LESONA 57
Pe a E Faia se Agasala Matuiā
E ui e te matuā alofa iā Ieova ma e te taumafai malosi e ʻalofia le faia o se mea e faatigā ai lona finagalo, ae e iai lava taimi e te faia ai se mea sesē. Peitaʻi, o nisi agasala e matuiā atu. (1 Korinito 6:9, 10) Pe a e faia se agasala matuiā, ia manatua e lē uma le alofa o Ieova iā te oe, ae e naunau o ia e faamagalo ma fesoasoani iā te oe.
1. O le ā e tatau ona tatou faia ina ia faamagaloina ai i tatou e Ieova?
E lagona e i latou e alolofa iā Ieova le faanoanoa, pe a latou iloa ua latou faia se agasala matuiā. Ae e faalaeiauina i latou i le folafolaga lenei a Ieova i ona tagata: “E ui ina pei o le ʻie mūmū sesega a outou agasala, ae o le a paʻepaʻe e pei o le kiona.” (Isaia 1:18) Pe a tatou salamō moni, o le a faamagaloina atoatoa i tatou e Ieova. E faapefea la ona tatou faaalia le salamō? E tatou te lagona le matuā faanoanoa ona o mea sa tatou faia, ma uunaʻia ai i tatou e taofia le toe faia o na mea, ma ʻaiʻoi atu iā Ieova e faamagalo i tatou. E tatou te taumafai malosi foʻi e suia ni mafaufauga sesē po o ni masaniga lē lelei e oo atu ai i le faia o se agasala, ma taumafai e ola e tusa ai ma tapulaa mamā a Ieova.—Faitau le Isaia 55:6, 7.
2. E faapefea ona faaaogā e Ieova toeaina e fesoasoani iā i tatou pe a faia se agasala?
Pe a tatou faia se agasala matuiā, ua faatonuina i tatou e Ieova ina ia ʻaami toeaina o le faapotopotoga.’ (Faitau le Iakopo 5:14, 15.) E alolofa nei tane tofia iā Ieova ma ana mamoe. O i latou o ni tane ua agavaa e fesoasoani iā i tatou, ina ia toe faaleleia la tatou faiā ma Ieova.—Kalatia 6:1.
E faapefea ona fesoasoani mai toeaina pe a tatou faia se agasala matuiā? O le a faaaogā e ni toeaina se toʻalua pe toʻatolu ni mau mai i le Tusi Paia, e faasaʻo ai i tatou. E latou te saunia foʻi fautuaga aogā ma faalaeiauga e fesoasoani iā i tatou e ʻalofia ai le toe faia o se agasala. Ina ia puipuia le faapotopotoga mai i aafiaga leaga, e aveesea e toeaina mai i le faapotopotoga se tasi na faia se agasala matuiā ae e lē salamō.
SAʻILIʻILI ATILI
Ia faalolotoina atili lou talisapaia o le auala e fesoasoani mai ai Ieova, pe a tatou faia se agasala matuiā.
3. O le taʻutino atu o agasala e toe faaleleia ai la tatou faiā ma Ieova
O so o se agasala lava e tatou te faia, ua tatou faatigā ai iā Ieova. O se mea tatau la lo tatou taʻutino atu iā te ia o a tatou agasala. Faitau le Salamo 32:1-5, ona talanoa lea i le fesili lenei:
-
Aiseā e lelei ai le taʻutino atu iā Ieova o a tatou agasala nai lo o le taumafai e nanā?
E lē gata i le taʻutino atu iā Ieova o a tatou agasala, ae e faaleleia foʻi o tatou faalogona pe a saʻili atu i le fesoasoani a toeaina. Faaali le VITIŌ, ona talanoa lea i le fesili o loo mulimuli mai.
-
I le vitiō, na faapefea ona fesoasoani toeaina iā Canon ina ia toe foʻi iā Ieova?
