Ndre tena tea ani-Jehovah noho miezaky mafy mba tsy hanao raha mampalahelo azy iha, le mety hanao hadisoa avao kindraiky. Fe tena bevata ty fahotà sisany laha ampitovizy amy ty hafa. (1 Korintianina 6:9, 10) Laha manao fahotà bevata iha, le tiarovo fa mbo tea anao avao Jehovah sady parè hanenga ty hadisoanao noho hanampy anao.

1. Ino ty tsy maintsy ataontsika mba hanengàni-Jehovah ty hadisoantsika?

Malahelo ty olo tea ani-Jehovah lafa tsapany hoe nanao fahotà bevata ie. Fe mampahery an-drozy raha nivolanini-Jehovah toy: “Ndre mena biby aza ty fahotanareo, le hatao foty manahaky lanezy io.” (Isaia 1:18) Laha tena mibebaky tsika, le hanenga ty hadisoantsika Jehovah. Manao akory olo mibebaky zao? Maneny vatany tamy raha tsy mety nataony ie, le miezaky tsy hampimpoly an’iny sasy. Misoloho amy Jehovah ie mba hanenga ty hadisoany. Miezaky mafy ie bakeo mba tsy hanao na hieritseritsy raha hitariky azy hanao fahotà. Miezaky koa ie mba hiay mifanaraky amy fitsipikini-Jehovah.​—Vakio Isaia 55:6, 7.

2. Akory ty ampiasàni-Jehovah ani-anti-panahy reo mba hanampea antsika?

Laha nanao fahotà bevata tsika, le mampirisiky antsika Jehovah mba “hikaiky ty anti-panahini-fiangona.” (Vakio Jakoba 5:14, 15.) Tea ani-Jehovah noho ty aondriny lahilahy voatendry rey. Hain-drozy ty raha tokony hatao mba hanampea antsika hifandramby soa amy Jehovah ndraiky.​—Galatianina 6:1.

Ino ty ataoni-anti-panahy reo mba hanampea antsika? Hisy anti-panahy roe na telo hiresaky amintsika. Hampiasa Soratsy Masy rozy mba hampisehoa hoe raty vatany ty raha nataontsika. Hanome torohevitsy noho fampahereza antsika rozy mba hanampea antsika tsy hampimpoly ani-fahotà iny sasy. Mety tsy hahazo hanao raha sisany amy fiangona eo koa tsika, laha tsy fa mifandramby soa amy Jehovah ndraiky. Laha nanao fahotà bevata ty olo raiky kanefa tsy mibebaky, le hanapa-kevitsy ty anti-panahy hoe horoahy tsy ho amy fiangona eo ie mba tsy hitariky ty hafa hanao fahotà koa.

 DINIHO LALIKY

3. Ho afaky hinama amy Jehovah ndraiky tsika laha mieky ty fahotantsika

Manao raha mampalahelo ani-Jehovah tsika lafa manao fahotà, ka tokony hieky ty fahotantsika aminy. Vakio Salamo 32:1-5, bakeo iaraho midiniky fanontanea toy:

• Manino ro mahasoa antsika ty mieky ty fahotantsika amy Jehovah, tany ty hamony ani-raha zay?

 4. Mahasoa ty fandroaha

Voaroaky tsy ho amy fiangona eo ty olo nanao fahotà bevata laha tsy mety manaraky ty fitsipikini-Jehovah. Tsy mifandramby aminy sasy tsika, ndre ty miresaky aminy aza tsy ataontsika. Vakio 1 Korintianina 5:6, 11 noho 2 Jaona 9-11, bakeo iaraho midiniky fanontanea toy:

• Misy vokany amy koba ty levira mifangaro aminy. Ino koa ty ho vokany laha mbo miharoharo amy fiangona ty mpanota tsy mibebaky?

 FAMINTINA

Ndre nanao fahotà bevata tsika, le hanenga ty hadisoantsika avao Jehovah laha mibebaky vatany tsika, zany hoe tena maneny sady tapa-kevitsy tsy hampimpoly sasy ani-raha raty iny.

Famerena

• Manino ro mahasoa antsika ty mieky ty fahotantsika amy Jehovah?

• Ino ty tokony hataontsika laha teantsika hanenga ty hadisoantsika Jehovah?

• Manino tsika ro tokony hangataky fanampea amy anti-panahy laha nanao fahotà bevata?