ඔයා යෙහෝවාට ගොඩක් ආදරේ නිසා ඔහුගේ හිතට දුකක් ගේන කිසිම දෙයක් නොකර ඉන්න ඔයා ලොකු උත්සාහයක් ගන්නවා. හැබැයි සමහර වෙලාවට ඔයා අතින් වැරදි වෙනවා. සමහර වැරදි බරපතළයි. (1 කොරින්ති 6:9, 10) ඔයා අතින් බරපතළ වරදක් වුණොත් යෙහෝවා ඔයාට ආදරේ කරන එක නවත්තයි කියලා හිතන්න එපා. සමාව දීලා ඔයාට උදව් කරන්න ඔහු කැමැත්තෙන් ඉන්නවා.

1. යෙහෝවාගෙන් සමාව ලබාගන්න නම් අපි මොනවාද කරන්න ඕනේ?

කෙනෙක් අතින් බරපතළ වරදක් වුණාම එයාට යෙහෝවා ගැන ආදරයක් තියෙනවා නම් ඒ වරද ගැන එයාට ලොකු දුකක් දැනෙනවා. ඒත් යෙහෝවාගේ මේ පොරොන්දුව එයාට ලොකු සහනයක්. “ඔබේ පාප රතට රතේ තිබුණත් මම ඒවා හිම මෙන් සුදු වෙන්න සලස්වන්නෙමි.” (යෙසායා 1:18) අපි අවංකව පසුතැවිලි වෙනවා නම් යෙහෝවා අපිට සමාව දෙනවා. අපි අතින් වුණ වරද ඔහු ආයේ කවදාවත් මතක් කරන්නේ නැහැ. කෙනෙක් අවංකව පසුතැවිලි වෙනවා නම් කරපු වරද ගැන එයා ගොඩක් දුක් වෙනවා. ඒ වරද කරන එක නතර කරලා සමාව ඉල්ලලා යෙහෝවාට කන්නලව් කරනවා. එතනින් නතර නොවී ඒ වරදට වැටෙන්න හේතු වුණ පුරුදු, සිතුවිලි සම්පූර්ණයෙන්ම වෙනස් කරගන්න එයා මහන්සි වෙනවා. යෙහෝවාගේ උසස් ප්‍රමිතිවලට අනුව ජීවත් වෙන්න එයා උත්සාහ කරනවා.—යෙසායා 55:6, 7 කියවන්න.

2. වරදක් වුණ කෙනෙක්ට උදව් කරන්න යෙහෝවා වැඩිමහල්ලන්ව පාවිච්චි කරන්නේ කොහොමද?

අපි අතින් බරපතළ වරදක් වුණොත් යෙහෝවා අපිට කියනවා “සභාවෙහි සිටින වැඩිමහල්ලන්ව කැඳවිය යුතුයි” කියලා. (යාකොබ් 5:14, 15 කියවන්න.) වැඩිමහල්ලන් යෙහෝවාටයි, ඔහුට සේවය කරන අයටයි ගොඩක් ආදරෙයි. යෙහෝවාත් එක්ක අපිට තිබුණ බැඳීම ආයේ ශක්තිමත් කරගන්න අපිට උදව් කරන්න එයාලට පුළුවන්. ඒක කරන විදිහ එයාලට කියලා දීලා තියෙනවා.—ගලාති 6:1.

අපි බරපතළ වරදක් කළොත් වැඩිමහල්ලන් උදව් කරන්නේ කොහොමද? වැඩිමහල්ලන් දෙන්නෙක් නැත්නම් තුන්දෙනෙක් අපිව හම්බ වෙලා බයිබලය පාවිච්චි කරලා අපි හිතන විදිහ හරිගස්සගන්න අපිට උදව් කරනවා. ආයේ ඒ වරදට වැටෙන්නේ නැතුව ඉන්න උදව් වෙන මඟ පෙන්වීමුත් එයාලා අපිට දෙනවා. යෙහෝවා එක්ක අපිට තිබුණ බැඳීම ආයේ ශක්තිමත් කරගන්න කල් සභාවේ සමහර දේවල් අපිට කරන්න බැහැ කියලා වැඩිමහල්ලන් කියයි. කෙනෙක් එයා කරපු වරද ගැන පසුතැවිලි වෙන්නේ නැත්නම් එයාව සභාවෙන් ඉවත් කරන්න වැඩිමහල්ලන් තීරණය කරයි. එහෙම කරන්නේ එයාගේ නරක බලපෑමෙන් සභාව ආරක්ෂා කරගන්න.

 තවත් හොයමු

3. වරද ගැන කියන එක සුව වෙන්න උදව්වක්

අපි අතින් වරදක් වෙද්දී ඒ ගැන යෙහෝවාගේ හිතට දුකක් දැනෙනවා. ඒ නිසා අපි අතින් වරදක් වුණාම ඒ ගැන අපි ඔහුට කියන්න ඕනේ. ගීතාවලිය 32:1-5 කියවලා මේ ප්‍රශ්නය ගැන කතා කරන්න.

• අපි අතින් වුණ වරද හංගන්න උත්සාහ කරනවා වෙනුවට ඒ ගැන යෙහෝවාට කියන්න ඕනෙ ඇයි?

 4. සභාවෙන් ඉවත් කරන එක ප්‍රයෝජනවත්

බරපතළ වරදක් කරපු කෙනෙක් යෙහෝවාගේ ප්‍රමිතිවලට කීකරු වෙන්න කැමති නැත්නම් එයාව තවදුරටත් සභාවේ කෙනෙක් හැටියට පිළිගන්නේ නැහැ. එයාව සභාවෙන් ඉවත් කරනවා. අපි එහෙම කෙනෙක් එක්ක ආශ්‍රය කරන්නේවත් කතා කරන්නේවත් නැහැ. 1 කොරින්ති 5:6, 11 සහ 2 යොහන් 9–11 කියවලා මේ ප්‍රශ්නය ගැන කතා කරන්න.

• බරපතළ වරදක් කරලා පසුතැවිලි වෙන්නේ නැති කෙනෙක්ව දිගටම ආශ්‍රය කරන එක සභාවේ අයට අනතුරක් වෙන්නේ කොහොමද?

 ඉගෙනගත්ත දේ

අපි අතින් බරපතළ වරදක් වුණත් ඒ ගැන පසුතැවිලි වෙලා, ඒක ආයේ කරන්නේ නැතුව ඉන්න උත්සාහ කරනවා නම් යෙහෝවා අපිට සමාව දෙනවා.

ඔයා හිතන්නේ මොකක්ද?

• අපි අතින් වුණ වැරදි ගැන යෙහෝවාට කියන්න ඕනෙ ඇයි?

• සමාව ලබාගන්න නම් අපි මොනවාද කරන්න ඕනේ?

• අපි අතින් බරපතළ වරදක් වෙලා තියෙනවා නම් අපි වැඩිමහල්ලන්ගේ උදව් ගන්න ඕනෙ ඇයි?