LEKTIONA 57
Hoi hi, te kral i bari doosh?
Ninna te kameh i Jehowes tiro tselo djiestar, ninna te kameh o tselo djieha tchi te krell, hoi les dukella: Nai wella glan, kai kreh tu tchomone, hoi gar mishto hi. Aber ninna te anell jek doosh ap peste, dell kote koowa, hoi phareder hi har wawar koowa (1. Korintarja 6:9, 10). Tu te kreh i bari doosh, ma biste, kai mukas o Jehowah gar tele, te kamell lo tut. Peskro djiestar kamell lo tiri doosh te bistrell un tuke koi te well.
1. Hoi hunte kras mer, te nai bistrell o Jehowah, hoi mer kram?
Kolengro dji, kai i Jehowes o djiestar kamenna, dukella, te haiwenn le, kai anan le i bari doosh ap pende. Lenge penell o Jehowah an peskro kamlepen: “Te hi i doosh, hoi tumer ap tumende anan jaake lolo har o rat, palle well li parno, jaake parno har gib” (Jesaja 1:18). O Jehowah bistrell o djiestar mari doosh, te khaitell menge kowa tchatchepah. Har sikrell pes kowa? Doleske, kai rowell maro dji pral kowa, hoi mer kram, mukah mer ko tchilatcho koowa un mangah i Jehowestar, te bistrell lo mari doosh. Pal kowa djiwah mer jaake, kai anell men tchi buder jaake dur, te kras kowa pale. Doleske, kai kamah pal i Jehoweskre djudje standards te djiwell, krah mer ninna halauter, kai dikah mer pale ap halauter jaake, har o Jehowah ap kowa dikella (Dik pal an Jesaja 55:6, 7).
2. Har budrell o Jehowah i Phurentsa khetne, te nai well lo menge koi, te kram i bari doosh?
O Jehowah penella, te kharas “kolen, kai hi i phureder mank i patslende,” te kras jek i bari doosh (Dik pal an Jakobo 5:14, 15). Kola morsha kamenn i Jehowes un peskre bakren o djiestar. Jon djan menge ap o wast, te nai well maro malepen i Jehoweha — hoi djas paash dran koi doosh, hoi kram — pale mishto (Galatarja 6:1).
Har krenn i Phureste kowa? Dui oder triin lendar rakrenn mentsa un sikrenn menge dran i bibla, hoske kowa, hoi mer kram, i doosh hi. Jon sikrenn menge ninna, hoi te kras nai, te anas koi doosh buder gar pale ap mende. Pengre labentsa kamenn le men soor te dell. Jon nai penenn ninna, kai derfte kras tchomone buder gar an i Versammlunga jaake rar, djin te ham duchtikes pale sassto. Te kras jek i bari doosh un leske khaitell kowa gar, hunte well lo i Phurendar win-schließemen — jaake denn le garda, te anell job gar wawaren dran i Versammlunga ap i tchilatcho drom.
RODAS DUREDER
Kanna dikeh, har o Jehowah menge koi hi, te kras jek i bari doosh. Tiro parkepen ap i Jehoweste wella bareder, te kreh tuke pral kowa i shero.
3. Te penah, hoi kram, well maro malepen i Jehoweha pale mishto
Haki doosh, hoi krah, dukell i Jehowes. Doleske hunte penas leske kowa sig. Dikenn pal an Gilja 32:1-5, un rakrenn khetne pral:
-
Hoske hi kowa mishto, te penah i Jehoweske, hawi doosh mer kram, un te khatras lat gar glan leste?
Te rakram i Jehoweha pral mari doosh, hi menge kowa ninna mishto, te rodah i Phuren pre. Jon nai krenn maro dji pokones. Te dikan o VIDEO, rakrenn khetne pral:
-
Hoi kran i Phureste, te nai well o Canon pale pash i Jehoweste?
Kokres, te khatrah tchi glan i Phurende, nai wenn le menge koi. Dikenn pal an Jakobo 5:16, un rakrenn khetne pral:
-
Hoske nai wenn i Phureste menge feteder koi, te penah lenge o tchatchepen?
Penn i Jehoweske, hoi tu kral, rake i Phurentsa o tchatchepen, un muk i Jehowes tuke koi te well
4. Hoske kowa kamlepen sikrella, te well jek win-schließemen
Te kamell pes kowa, kai i bari doosh kras, buder gar ap i Jehoweskre standards te rikrell, nashte atchell lo buder gar an i Versammlunga. Sawo hi i Win-Schließedo, doleske hi men leha buder kek kontakta, witar gar rakrah leha. Dikenn pal an 1. Korintarja 5:6, 11, un 2. Johanni 9-11, un rakrenn khetne pral:
-
Te djinah, kai krell i tikni kotar shutlo jarro o tselo wawar jarro shutlo: Har nai beeinflussrell kowa i Versammlunga, te wals men kontakta jekeha, kai win-schließedo hi?
Bud, kai wan win-schließedo, wan pal i tsiro pale pale an i Versammlunga. Ninna te dukas kowa, his lenge kowa mishto: Jon haiwan, hoi jon krajan (Gilja 141:5). Te dikan o VIDEO, rakrenn khetne pral:
-
Har his i Sonjake kowa mishto, kai his li win-schließedo?
Te well jek dran i Versammlunga win-schließemen:
-
Hoske well o Jehoweskro lab dran kowa sharemen?
-
Hoske sikrell kowa, kai hi o Jehowah i fair un kamlo Dewel?
5. O Jehowah bistrell mari doosh, te khaitell menge kowa o djiestar, hoi mer kram
O Jesus das menge i illustrationa, te nai haiwas mer, har i Jehoweske kowa hi, te khaitell jekeske kowa, hoi lo kras. Dikenn pal an Luka 15:1-7, un rakrenn khetne pral:
-
Hoi sikrell tuke kowa pral i Jehoweste?
Dikenn pal an Hesekijel 33:11, un rakrenn khetne pral:
-
Hoi hunte krell jek, te nai well sikedo, kai khaitell leske kowa tchatchepah, hoi lo kras?
O Jehowah hi har i bakrengro, koles i baro dji peskre bakrenge hi
BUD PENENNA: “Man hi traash, kai schließrenn i Phureste man win, te penau lenge, hoi krum.”
-
Hoi penals tu, te penals tuke kowa jek?
HOI KATE PENLO WAS
Te dukell un te khaitell jekeske tchatchepah koi bari doosh, hoi lo kras, un te mukell lo lat ninna, bistrell o Jehowah o djiestar leskri doosh.
Hoi penals tu?
-
Hoske hi menge kowa mishto, te penas i Jehoweske koi doosh, hoi kram?
-
Hoi hunte kras mer, te nai bistrell o Jehowah mari doosh?
-
Hoske te rakras i Phurentsa, te kram i bari doosh?
BUDEDER
Kate huneh, har kola laba dran Jesaja 1:18 an ko morsheskro djipen tchatchepen wan.
Kate drawereh, hoske kowa buden mishto hi, te well jek win-schließedo.
“Te well jek win-schließedo, sikrell kowa kamlepen” (O Gardeskro Kheer, April 15, 2015)
Kate hatseh, hoske persone dran i Versammlunga win-schließedo wenna.
Kate an “Me hunte djum pash i Jehoweste palpale” penell i morsh, har o Jehowah les pale pash peste tserdas.
“I bibla krell o djipen newes” (O Gardeskro Kheer, April 1, 2012)
