycun’a’ (Isaías 1:18). Śhun’unchicpi wanaculuptinchic, Jehová perdonamanchicmi. Pero, ¿imanuypam śhun’unchicpi wanacunchic? Mayanpis wanaculuptin jucha lulaśhampi śhun’unpis nananmi, manañam juchacta lulan’ñachu, aśhwanpa Jehovatam mañacun perdonananpä. Chaypi’a alli-allictam callpanchacun piensayninta cambiananpä ñatac viciuncunacta caćhaycunanpä Diospa munaśhannüña cawsacunanpä (liguicuy Isaías 55:6, 7).

2. Juchacta lulaluptinchic, ¿imanuypam Jehová yanapamanchic punta-lï-yaśhacunawan?

Jatun juchaman palpücunata Jehová nin: ‘Punta-lï-yaśhacunata ayay’ (liguicuy Santiago 5:14, 15). Punta-lï-yaśhacunaca cuyapäcunmi Jehovata ñatac hermanuncunacta, paycuna allin yaćhachiśhan cayan juchaman palpücunata yanapaycunanpä (Gálatas 6:1).

¿Imanuypam yanapamanchic punta-lï-yaśhacunaca juchaman palpuluptinchic? Ishcay o quimsa punta-lï-yaśhacunam Bibliawan entindichimäśhun jucha lulaśhanchic mana allin caśhanta. Chaypi’a allin consejucunactam umäśhun manaña juchamam palpunanchicpä. Ichapis nimäśhun feninchic masïsu canancama manala congregacioncäćhu participananchicpä. Mayanpis jatun juchacta lulalcul mana wanacuptin aluśham can’a, congregacioncäta proteginanpä.

 MASTA YAĆHAYCUŚHUN

3. Juchanchicta willayca allin ninchicpämi

Juchaman palpuluptinchic Jehovatam llaquichinchic, chaymi juchanchicpi willacunanchic. Liguiśhun Salmos 32:1-5 ñatac limaśhun caypi:

• ¿Imapïmi juchanchicta mana pacallal lluyta willananchic Jehovaman?

 4. Juchapacücäta aluyca quiquinpäpis allinmi ñatac congregacioncäpäpis

Mayanpis jatun juchacta lulalul manaña wanacuptin’a aluśhan can’a congregacioncäpi. Aluśhawan manañam cusca caśhunchu, nï limaycuśhunchu. Liguiśhun 1 Corintios 5:6, 11 ñatac 2 Juan 9-11, ñatac limaśhun caypi:

• Aśhllay levadurallam pu’uchin mäsata, chayurá ¿allinchun canman juchanpi mana wanacü nunawan cusca captinchic?

 IMACTAM YAĆHALUNCHIC

Juc jatun juchaman palpulul śhun’unchicpi wanaculuptinchic ñatac manañam chay juchata lulananchicchu, chaymi Jehová perdonamäśhun.

Yalpaśhun

• ¿Imapïmi allin canman willananchic juchanchicpi Jehovata?

• ¿Imactam lulananchic Jehová juchanchicpi perdonamänanchicpä?

• Jatun juchaman palpuluptinchic, ¿imapïmi mañacunanchic punta-lï-yaśhacunapa yanapayninta?