Nguáná má makiéʼkháanʼ maski ajndu ikháán nandaaʼ xtayáá wéñuʼ Jeobá ga̱jma̱a̱ nataniminaʼ xó má eʼngo̱o̱ rí xátani gawíínʼ. Mú rígá tikhu aʼkhá dí itháan mbiiʼ ki xóo i̱ʼwáʼ (1 Corintios 6:9, 10). Á mú ikháán natadxúdaminaʼ aʼkhá rí mbi̱i̱ʼ rígi̱ garmáʼáan a̱jkia̱a̱nʼ rí Jeobá nandoo kaʼyaaʼ má xúʼko̱, ikhaa maxtáa xawii maʼni mba̱a̱ a̱jkiu̱u̱n kaʼyaaʼ ga̱jma̱a̱ mambáyáaʼ.

1. Ndiéjunʼ gáʼyóoʼ matani mu Jeobá maʼni mba̱a̱ a̱jkiu̱nʼ kaʼyaaʼ rá.

Índo̱ mbáa bi̱ naʼni ñajuunʼ Jeobá na̱jkha̱nú nakudaminaʼ mbá aʼkhá mbi̱i̱ʼ ga̱jma̱a̱ naku̱mu̱u̱ rí nánguá muni mba̱a̱ a̱jkiu̱u̱n kuyáá. Mú Jeobá naʼthúu̱n ajngá rígi̱ rí maʼni̱i̱ a̱jkiu̱u̱n dí niʼthún xuajñuu nákha wajyúuʼ: “Maski ajndu aʼkhá ndrígála nindxu̱u̱ maña̱ʼ xngeʼdi, maʼni̱i̱ miʼxá xóo idiʼ” (Isaías 1:18). Ikha jngóo á mú natanga̱a̱ a̱jkiu̱lú, Jeobá maʼni mbáa a̱jkiu̱ún kaʼyulú mbájkhu. Ndiéjunʼ eyoo gáʼthúún rí mata̱nga̱a̱ a̱jkia̱a̱nʼ rá. Rígi̱ nandoo gáʼthúún dí magawi̱i̱n a̱jkia̱a̱nʼ ga̱jma̱a̱ numuu aʼkhá rí nitani̱, rí matatsiʼñáʼ ratani̱ dí raʼkhí ga̱jma̱a̱ matanda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyaaʼ. Dí matani tsiakimínáʼ ga̱jma̱a̱ xúgíʼ a̱jkia̱a̱nʼ mu matriʼkhu̱u̱ rí natandxa̱ʼwáá edxa̱a̱ʼ rí xkawiiʼ o rí matatsiñáán ratani dí ni̱jkha̱ kañáán matani aʼkhá ga̱jma̱a̱ dí mataʼgímináʼ maraxtaa xó má nandoo Jeobá (atraxnuu Isaías 55:6, 7).

2. Xú káʼnii ejmiuu bi̱ kuya̱ edxu̱u̱ Jeobá mu mambáyulú á mu nixuʼdámijná mbá aʼkhá rá.

Jeobá naxnúu consejo rígi̱ bi̱ nikudaminaʼ aʼkhá: “Gandxa̱ʼwún bi̱ kuya̱ edxu̱u̱ náa nagimbáanʼ” (atraxnuu Santiago 5:14, 15). Xa̱bekha bugi̱ bi̱ nitri̱gi̱i̱n ga̱jma̱a̱ espíritu santo nandún kuyáá wéñuuʼ Jeobá ga̱jma̱a̱ mugiu̱u̱, ikha jngóo nigumaa rathiin mu mumbañún bi̱ nixudami̱jna̱ aʼkhá mu xúʼko̱ mambajxíin mbu̱júu̱ gajmiún Dios (Gálatas 6:1).

Xú káʼnii embáyuluʼ bi̱ kuya̱ edxu̱u̱ índo̱ nuxuʼdamijná aʼkhá rá. A̱jmi̱i̱n o ajtsíin dí ikhiin nuraxnuu Biblia mu mumbáyulú makru̱ʼu̱lú rí niʼni raʼkhí ni̱ndxu̱u̱. Ma̱ngaa muxnulú mbá májánʼ consejo rí na̱ʼkha̱ ikhí ma̱ngaa tsiakii rí ndayúlú mu xúʼko̱ ni xátangaán muʼni aʼkhá mbu̱júu̱. Gajkhun má bi̱ kuya̱ edxu̱u̱ mutulu rí xúʼni tikhu ñajunʼ dí rígá náa congregación mbá guata mbiʼi asndu índo̱ mambáxulu májánʼ gajmiúlú Dios. Á mú bi̱ niʼni aʼkhá tsétanga̱a̱ a̱jkiu̱u̱n ikhú bi̱ kuya̱ edxu̱u̱ muni expulsar mu xúʼko̱ ma̱ndoo muñewu̱u̱n bi̱ naguanún náa cogregación.

 GAJMAÑAAʼ ITHÁAN

3. Rí muʼthá aʼkhá dí niʼni nambáyulúʼ maʼni̱i̱ a̱jkiu̱lú

Asndu ndiéjunʼ má aʼkhá rí nuxuʼdámijna naʼni gawúúnʼ Jeobá ikha jngóo gíʼmaa muʼtá dí náa nangawaán. Guraxnuu Salmo 32:1-5 ga̱jma̱a̱ gutamíjnála rígi̱:

• Ndíjkha rí gíʼdoo numuu muʼtá aʼkhá rí niʼni náa Jeobá ki xóo murkaʼwulu rá.

4. Índo̱ mbáa nagumaa expulsar mbá xúgíinʼ nambáñun

Á mu mbáa bi̱ nikudaminaʼ aʼkhá naʼni gaʼduunʼ xtángoo ndrígóo Jeobá, nánguá ma̱ndoo maxtáa náa congregación. Ikha jngóo nagumaa expulsar. Ma̱ngaa nuniʼñáánʼ rambájxulu gajmiulúʼ asndu nuniʼñáánʼ ruʼtamíjná gajmiulúʼ. Guraxnuu 1 Corintios 5:6, 11 ma̱ngaa 2 Juan 9-11 ga̱jma̱a̱ gutamíjnála rígi̱:

• Xó má eʼni levadura dí naʼni makajxi̱i̱ pan, xú káʼnii gágumaa gachíín a̱ngiu̱lú bi̱ kúwá náa congregación á mu nambájxulu gajmiulúʼ xa̱bu̱ bi̱ naʼni aʼkhá ga̱jma̱a̱ bi̱ tsétanga̱a̱ a̱jkiu̱u̱n rá. Náá numuu rá.

 RÍ NAGÁJNURIYO̱O̱ʼ

Jeobá maʼni mba̱a̱ a̱jkiu̱u̱n kaʼyulú á mu natanga̱a̱ gajkhun a̱jkiu̱lú náa aʼkhá dí niʼni ga̱jma̱a̱ á mu nánguá tangán muʼni mbu̱júu̱ʼ.

Rí nijmañaaʼ

• Ndíjkha rí májánʼ muʼthán Jeobá aʼkhá dí niʼni rá.

• Ndiéjunʼ gáʼyóoʼ muʼni mu Jeobá maʼni mba̱a̱ a̱jkiu̱u̱n kaʼyoo aʼkhá ndrígúlú rá.

• Á mu rí nuxuʼdamijná mbá aʼkhá mbi̱i̱ʼ, ndíjkha rí gíʼmaa mundu̱ʼu̱u̱n bi̱ kuya̱ edxu̱u̱ mumbáyulú rá.