LESOGNE 57
Ino ty Toko’e Hatao’o Naho Nanao Fahotagne Lahibey Rehe?
Va’e hisy fotoagne rehe hanao fahadisoagne ndra tie tena tea i Jehovah naho mikezake mafe magnalavitse ty raha va’e hampalahelo aze aza. Faie misy fahotagne ila’e tena raty naho oharegne amy ty fahotagne hafa. (1 Korintianina 6:9, 10) Naho nanao fahotagne lahibey rehe, le tadidio avao fa mbe tea azo ty Jehovah. Vognogne hamela ty fahota’o naho hagnampe azo reke.
1. Ino ty raha tsy maintsy ataontikagne mba hahavy i Jehovah hamela ty fahotantikagne?
Tena malahelo ze ndaty tena tea i Jehovah naho tsapa’e tie nanao fahotagne lahibey reke. Faie mampahery iareo ty fampitamà i Jehovah toy: “Ndra tie mena bey aza ty fahota’areo, le hataoko foty bey.” (Isaia 1:18) Hamela ty helontikagne ty Jehovah naho mibebake tikagne. Ino ty atao tihoe mibebake? Mibebake ty ndaty raike naho manegnegne mafe, le tsy manao i raha ratỳ sasa sady mihalaly amy i Jehovah mba hamela aze. Mikezake mafe reke naho fa avy eo mba hisintake i raha nahavy aze nanotay, ndra eretsere-draty zay ndra fahazaran-draty. Mikezake ka reke mba hagnorike ty fitsipy i Jehovah.—Vakio ty Isaia 55:6, 7.
2. Akore ty ampiasa i Jehovah o androanavi-pagnahio mba hagnampeagne antikagne?
Naho nanao fahotagne lahibey tikagne, le mandily antikagne ty Jehovah mba ‘hirehake amy ty androanavi-pagnahy amo o fiangonagneo eo.’ (Vakio ty Jakoba 5:14, 15.) Tena tea o lahilahy voatendre reo ty Jehovah naho o agnondri’eo. Iareo ty hagnampe antikagne mba ho soa fifandrambesagne amy i Jehovah indraike.—Galatianina 6:1.
Akore ty atao o androanavi-pagnahio mba hagnampeagne antikagne naho nanota tika? Androanavi-pagnahy roe ndra telo ty hirehake amantikagne. Hampiasa ty Soratse Masigne iareo mba hampisehoagne tie ino ty maharaty i raha nataontikagney. Hagnomey torohevetse sady hampahery antikagne ka iareo, amy izay tikagne tsy magneregne i fahotagney sasa. Va’e hanapa-kevetse iareo tie tsy ho afake hanao ty raha ila’e amo o fiangonagneo eo tikagne naho tsy fa trea iareo tie soa fifandrambesagne amy i Jehovah indraike. Naho manao fahotagne lahibey ty ndaty raike faie tsy nibebake, le hanapa-kevetse o androanavi-pagnahy reo tie horoahegne tsy ho agnisa ty fiangonagne reke mba tsy hitarike ty hafa hanao raty.
ANDAO HANDINEKE TY PITSOPITSO’E
Hodinehentikagne ato tie, akore ty agnampea i Jehovah antikagne naho nanao fahotagne lahibey tika, amy izay tika hankasitrake ty fagnampeagne ho azontikagne.
3. Hiaregne indraike tikagne naho magneke tie nanao fahotagne lahibey
Toko’e hieke ty fahotantikagne amy i Jehovah tikagne satria nanao raha mampalahelo aze. Vakio ty Salamo 32:1-5, sady iharò midineke ty fagnonteneagne toy:
-
Nagnino ro mahasoa antikagne ty mieke ty fahotantikagne amy i Jehovah fa tsy magnetaketake aze?
Faie tsy ampe tihoe mieke ty fahotantikagne amy i Jehovah. Mila mangatake fagnampeagne amo o androanavi-pagnahio ka tikagne naho te hilamin-tsaigne. Alefaso i VIDEO oy, sady iharò midineke ty fagnonteneagne toy.
-
Arake i video teoy, ino ty natao o androanavi-pagnahio mba hagnampeagne i Canon hiheregne amy i Jehovah indraike?
