ንየሆዋ ኣጸቢቕካ እተፍቅሮ፡ ዜጕህዮ ኸይትገብር ድማ ዚከኣለካ እትጽዕር እኳ እንተ ዀንካ፡ ሓሓሊፍካ ግና ክትጋገ ኢኻ። ገሊኡ ሓጢኣት ከኣ ከቢድ እዩ። (1 ቈረንቶስ 6:9, 10) ከቢድ ሓጢኣት ኣብ እትገብረሉ እዋን፡ እታ የሆዋ ንዓኻ ዘላቶ ፍቕሪ ኣይትቕህምን እያ፣ የግዳስ፡ ይቕረ ኺብለልካን ኪሕግዘካን እዩ ዚደሊ።

1. የሆዋ ይቕረ ምእንቲ ኺብለልና፡ እንታይ ኢና ኽንገብር ዘሎና፧

እቶም ንየሆዋ ዜፍቅርዎ ሰባት ከቢድ ሓጢኣት ከም ዝገበሩ ምስ ፈለጡ፡ ብዙሕ ይጕህዩ እዮም። ኰይኑ ግና፡ በቲ የሆዋ ንህዝቡ፡ “ሓጢኣትኩም ከም ቀይሕ ዝሕብሩ እኳ እንተ ዀነ፡ ከም ውርጪ ጻዕዳ ኪኸውን እዩ” ኢሉ እተዛረቦም ቃላት ይጸናንዑ እዮም። (ኢሳይያስ 1:18) ካብ ልብና እንተ ተነሲሕና፡ የሆዋ ምሉእ ብምሉእ ይቕረ ይብለልና እዩ። እሞ ደኣ ኸመይ ጌርና ኢና እንንሳሕ፧ ብልባዊ ጣዕሳ ተደሪኽና፡ ሕማቕ ምግባር ንሓድግን ካብ የሆዋ ይቕረታ ንልምንን ኢና። ድሕሪኡ፡ ነቲ ናብ ሓጢኣት ዝመርሓና ግጉይ ኣተሓሳስባ ወይ ልማድ ንምልዋጥ ዚከኣለና ንገብር ኢና፣ ብንጹህ መለክዒታት የሆዋ ንምምልላስ እውን ንጽዕር ኢና።—ኢሳይያስ 55:6, 7 ኣንብብ።

2. ክንሓጥእ ከለና፡ የሆዋ ብሽማግለታት ገይሩ ዚሕግዘና ብኸመይ እዩ፧

የሆዋ፡ ከቢድ ሓጢኣት ንዚገብር ዘበለ፡ “ንሽማግለታት ጉባኤ ይጸውዕ” ዚብል ምሕጽንታ ሂብዎ ኣሎ። (ያእቆብ 5:14, 15 ኣንብብ።) እዞም እተሸሙ ሰባት ንየሆዋን ንኣባጊዑን ፍቕሪ ኣለዎም። ምስ የሆዋ ዘሎና ርክብ ከነዐሪ ድማ ኪሕግዙና ዜኽእል ብቕዓት ኣለዎም።—ገላትያ 6:1።

እሞ ደኣ ኸቢድ ሓጢኣት እንተ ጌርና፡ ብኸመይ እዮም ሽማግለታት ዚሕግዙና፧ ክልተ ወይ ሰለስተ ሽማግለታት ብቕዱሳት ጽሑፋት ይእርሙና እዮም። ዳግም ከይንሓጥእ ከኣ ግብራዊ ሓሳባትን መተባብዕን ይህቡና እዮም። መንፈሳዊ ጥዕናና ኽሳዕ ዚምለሰልና ድማ፡ ኣብ ገሊኡ ክርስትያናዊ ንጥፈታት ከይንሳተፍ ይድርቱና ይዀኑ። ሓደ ሰብ ከቢድ ሓጢኣት ገይሩስ ዘይንሳሕ እንተ ዀይኑ፡ ሽማግለታት ነታ ጉባኤ ኻብ ጐዳኢ ጽልዋታት ምእንቲ ኼዕቍቡ ኢሎም፡ ነቲ ሰብ ይውግድዎ እዮም።

 ኣዕሚቝካ ዅዓት

3. ሓጢኣትና ምንዛዝ ክንሓዊ ይሕግዘና

እንገብሮ ዘበለ ሓጢኣት፡ ንየሆዋ የጕህዮ እዩ፣ ስለዚ፡ ሓጢኣትና ኽንናዘዘሉ ኣሎና። መዝሙር 32:1-5 ኣንብብ፡ ድሕሪኡ በዚ ሕቶ ተመያየጡ፦

• ሓጢኣትና ኽንሓብእ ኣብ ክንዲ እንፍትን፡ ንየሆዋ ኽንናዘዘሉ ጽቡቕ ዝዀነ ስለምንታይ እዩ፧

 4. ውገዳ ብኸመይ ከም ዚሕግዝ

ሓደ ሰብ ከቢድ ሓጢኣት እንተ ገይሩ እሞ መለክዒታት የሆዋ ምስዓብ እንተ ኣብዩ፡ ክፍሊ ጉባኤ ዀይኑ ኪቕጽል ኣይክእልን እዩ። ስለዚ፡ ይውገድ እዩ፣ ንሕና ድማ ምስኡ ኣይንቀራረብን ወይ እውን ኣይንዛረብን ኢና። 1 ቈረንቶስ 5:6, 11ን 2 ዮሃንስ 9-11ን ኣንብብ፡ ድሕሪኡ በዚ ሕቶ ተመያየጡ፦

• ከምቲ ማይ ብሑቝ ንብሑቝ ዜብኵዖ፡ ምስ ዘይንሳሕ ሓጥእ ምቅርራብ ንብዘላ እታ ጉባኤ ዚጸልዋ ብኸመይ እዩ፧

 ጽማቝ

ከቢድ ሓጢኣት ምስ ገበርና፡ ካብ ልቢ እንተ ጕሂናን ሕማቕ ከይንገብር እንተ ቘሪጽናን፡ የሆዋ ይቕረ ይብለልና እዩ።

ክለሳ

• ሓጢኣትና ንየሆዋ ኽንናዘዘሉ ጽቡቕ ዝዀነ ስለምንታይ እዩ፧

• ሓጢኣትና ምእንቲ ይቕረ ኺብሃለልና እንታይ ክንገብር ኣሎና፧

• ከቢድ ሓጢኣት እንተ ጌርና፡ ካብ ሽማግለታት ሓገዝ ክንደሊ ዘሎና ስለምንታይ ኢና፧