LEKCIJA 57
So te kereha baro binos?
Igen kames le Jehovas. Paťas, hoj leske ňisoha na kames te kerel dukh. Aľe šaj pes ačhel, hoj kereha vareso nalačho. A so te kereha fest baro binos? (1. Korinťanom 6:9, 10) Te kereha baro binos, ma bister, hoj o Jehovas tut vaš kada na preačhela te kamel! Kamel tuke te odmukhel a te pomožinel, kaj leha te aves pale lačho.
1) So kampel te kerel, kaj amenge o Jehovas te odmukhel?
Te keraha baro binos, džala amenge la žaľatar te pukinel o jilo. Bo džanas, hoj kerďam bari dukh le Jehovaske. Aľe so amenge akor šaj pomožinel? Le Jehovaskere lava: „Choč tumare bini hine igen lole, ena žužarde sar parno jiv.“ (Izaiáš 1:18) Te o Jehovas dikhela, hoj jilestar bajinas, hoj les fest dukhaďam, akor amenge rado odmukhela. Aľe sar sikavaha, hoj jilestar bajinas? Aleha, hoj amenge zdžungľiľa oda, so kerďam. Hoj oda imar ňigda na kamas pale te kerel. A hoj peraha pro khoča a mangaha le Jehovas, kaj amenge te odmukhel. A paľis mušinas te odčhivel sa, so bi amen pale cirdelas ko binos. A te chudel pale te dživel avka sar kamel o Jehovas. (Pregen Izaiáš 55:6, 7)
2) Sar amenge o Jehovas pomožinel prekal o zborova phuredera?
Te kerďam baro binos, o Jehovas amenge phenel, kaj ke peste te vičinas le zborove phurederen. (Pregen Jakub 5:14, 15) O zborova phuredera igen kamen le Jehovas a tiš dojekhes phrales the dojekha pheňa. O Jehovas len diňa andro zboros, kaj amenge te pomožinen te el pale lačhe le Jehovaha. (Galaťanom 6:1)
Sar amenge pomožinen o phuredera? Duj abo trin phuredera amenge andal e Devleskero lav sikavena, soske hin igen nalačho oda, so kerďam. Paľis amenge phenena, so te kerel, kaj pale te na peras andre koda binos. A tiš pes šaj ačhel, hoj pre varesavo časos amen našťi keraha vareso andro zboros. Kampela časos, kaj amaro kamiben kijo Jehovas pale te zoraľol. Aľe te o manuš na bajinela oda, so kerďa, ela andal o zboros čhido avri. Soske? Kaj koda manuš te na scirdel kijo binos avren andal o zboros.
DODŽAN TUT BUTER
Sar amenge o Jehovas kamel te pomožinel, te kerďam baro binos. A soske hin oda le Jehovastar oda nekfeder, so predal tute kamel.
3) Te phenaha avri, avaha pale lačhe le Jehovaha
Le Jehovas igen dukhal o jilo, te keras baro binos. A vaš oda leske kamas sa avri te phenel. Pregen Žalm 32:1–5 a paľis vakeren jekhetane:
-
So lačho amenge oda anela, te na garuvas, oda so kerďam, aľe phenas sa avri le Jehovaske?
Paľis, sar oda phenďam le Jehovaske, kampel te džal pal o zborova phuredera. Na daras lendar, bo on amenge pomožinena a ela amenge lokeder pro jilo. Mukh o VIDEJO a paľis vakeren jekhetane.
-
Sar o zborova phuredera pomožinenas jekhe terneske, kaj te avel pale ko Jehovas?
O zborova phuredera hine lačhe a kamen amenge te pomožinel. Vaš oda lendar na kamas ňič te garuvel. Pregen Jakub 5:16 a paľis vakeren jekhetane:
-
Soske hin le zborove phurederenge lokeder amenge te pomožinel, te lenge phuteras amaro jilo?
Phen le Jehovaske, so kerďal, phuter tiro jilo le zborove phurederenge a le tuke kijo jilo, sar tuke o Jehovas kamel te pomožinel
4) Soske pomožinel, te hino vareko avričhido
Oda, ko kerďa baro binos a imar na kamel te dživel avka sar phenel o Jehovas, našťi ačhel le Jehovaskero svedkos. Hino avričhido andal o zboros. Kajse manušeha pes o phrala the pheňa andal o zboros na zdžan aňi leha na vakeren. Pregen 1. Korinťanom 5:6, 11 the 2. Jána 9–11 a paľis vakeren jekhetane:
-
Kapkica drožďi kerel, hoj avel upre calo chumer. Te amen uľamas ajsenca, so hine avričhide andal o zboros, pre soste amen šaj andehas upre?
But so sas avričhide, pes visarde pale. Soske? The te len dukhalas, hoj sas avričhide, oda lenge pomožinďa pes te prekerel. (Žalm 141:5) Mukh o VIDEJO a paľis vakeren jekhetane.
-
Sar la Sonjake pomožinďa oda, hoj sas avričhiďi andal o zboros?
Rozmišľin:
-
Te hino vareko avričhido andal o zboros, le Jehovaskero nav avka ačhel furt žužo. Soske?
-
Soske hino goďaver le Jehovastar, hoj hine avričhide ča ola, so na bajinen? Sar šaj dikhas le Jehovaskero kamiben andre oda, te hino vareko avričhido?
5) O Jehovas amenge odmukhel, te jilestar bajinas
Sar hin le Jehovaske, te vareko jilestar bajinel? O Ježiš pal oda phenďa jekh šukar pribehos. Pregen Lukáš 15:1–7 a paľis vakeren jekhetane:
-
So ale pribehostar sikhľuvas, savo hino o Jehovas?
Pregen Ezechiel 33:11 a paľis vakeren jekhetane:
-
Kana šaj phenas, hoj o manuš čačes jilestar bajinel?
O Jehovas amen avka rado dikhel, sar o pasťjeris peskere bakrore
VAREKO ŠAJ PHENEL: „Me darav, hoj man čhivena avri, te phenava le zborove phurederenge, so kerďom.“
-
So bi phenehas kajse dženeske?
SO SIKHĽIĽAM
O Jehovas amenge odmukhela akor, te jilestar bajinas, so leske kerďam. A te oda binos imar ňigda pale na kamas te kerel.
So bi phenehas
-
Soske hin lačho peršo te phenel avri le Jehovaske, so nalačho kerďam?
-
So musaj te keras, kaj amenge o Jehovas te odmukhel?
-
Soske kampel te džal pal o zborova phuredera, te kerďam baro binos?
DIKH TUKE BUTER
Dikh tuke, sar jekh murš pre peskeri cipa sprindžarďa, savo baro jilo hin le Jehovas, avka sar hin andro Izaiáš 1:18.
Pregen tuke, so oda anel savorenge, te hino vareko avričhido andal o zboros.
„Prečo je vylúčenie láskavým opatrením“ (Strážna veža z 15. apríla 2015)
Pregen tuke, so šaj phenes varekaske, ko phučel, soske le Jehovaskere svedki varekas čhiven avri andal o zboros.
Vyhýbajú sa Jehovovi svedkovia svojim bývalým spoluveriacim? (arakheha pro jw.org)
Pregen tuke o člankos „Uvedomil som si, že sa musím vrátiť k Jehovovi“. Dodžaneha tut, sar jekhe muršes o Jehovas cirdelas pale ke peste.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
