Le hoja o rata Jehova haholo ebile o leka ka matla ho qoba ho etsa dintho tse tla mo utlwisa bohloko, ka dinako tse ding o tla etsa diphoso. Le ha ho le jwalo, dibe tse ding di tebile ho feta tse ding. (1 Bakorinthe 6:9, 10) Haeba o entse sebe se tebileng, o hopole hore Jehova o ntse a o rata ebile o batla ho o tshwarela le ho o thusa.

1. Re lokela ho etsang e le hore Jehova a re tshwarele?

Batho ba ratang Jehova ba utlwa bohloko haholo ha ba hlokomela hore ba entse sebe se tebileng. Empa ba kgothatswa ke ntho eo Jehova a ileng a e tshepisa bahlanka ba hae ha a re: “Le hoja dibe tsa lona di ka ba jwalo ka sekareleta, di tla sweufala jwalo ka lehlwa.” (Esaia 1:18) Haeba re baka, Jehova o tla re tshwarela dibe tsohle tsa rona. Re lokela ho etsang ho bontsha hore re bakile? Re lokela ho swabela dibe tsa rona haholo, re kgaotse ho etsa dintho tse fosahetseng re be re kope Jehova hore a re tshwarele. Ka mora moo, re sebetse ka thata ho fetola menahano kapa diketso tse fosahetseng tse entseng hore re etse sebe ebe re leka ho phela ka melao ya Jehova.​—Bala Esaia 55:6, 7.

2. Jehova o sebedisa baholo jwang ho re thusa ha re entse sebe?

Haeba re entse sebe se tebileng, Jehova o re re bitse “banna ba baholo ba phutheho.” (Bala Jakobo 5:14, 15.) Baholo ba rata Jehova le dinku tsa hae. Ba a tseba hore na ba ka re thusa jwang e le hore re lokise kamano ya rona le Jehova.​—Bagalata 6:1.

Baholo ba re thusa jwang haeba re entse sebe se tebileng? Baholo ba babedi kapa ba bararo ba tla sebedisa Mangolo a Bibele ho re bontsha hore na ke hobaneng ha ntho eo re e entseng e fosahetse. Hape ba tla re fa dikgothatso le dikeletso tse tla re thusa hore re se ke ra etsa sebe se tebileng hape. Ba ka etsa qeto ya hore re se ke ra nka karolo dinthong tse itseng tse etswang ka phuthehong ka nakwana ho fihlela kamano ya rona le Jehova e se e le maemong a matle. Haeba Mokreste a entse sebe se tebileng empa a sa bake, baholo ba tla mo kgaola e le hore a se ke a tshwaetsa ba bang ka phuthehong ka mekgwa ya hae e mebe.

 ITHUTE DINTLHA TSE DING

3. Ho bolela dibe tsa rona ho tla re thusa hore re fole

Ha re etsa sebe re utlwisa Jehova bohloko, ka hoo re lokela ho mo bolella dibe tsa rona. Bala Pesaleme ya 32:1-5 ebe le buisana ka potso ena:

• Ke hobaneng ha ho le molemo hore re bolelle Jehova dibe tsa rona ho e na le ho leka ho di pata?

 4. Ho kgaolwa ho na le melemo efe?

Haeba motho ya entseng sebe se tebileng a hana ho mamela melao ya Jehova, a ke ke a tlohelwa hore a nne a dule ka phuthehong. Motho eo o a kgaolwa mme ha re a lokela ho tlwaelana le yena kapa hona ho bua le yena. Bala 1 Bakorinthe 5:6, 11 le 2 Johanne 9-11 ebe le buisana ka potso ena:

• Feela jwalo ka ha tomoso e bedisa hlama ya bohobe, ho tlwaelana le moetsadibe ya sa bakeng ho tla ama phutheho jwang?

 KAKARETSO

Haeba re entse sebe se tebileng empa re se swabetse e le ka nnete ebile re ikemiseditse ho kgaotsa ho etsa dintho tse fosahetseng, Jehova o tla re tshwarela.

Re Ithutileng?

• Ke hobaneng ha ho le molemo hore re bolelle Jehova dibe tsa rona?

• Re lokela ho etsang e le hore Jehova a re tshwarele?

• Haeba re entse sebe se tebileng, ke hobaneng ha re lokela ho kopa thuso ho baholo?