LEKCIJA 57
So ako kergjan seriozno grevo?
Iako but mangea e Jehova hem trudinea tut te na kere nešto so šaj te dukhavel le, sepak ponekogaš ka kere greške. Nesave grevija tane poseriozna taro javera grevija (1. Korinkjanite 6:9, 10). Ako kergjan seriozno grevo, ma bistre kaj o Jehova na čhinavgja te mangel tut. Ov tano spremno te prostinel tuke hem te pomožinel tut.
1. So valjani te kera ako mangaja o Jehova te prostinel amenge?
Okola so mangena e Jehova osetinena bari dukh odkeda haljovena kaj kergje seriozno grevo. Ama, ola arakhena uteha ko vetuvanje so dengja le o Jehova ple slugenge. Ov vakerela: „Iako tumare grevija tane sar lolo platno, ka oven parne sar iv“ (Isaija 1:18). Ako iskreno kainaja amen, o Jehova ka prostinel amenge. So značinela te kaina amen? Adava značinela kaj valjani te ovel amenge but žal bašo adava so kergjem, te čhinava te kera adava soj lošno hem te molina e Jehova te prostinel amenge. Palo adava, daja amendar sa te menina o pogrešno razmislibe ili o pogrešna navike so angje amen dži ko adava te kera grevo hem trudinaja amen te živina sprema e Jehovaskere merilija. (Čitin Isaija 55:6, 7.)
2. Sar o Jehova ka pomožinel amenge preku o starešine ako kergjem grevo?
Ako kergjem seriozno grevo, o Jehova vakerela amenge „[te vikina] e starešinen taro sobranie“. (Čitin Jakov 5:14, 15.) O starešine mangena e Jehova hem okolen so služinena leske. Ola džanena sar te pomožinen amenge palem te popravina amaro amalipe e Jehovaja (Galatite 6:1).
Sar pomožinena amenge o starešine ako kergjem seriozno grevo? Duj ili trin starešine ka koristinen stihija tari Biblija te šaj te sikaven amenge soske adava so kergjem sine pogrešno. Isto agjaar, ola ka den amen praktična predlogija hem sovetija kola so ka pomožinen amenge te na grešina palem. Ola šaj ka vakeren amenge kaj našti te učestvujna ko nesave sobraniska aktivnostija, sa džikote amaro amalipe e Jehovaja nane palem zoralo. Ako nekoj kergja seriozno grevo, a na kainela pe, o starešine ka isklučinen le taro sobranie te šaj te na vlijajnel lošno upro javera.
DOZNAJN POVIŠE
Sar pomožinela amenge o Jehova ako kergjem seriozno grevo? Ako razmislinaja bašo akava ka bajrovel amaro mangipe sprema leste.
3. Priznajn tlo grevo te šaj te popravine tlo amalipe e Jehovaja
Sekova grevo so kergjem dukhavela e Jehova. Adaleske tano važno te priznajna leske amaro grevo. Čitin Psalm 32:1-5, a palo adava keren lafi bašo akava pučibe:
-
Soske tano šukar te priznajna amare grevija e Jehovaske namesto te garava len?
Osven so ka priznajna amare grevija e Jehovaske, šukar tano te roda pomoš taro starešine. Adava ka lokhjarel amaro pharipe. Dikh o VIDEOKLIPI, a palo adava keren lafi bašo akava pučibe:
-
Sar pomožingje o starešine amare phraleske te iranel pe ko Jehova?
Valjani te kera otvoreno hem iskreno lafi e starešinencar. Te na bistra, ola mangena te pomožinen amenge. Čitin Jakov 5:16, a palo adava keren lafi bašo akava pučibe:
-
Soske tano polokho e starešinenge te pomožinen amenge ako siem iskrena lencar?
Priznajn tlo grevo, ov iskreno e starešinencar hem prifatin e Jehovaskiri ljubezno pomoš
4. O isklučibe pomožinela e grešnikoske hem zaštitinela o sobranie
Ako nekoj so kergja seriozno grevo na mangela te živinel sprema e Jehovaskere merilija, ov našti više te ovel delo taro sobranie hem adaleske ka ovel isklučimo. Amen na družinaja amen lea, pa čak ni na keraja lea lafi. Čitin 1. Korinkjanite 5:6, 11 hem 2. Jovanovo 9-11, a palo adava keren lafi bašo akava pučibe:
-
I Biblija vakerela: „Hari kvasaco ušljarela celo humer“. Sprema akaja sporedba, sar ka vlijajnel upro celo sobranie ako družinaja amen e grešnikoja kova so na kainela pe?
But džene kola so sine isklučime pokasno irangje pe ko sobranie. Soske? Iako osetingje bari dukh adaleske so sine isklučime, sepak adava pomožingja lenge te haljoven kaj adava so kergje sine pogrešno (Psalm 141:5). Dikh o VIDEOKLIPI, a palo adava keren lafi bašo akava pučibe:
-
Sar o isklučibe pomožingja e phenjake?
Sar o isklučibe...
-
pomožinela te na meljarel pe e Jehovaskoro anav?
-
sikavela kaj o Jehova tano pravedno hem ljubezno?
5. O Jehova prostinela amenge keda kainaja amen
O Isus vakergja jekh sporedba koja so pomožinela amenge te haljova sar o Jehova osetinela pe keda nekoj kainela pe. Čitin Luka 15:1-7, a palo adava keren lafi bašo akava pučibe:
-
So sikavela tuke akaja sporedba bašo Jehova?
Čitin Ezekiel 33:11, a palo adava keren lafi bašo akava pučibe:
-
So sikavela kaj nekoj iskreno kainela pe?
Isto sar jekh pastiri, o Jehova grižinela pe ple bakhrenge
NESAVE ŠAJ VAKERENA: „Darava te na ovav isklučimo ako priznajnava mlo grevo e starešinenge“.
-
Sar šaj te pomožine nekaske so osetinela pe agjaar?
SO SIKLILEM
Ako keraja seriozno grevo, ama iskreno kainaja amen hem rešime siem te čhinava te kera adava soj lošno, o Jehova ka prostinel amenge.
Sar ka odgovorine?
-
Soske tano šukar te priznajna amare grevija e Jehovaske?
-
So valjani te kera te šaj o Jehova te prostinel amare grevija?
-
Ako kergjem seriozno grevo, soske valjani te roda pomoš taro starešine?
ISTRAŽIN
Dikh sar jekh manuš osetingja e Jehovaskiri milost soj opišimi ko Isaija 1:18.
Sar o isklučibe koristinela e grešnikoske hem e sobranieske?
„Zošto isklučuvanjeto e izraz na ljubov“ (Stražarska kula taro 15 april 2015)
Sar šaj te objasnine nekaske so nane e Jehovaskoro svedoko soj tano o isklučibe?
Ko iskustvo e naslovea „Trebaše da mu se vratam na Jehova“, čitin sar jekh manuš osetingja kaj o Jehova mangela ov te iranel pe ko čačipe.
„Biblijata menuva životi“ (Stražarska kula taro 1 april 2012)
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
