ROSO 57
Jawa Cubbo Loosittoro Maa Assa Hasiissannohe?
Yihowa lubbora baxattohanna iso dadillisannore assattokki gede sharramattoha ikkirono, mito woyite soˈro loosakki digattanno. Ikkollana baalunku cubbi taalo diˈˈikkino; mitu cubbi jawaho. (1 Qorontoosi 6:9, 10) Jawa cubbo loosittoro, Yihowa ate baxa agurannokkita qaagi; qoleno isi gatona yaaheranna kaaˈlahera hasiˈranno.
1. Yihowa maarannonke gede maa assa hasiissannonke?
Yihowa baxxannori jawa cubbo loossinoti leeltannonsa woyite lowo geeshsha dadillitanno. Ikkirono Yihowa mannisira eino qaali sheshifachishannonsa; isi togo yiino: “Cubbiˈne duumo xiille ikkirono ani hayishshe bullaame kaade gede asseemmoˈne.” (Isayaasi 1:18) Addinta maaro eˈnummoro woy aagintaambummoro, Yihowa cubbonke baalanka maarannonke. Maaro eˈneemmohu hiittoonniiti? Cubbinkera godowinta gaabbine, bushare assa agurreemmo; hattono maarannonke gede Yihowa huucciˈneemmo. Hakkiinni, cubbu widira qolte massitinonke hedonna gade hooˈlate sharrammeemmo; hattono Yihowahu xalalu seeri garinni heeˈrate dandiinummore baala assineemmo.—Isayaasi 55:6, 7 nabbawi.
2. Cubbo loonseemmo woyite Yihowa cimeeyyete widoonni kaaˈlannonkehu hiittoonniiti?
Yihowa jawa cubbo loonsummoro ‘songote cimeeyye woshshiˈnammora’ hasiˈranno. (Yaiqoobi 5:14, 15 nabbawi.) Kuri shoomantino labballi Yihowano geˈreewosino baxxannoreeti. Qoleno insa Yihowa ledo wirro danchu jaaloomi heeˈrannonke gede kaaˈlitannonke gara rosiinsoonninsareeti.—Galatiyu Sokka 6:1.
Jawa cubbo loonsummoro cimeeyye kaaˈlitannonkehu hiittoonniiti? Lamu woy sasu cimeessi Qullaawa Maxaafa horoonsidhe, soˈronke leeltannonke gede kaaˈlitannonke. Qoleno wirro cubbo loonseemmokki gede kaaˈlitannonke amaale uyitannonke. Hakkiinni saeno, ayyaanaamittetenni wirro jawaantammo geeshsha songote giddo mito coye assineemmokki gede hooltara dandiitanno. Songo gawajjantannokki gede, jawa cubbo loosse kaˈe maaro eˈannokkire cimeeyye songotenni bokkanno.
LEDDE XIINXALLI
Jawa cubbo loosittoro Yihowa kaaˈlannohe garanna ati tenne naadattota leellisha dandaatto gara ledde rosi.
3. Loonsoommo cubbo kula ayyaanaamittetenni hurre afiˈneemmo gede kaaˈlitannonke
Loonseemmo cubbi baalunku Yihowa dadillisanno. Hakko daafira cubbonke isira kula hasiissannonke. Faarso 32:1-5 nabbabbe; hakkiinni tenne xaˈmo hasaabbe:
-
Loonsoommo cubbo maaxate woˈnaalantenni, Yihowara kulanke kaaˈlitannonkehu hiittoonniiti?
Cubbonke Yihowara kulleemmotano agurranna, kaaˈlitannonke gede cimeeyyete kuˈlinummoro giddiidi harshammo afiˈneemmo. VIIDIYO laˈe; hakkiinni aante noo xaˈmo hasaabbe.
-
Viidiyote giddo, cimeeyye Kanooni Yihowawa higanno gede kaaˈlitinosihu hiittoonniiti?
Cimeeyyete noore maanxummokki xawinse kula hasiissannonke; insa ninke kaaˈla hasidhanno. Yaiqoobi 5:16 nabbabbe; hakkiinni tenne xaˈmo hasaabbe:
-
Noore maanxummokki xawinse kulanke, cimeeyyete ninke kaaˈlate coyi injaannonsa gede assitannohu hiittoonniiti?