E tatau ona tatou taʻu atu le mea moni ma saʻoloto la tatou talanoa i toeaina, auā e mafai ona latou fesoasoani mai iā i tatou. Faitau le Iakopo 5:16, ona talanoa lea i le fesili lenei:
-
Aiseā e faigofie ai ona fesoasoani mai toeaina pe a tatou taʻu atu le mea moni?
4. E faaalia e Ieova le alofa mutimutivale i ē e agasala
Pe a lē manaʻo se tagata na faia se agasala matuiā e usitaʻia tapulaa a Ieova, e aveesea o ia mai i le faapotopotoga, ma e tatou te lē faifaimea faatasi ma ia. Faitau le 1 Korinito 5:6, 11, ona talanoa lea i le fesili lenei:
-
E pei lava ona faafefeteina se paluga atoa i se fefete, e faapefea ona aafia le faapotopotoga i le faifaimea faatasi ma se tagata na faia se agasala ae e lē salamō?
I le faaaʻoaʻo i le alofa mutimutivale o Ieova i tagata agasala, e fesoasoani toeaina i ē ua aveese mai i le faapotopotoga. O le toʻatele o i latou, ua toe foʻi mai i le faapotopotoga ona o lenā aʻoaʻiga. E ui ina tigā, ae ua mafai ona toe faasagatonu ai o latou mafaufau.—Salamo 141:5
E faapefea ona iloa le magafagafa, alofa mutimutivale, ma le alofa o Ieova i le auala e feutagaʻi ai ma ē e agasala?
5. E faamagalo i tatou e Ieova pe a faaalia le salamō
Na faaaogā e Iesu se talafaatusa e fesoasoani ina ia tatou malamalama ai i faalogona o Ieova, pe a faaalia e se tasi le salamō. Faitau le Luka 15:1-7, ona talanoa lea i le fesili lenei:
-
O le ā e te aʻoaʻoina mai i lenei tala faatusa e faatatau iā Ieova?
Faitau le Esekielu 33:11, ona talanoa lea i le fesili lenei:
-
O le ā e tatau ona tatou faia ina ia faaalia ai ua tatou salamō moni?
UA FAAPEA MAI NISI: “Ou te musu e taʻu i toeaina laʻu agasala ina neʻi aveesea aʻu mai i le faapotopotoga.”
-
O le ā le auala e te tali atu ai?
AOTELEGA
Pe a tatou faia se agasala matuiā, ae faaalia le salamō ma maumauaʻi e lē toe faia se agasala, o le a faamagaloina i tatou e Ieova.
Fesili Autalu
-
Aiseā e lelei ai le taʻutino atu iā Ieova o a tatou agasala?
-
O le ā e tatau ona tatou faia ina ia faamagaloina ai a tatou agasala?
-
Pe a tatou faia se agasala matuiā, aiseā e tatau ai ona tatou saʻili atu mo le fesoasoani a toeaina?
MANATU FAAOPOOPO
Mātau le auala na tofo ai se tamāloa i le alofa mutimutivale o Ieova lea o loo faamatalaina i le Isaia 1:18.
E faapefea ona fesoasoani toeaina i ē ua faia se agasala matuiā?
“Auala e Faaalia ai le Alofa Mutimutivale i le Tagata Faimea Sesē” (Le Olomatamata, Aokuso 2024)
Ia mātau auala e faaalia ai le alofa mutimutivale i tagata agasala e leʻi salamō.
“Fesoasoani mo Ē ua Aveesea Mai i le Faapotopotoga” (Le Olomatamata, Aokuso 2024)
I le tala “Ua Tatau Ona Ou Toe Foʻi iā Ieova,” mātau pe aiseā na manatu ai se tamāloa na tuua le upu moni, ua toe tosina mai o ia e Ieova.
“E Mafai e le Tusi Paia Ona Suia Olaga” (Le Olomatamata, Aperila 1, 2012)