Urang kabéh nyaah pisan ka Yéhuwa sarta hayang sabisa-bisa ngajauhan hal-hal nu bisa nganyenyeri haté Anjeunna. Najan kitu, urang pasti nyieun kasalahan. Aya kasalahan nu leutik, tapi aya ogé dosa nu gedé. (1 Korintus 6:9, 10) Mun anjeun ngalakukeun dosa gedé, sing inget yén Yéhuwa masih nyaah ka anjeun. Anjeunna gé daék ngahampura sarta nulungan anjeun.

1. Urang kudu kumaha supaya bisa dihampura ku Yéhuwa?

Jalma-jalma nu nyaah ka Yéhuwa bakal ngarasa sedih pisan mun maranéhna sadar geus ngalakukeun dosa gedé. Tapi, maranéhna kahibur sabab Yéhuwa jangji, ”Maraneh teh geus lestreng ku dosa, tapi ku Kami rek disina bodas beresih.” (Yesaya 1:18) Lamun urang bener-bener tobat, Yéhuwa bakal ngahampura jeung teu nginget-nginget deui kasalahan urang. Naon maksudna tobat? Maksudna, urang bener-bener kaduhung, bajoang teu ngalakukeun dosa éta deui, jeung ménta Yéhuwa ngahampura urang. Geus kitu, urang bakal nyingkirkeun kabéh pikiran jeung kabiasaan goréng nu bisa nyababkeun urang ngalakukeun dosa éta. Urang gé bakal sabisa-bisa nuturkeun patokan hirup ti Yéhuwa.​—Baca Yesaya 55:6, 7.

2. Kumaha Yéhuwa ngagunakeun para kokolot pikeun mantuan urang?

Ceuk Yéhuwa, lamun urang ngalakukeun dosa gedé, urang kudu ”[ngomong ka] para kokolot sidang jamaah”. (Baca Yakobus 5:14, 15.) Maranéhna téh nyaah ka Yéhuwa sarta ka domba-Na. Para kokolot geus dilatih supaya bisa mantuan urang nyobat deui jeung Yéhuwa.​—Galatia 6:1.

Kumaha para kokolot mantuan urang? Dua atawa tilu kokolot bakal ngagunakeun ayat-ayat Alkitab pikeun nunjukkeun ku naon tindakan urang téh salah. Maranéhna gé bakal méré naséhat jeung saran nu bisa ngabantu urang supaya teu ngalakukeun dosa éta deui. Terus, para kokolot gé bisa waé mutuskeun, keur sababaraha waktu mah urang teu meunang ngalakukeun sababaraha hal di sidang. Tapi, kumaha mun jalma nu ngalakukeun dosa gedé téh teu tobat-tobat? Para kokolot bakal ngaluarkeun manéhna ti sidang supaya sadérék-sadérék séjén teu kapangaruhan.

 HAYU NGULIK

3. Mun ngaku, urang bisa nyobat deui jeung Yéhuwa

Unggal urang ngalakukeun dosa, urang téh nganyenyeri haté Yéhuwa. Jadi, urang perlu ngaku ka Anjeunna. Baca Jabur 32:1-5, terus bahas:

• Naon mangpaatna mun urang ngaku ka Yéhuwa jeung teu nyumput-nyumputkeun dosa?

 4. Dipecatna saurang jalma téh aya mangpaatna

Mun saurang jalma ngalakukeun dosa gedé jeung embung barobah, manéhna geus teu bisa jadi bagian ti sidang. Manéhna bakal dipecat, atawa dikaluarkeun ti sidang. Terus, urang gé moal gaul atawa ngobrol jeung manéhna deui. Baca 1 Korintus 5:6, 11 jeung 2 Yahya 9-11, terus bahas:

• Jiga adonan roti nu bisa beukah ku karana ragi, kumaha sadérék-sadérék di sidang bisa kapangaruhan lamun gaul jeung jalma anu embung tobat?

 INTI BAB

Mun urang ngalakukeun dosa gedé, tapi urang bener-bener kaduhung jeung bajoang supaya teu ngalakukeun dosa éta deui, Yéhuwa bakal ngahampura urang.

Nu geus dibahas

• Ku naon urang kudu ngaku dosa ka Yéhuwa?

• Naon nu kudu urang lakukeun supaya dosa-dosa urang bisa dihampura?

• Mun urang ngalakukeun dosa gedé, ku naon urang kudu ménta bantuan ka para kokolot?