ЛЕКЦИЈА 57
Со ако керѓан сериозно грево?
Иако бут мангеа е Јехова хем трудинеа тут те на кере нешто со шај те дукхавел ле, сепак понекогаш ка кере грешке. Несаве гревија тане посериозна таро јавера гревија (1. Коринќаните 6:9, 10). Ако керѓан сериозно грево, ма бистре кај о Јехова на чхинавѓа те мангел тут. Ов тано спремно те простинел туке хем те поможинел тут.
1. Со ваљани те кера ако мангаја о Јехова те простинел аменге?
Окола со мангена е Јехова осетинена бари дукх одкеда хаљовена кај керѓе сериозно грево. Ама, ола аракхена утеха ко ветување со денѓа ле о Јехова пле слугенге. Ов вакерела: „Иако тумаре гревија тане сар лоло платно, ка овен парне сар ив“ (Исаија 1:18). Ако искрено каинаја амен, о Јехова ка простинел аменге. Со значинела те каина амен? Адава значинела кај ваљани те овел аменге бут жал башо адава со керѓем, те чхинава те кера адава сој лошно хем те молина е Јехова те простинел аменге. Пало адава, даја амендар са те менина о погрешно размислибе или о погрешна навике со анѓе амен џи ко адава те кера грево хем трудинаја амен те живина спрема е Јеховаскере мерилија. (Читин Исаија 55:6, 7.)
2. Сар о Јехова ка поможинел аменге преку о старешине ако керѓем грево?
Ако керѓем сериозно грево, о Јехова вакерела аменге „[те викина] е старешинен таро собрание“. (Читин Јаков 5:14, 15.) О старешине мангена е Јехова хем околен со служинена леске. Ола џанена сар те поможинен аменге палем те поправина амаро амалипе е Јеховаја (Галатите 6:1).
Сар поможинена аменге о старешине ако керѓем сериозно грево? Дуј или трин старешине ка користинен стихија тари Библија те шај те сикавен аменге соске адава со керѓем сине погрешно. Исто аѓаар, ола ка ден амен практична предлогија хем советија кола со ка поможинен аменге те на грешина палем. Ола шај ка вакерен аменге кај нашти те учествујна ко несаве собраниска активностија, са џикоте амаро амалипе е Јеховаја нане палем зорало. Ако некој керѓа сериозно грево, а на каинела пе, о старешине ка исклучинен ле таро собрание те шај те на влијајнел лошно упро јавера.
ДОЗНАЈН ПОВИШЕ
Сар поможинела аменге о Јехова ако керѓем сериозно грево? Ако размислинаја башо акава ка бајровел амаро мангипе спрема лесте.
3. Признајн тло грево те шај те поправине тло амалипе е Јеховаја
Секова грево со керѓем дукхавела е Јехова. Адалеске тано важно те признајна леске амаро грево. Читин Псалм 32:1-5, а пало адава керен лафи башо акава пучибе:
-
Соске тано шукар те признајна амаре гревија е Јеховаске наместо те гарава лен?
Освен со ка признајна амаре гревија е Јеховаске, шукар тано те рода помош таро старешине. Адава ка локхјарел амаро пхарипе. Дикх о ВИДЕОКЛИПИ, а пало адава керен лафи башо акава пучибе:
-
Сар поможинѓе о старешине амаре пхралеске те иранел пе ко Јехова?
Ваљани те кера отворено хем искрено лафи е старешиненцар. Те на бистра, ола мангена те поможинен аменге. Читин Јаков 5:16, а пало адава керен лафи башо акава пучибе:
-
Соске тано полокхо е старешиненге те поможинен аменге ако сием искрена ленцар?
Признајн тло грево, ов искрено е старешиненцар хем прифатин е Јеховаскири љубезно помош
4. О исклучибе поможинела е грешникоске хем заштитинела о собрание
Ако некој со керѓа сериозно грево на мангела те живинел спрема е Јеховаскере мерилија, ов нашти више те овел дело таро собрание хем адалеске ка овел исклучимо. Амен на дружинаја амен леа, па чак ни на кераја леа лафи. Читин 1. Коринќаните 5:6, 11 хем 2. Јованово 9-11, а пало адава керен лафи башо акава пучибе:
-
И Библија вакерела: „Хари квасацо ушљарела цело хумер“. Спрема акаја споредба, сар ка влијајнел упро цело собрание ако дружинаја амен е грешникоја кова со на каинела пе?
Бут џене кола со сине исклучиме покасно иранѓе пе ко собрание. Соске? Иако осетинѓе бари дукх адалеске со сине исклучиме, сепак адава поможинѓа ленге те хаљовен кај адава со керѓе сине погрешно (Псалм 141:5). Дикх о ВИДЕОКЛИПИ, а пало адава керен лафи башо акава пучибе:
-
Сар о исклучибе поможинѓа е пхењаке?
Сар о исклучибе...
-
поможинела те на мељарел пе е Јеховаскоро анав?
-
сикавела кај о Јехова тано праведно хем љубезно?
5. О Јехова простинела аменге кеда каинаја амен
О Исус вакерѓа јекх споредба која со поможинела аменге те хаљова сар о Јехова осетинела пе кеда некој каинела пе. Читин Лука 15:1-7, а пало адава керен лафи башо акава пучибе:
-
Со сикавела туке акаја споредба башо Јехова?
Читин Езекиел 33:11, а пало адава керен лафи башо акава пучибе:
-
Со сикавела кај некој искрено каинела пе?
Исто сар јекх пастири, о Јехова грижинела пе пле бакхренге
НЕСАВЕ ШАЈ ВАКЕРЕНА: „Дарава те на овав исклучимо ако признајнава мло грево е старешиненге“.
-
Сар шај те поможине некаске со осетинела пе аѓаар?
СО СИКЛИЛЕМ
Ако кераја сериозно грево, ама искрено каинаја амен хем решиме сием те чхинава те кера адава сој лошно, о Јехова ка простинел аменге.
Сар ка одговорине?
-
Соске тано шукар те признајна амаре гревија е Јеховаске?
-
Со ваљани те кера те шај о Јехова те простинел амаре гревија?
-
Ако керѓем сериозно грево, соске ваљани те рода помош таро старешине?
ИСТРАЖИН
Дикх сар јекх мануш осетинѓа е Јеховаскири милост сој опишими ко Исаија 1:18.
Сар о исклучибе користинела е грешникоске хем е собраниеске?
„Зошто исклучувањето е израз на љубов“ (Стражарска кула таро 15 април 2015)
Сар шај те објаснине некаске со нане е Јеховаскоро сведоко сој тано о исклучибе?
Ко искуство е насловеа „Требаше да му се вратам на Јехова“, читин сар јекх мануш осетинѓа кај о Јехова мангела ов те иранел пе ко чачипе.
„Библијата менува животи“ (Стражарска кула таро 1 април 2012)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