Cubbokki Yihowara kuli, cimeeyye hasaawissannohe woyite noore maaxxooti, hattono Yihowa baxillunni kaaˈlannohe kaaˈlo maahoyye yite adhi
4. Boha kaaˈlitanno gara
Jawa cubbo loosino manchi Yihowa seera agadha giwiro, songote miila ikke heeˈra didandaanno. Iso songotenni bonkanni; hakkuyi gedensaanni isiwa diaanneemmo; wole agurina iso coyishiisha nafa dicoyishiinsheemmo. Umi Qorontoosi 5:6, 11 nna 2 Yohaannisi 9-11 nabbabbe; hakkiinni tenne xaˈmo hasaabbe:
-
Irsho lixe fultanno gede assitannonte gede, cubbo loosse maaro eˈannokkiriwa aana songo gawajjitannohu hiittoonniiti?
Bohaminohu batinyu manni gedensoonni wirro songo higino. Mayira? Bohamansa dadillissinonsaha ikkirono, wodaninsa raga higanno gede kaaˈlitinonsa. (Faarso 141:5) VIIDIYO laˈe; hakkiinni aante noo xaˈmo hasaabbe.
-
Viidiyote giddo, Sooniya bohamase kaaˈlitinosehu hiittoonniiti?
Jawa cubbo loosse maaro eˈannokkire boha . . .
-
Yihowa suˈmi ayirranno gede assitannohu hiittoonniiti?
-
Yihowa taashsho baxannohanna baxillaancho ikkinota leellishshannohu hiittoonniiti?
5. Maaro eˈnummoro Yihowa gatona yaannonke
Yesuusi mittu manchi maaro eanno woyite Yihowara mayi macciishshamannosiro huwanteemmo gede kaaˈlannonke lawishsha coyiˈrino. Luqaasi 15:1-7 nabbabbe; hakkiinni tenne xaˈmo hasaabbe:
-
Konni lawishshinni Yihowa daafira maa rosootto?
Hiziqeeli 33:11 nabbabbe; hakkiinni tenne xaˈmo hasaabbe:
-
Addinta maaro eˈnoommota leellishate maa assa hasiissannonke?
Allaalaanchu gede Yihowa geˈreewosi seekke towaatanno
MITU MANNI TOGO YAANNO: “Cubboˈya cimeeyyete kulummoro bonkannie yee waajjoommo.”
-
Hatto yaannohe manchira mayyaatto?
XAPHISHSHA
Jawa cubbo loonsoommoha ikkirono godowinta gaabbineemmohanna busha coye assa agurreemmoha ikkiro, Yihowa gatona yaannonke.
Kageeshsha Rosoottore
-
Cubbonke Yihowara kula kaaˈlitannonkehu hiittoonniiti?
-
Yihowa cubbonke gatona yaannonke gede maa assa hasiissannonke?
-
Jawa cubbo loonsoommoha ikkiro, kaaˈlitannonke gede cimeeyyete kuˈla hasiissannonkehu mayiraati?
EGENNO LEXXI
Yihowa mittu manchira Isayaasi 1:18 kulloonnite gedee maaro leellishinosihu hiittoonniiti?
Cubbo loosse maaro eˈannokkire boha baalanka kaaˈlitannohu hiittoonniiti?
“Boha Baxillu Qixxaawooti Yineemmohu Mayiraati?” (Agarooshshu Shae, Dotteessa 15, 2015)
Yihowa Farciˈraasine ikkinokki mannira mitto mancho songotenni bonkannihu mayiraatiro xawisa dandaatto gara rosi.
“Yihowawa Higa Hasiissinoe” yitannote heeshshote xagge giddo, halaalu mininni fule ballehinohu mittu manchi Yihowa wirro minisira qolinoe yiinohu mayiraatiro huwati.
“Qullaawu Maxaafi Heeshsho Biddi Assanno” (Agarooshshu Shae, Birra 1, 2012)
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
