Aladi yu lobi Yehovah èn yu e meki muiti fu no du sani di e hati en, toku yu o meki fowtu son leisi. Ma son sondu seryusu moro trawan (1 Korentesma 6:9, 10). Efu yu du wan seryusu sondu, dan hori na prakseri taki Yehovah lobi yu ete. A wani gi yu pardon èn a wani yepi yu.

1. San wi musu du efu wi wani taki Yehovah gi wi pardon?

Efu wan sma lobi Yehovah, dan a o sari te a kon frustan taki a du wan seryusu sondu. Ma a pramisi disi fu Yehovah kan trowstu en: „Awinsi den sondu fu unu redi leki brudu, toku den o kon weti leki snew” (Yesaya 1:18). Efu wi abi berow trutru, dan Yehovah o gi wi pardon. Fa wi kan sori taki wi abi berow? Te wi abi berow, dan wi e sari fu san wi du, wi e stop nanga na ogri di wi ben du èn wi e begi Yehovah fu gi wi pardon. Wi o meki tranga muiti fu kenki den fowtu denki nanga den gwenti di wi ben abi di meki taki wi du a sondu. Dan wi o pruberi fu libi soleki fa Yehovah wani.​—Leisi Yesaya 55:6, 7.

2. Fa Yehovah e gebroiki den owruman fu yepi wi te wi du wan sondu?

Efu wi du wan seryusu sondu, dan Yehovah wani taki wi musu „kari den owruman fu a gemeente”. (Leisi Yakobus 5:14, 15.) Den owruman lobi Yehovah nanga den brada nanga sisa fu a gemeente. Den leri fa den musu yepi wi fu tron bun mati fu Yehovah baka.​—Galasiasma 6:1.

Fa den owruman e yepi wi te wi du wan seryusu sondu? Tu noso dri owruman o gebroiki Bijbel fu sori wi fu san ede a sani di wi du no bun. Den o gi wi rai nanga deki-ati tu di o yepi wi fu no du a sondu baka. Den kan bosroiti taki fu wan pisi ten wi no o du son sani moro na ini a gemeente, teleki wi tron bun mati baka nanga Yehovah. Efu wan sma di du wan seryusu sondu no abi berow, dan den owruman o puru en fu a gemeente, so taki a no pori a denki fu den tra sma na ini a gemeente.

 SORTU TRA SANI YU KAN LERI?

3. Te wi e taki krin san wi du, dan wi o man tron bun mati fu Yehovah baka

Ala sondu di wi e du, na sondu teige Yehovah. Dati meki ala ten wi musu taigi en san wi du. Leisi Psalm 32:1-5 èn taki fu na aksi disi:

• Fu san ede a bun fu taigi Yehovah san wi du, na presi fu kibri a sondu?

 4. A e tyari wini kon te wan sma di no abi berow puru fu a gemeente

Efu wan sma du wan seryusu sondu èn a no wani libi moro soleki fa Yehovah wani, dan a no kan de wan memre moro fu a gemeente. Dati meki den e puru en fu a gemeente. Wi no e moksi moro nanga so wan sma èn wi no e taki moro nanga en. Leisi 1 Korentesma 5:6, 11 nanga 2 Yohanes 9-11. Baka dati taki fu na aksi disi:

• Te wan sma di no abi berow fu en sondu e tan moksi nanga a gemeente, dan a de neleki srudeki di e meki blon sweri. San so wan sma kan du nanga a gemeente?

 SAN YU LERI?

Efu wi du wan seryusu sondu, ma wi e sari trutru èn wi teki a bosroiti fu no du a sondu moro, dan Yehovah o gi wi pardon.

Fa yu ben o piki den aksi disi?

• Fu san ede a bun fu taigi Yehovah sortu sondu wi du?

• San wi musu du efu wi wani kisi pardon fu wi sondu?

• Efu wi du wan seryusu sondu, dan fu san ede wi musu suku yepi na den owruman?