Tsy toko’e hahamarikarike antikagne ty hirehake amo o androanavi-pagnahio sady toko’e ho rehafentikagne iaby ze tena maregne. Vognogne hagnampe antikagne iareo. Vakio ty Jakoba 5:16, sady iharò midineke ty fagnonteneagne toy:
-
Nagnino ro ho mora amo o androanavi-pagnahio ty hagnampe antikagne naho mirehake ty tena maregne tikagne?
Toko’e hieke ty fahota’o rehe, hirehake ty maregne amo o androanavi-pagnahio sady hagneke ty fagnampea i Jehovah
4. Mahasoa i ndaty nanotay sady miaro o fiangonagneo o fandroahagneo
Naho nanao fahotagne lahibey ty ndaty raike sady tsy mete magnorike ty fitsipy i Jehovah, le roahegne tsy ho agnisa ty fiangonagne reke. Tsy mifagnosehose ama’e sasa tikagne. Ndra ty mirehake ama’e aza tsy ataontikagne satria reke voaroake. Vakio ty 1 Korintianina 5:6, 11 naho ty 2 Jaona 9-11, sady iharò midineke ty fagnonteneagne toy:
-
Lalivay kede avao le fa mampitombo i kobay iaby. Ino ka ty ho voka’e amy i fiangonagney naho mbe mifagnosehose amy ty mpanota raike tsy mibebake tikagne?
Maro ty ndaty voaroake niheregne ho agnisa ty fiangonagne indraike. Ino ty anto’e? Satria ndra tie nimafe tama’e aza i fandroahagney, le nagnampe aze ka io mba hahatsapa’e tie tsy mete ty raha natao’e. (Salamo 141:5) Alefaso i VIDEO oy, sady iharò midineke ty fagnonteneagne toy.
-
Arake i video teoy, nagnino ro nagnampe i Sonia hahatsapa tegna ty fandroahagne aze?
Nagnino ty fandroahagne ro...
-
magnomey voninahitse ty tahina i Jehovah?
-
mampiseho tie tea ty rare’e naho bey hatea ty Jehovah?
5. Mamela antikagne ty Jehovah naho tena mibebake tikagne
Nanao fagnoharagne ty Jesosy mba hagnampeagne antikagne hahafantatse tie, ino ty tsapa i Jehovah naho fa misy mpanota raike mibebake. Vakio ty Lioka 15:1-7, sady iharò midineke ty fagnonteneagne toy:
-
Ino ty ianara’o miomba i Jehovah boake amo o fagnoharagne iohoe?
Vakio ty Ezekiela 33:11, sady iharò midineke ty fagnonteneagne toy:
-
Ino ty raha tena lahibey toko’e hataontikagne mba hampisehoagne tie tena mibebake tikagne?
Mitovy amy ty mpiarak’agnondry mikarakara soa ty agnondri’e ty Jehovah
MISY TY MIREHAKE TIE: “Matahotse raho kera ho voaroake naho rehafeko amo o androanavi-pagnahio tie nanao fahotagne lahibey.”
-
Ino ty ho rehafe’o amy ze ndaty mieretseretse hoe izay?
FAMINTIGNAGNE
Ndra tie manao fahotagne lahibey aza tikagne, le hamela antikagne ty Jehovah naho manegnegne tikagne sady tapa-kevetse tsy hagneregne aze sasa.
Fameregnagne
-
Nagnino ro mahasoa antikagne ty mieke ty fahotantikagne amy i Jehovah?
-
Ino ty toko’e hataontikagne naho teantikagne hamela heloke antikagne ty Jehovah?
-
Nagnino tikagne ro toko’e hangatake fagnampeagne amo o androanavi-pagnahio naho nanao fahotagne lahibey?
FAGNAZAVAGNE FAGNAMPE’E
Akore ty ampisehoa i Jehovah tie mamindra fo reke, arake ty Isaia 1:18, naho henteagne ty raha niaigna ty lahilahy raike toy?
Nagnino ro mahasoa i ndaty nanotay naho o fiangonagneo ty fandroahagne?
“Nagnino ro Porofo ty Hatea o Fandroahagneo?” (Fitalakesan-davitse 15 Avrily 2015)
Akore ty hagnazava’o amy ty ndaty tsy Vavolombelogne miomba ty fandroahagne?
Akore ty nahatsapà ty lahilahy niala tamy ty hamarenagne toy fa nitaone i Jehovah indraike reke?
“Magnova Ndaty ty Baiboly” (Fitalakesan-davitse 1 Avrily 2012)
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
