ITYOUGH 57
Ka Nyi I Doo u U Er Shighe u U Er Isholibo i Vesene?
Er Yehova a doo u ishima kpishi shi ka u nôngon sha afatyô wou wer mayange u er kwagh u vihin un ga nahan kpa, ashighe agen u er kwagh shami ga. Nahan kpa, asorabo agen ka a hemba vihin a agen. (1 Mbakorinte 6:9, 10) Aluer u er isholibo i vesen kpa de henen wer u kera doo Yehova ishima ga ze, a kegh a kegh iyol u den we a kwaghbo shi wasen we kpaa.
1. Ka nyi i gbe u se er ve Yehova una de se a kwaghbo?
Ior mba Yehova a doo ve ishima ka vea er isholibo i vesen yô, ve zungwe kpishi. Nahan kpa ka ve zua a ishimasurun sha kwagh u Yehova yange ôr a ior nav ne, ér: ‘Shin er asorabo a en a nyian bong, nahan kpaa aa kungu er awombo nahan.’ (Yesaia 1:18) Aluer se gema ishima sha mimi yô, Yehova una de se a isholibo yase shi una hungur a mi. Kpa ka se tese ser se gema ishima nena? Ka se vaa afanyô sha kwagh u se er la kpishi shi se de u eren kwaghbo shon shi se zamber a Yehova ser a de se kwaghbo. Sea been yô, se nôngo kpoghuloo se dugh mbamhen shin aeren a bo a yange na se hingir u za eren isholibo la, shi se nôngo se dondon atindi a Yehova a we sha kwagh u aeren a wang la.—Ôr Yesaia 55:6, 7.
2. Yehova ka a wase se sha ikyev i mbatamen shighe u se er isholibo nena?
Aluer se er isholibo i vesen yô, Yehova kaa a vese ér se “yila mbatamen mba tiônnongo.” (Ôr Yakobu 5:14, 15.) Yehova man mba ve civir un la doo mbatamen mban ishima kpen kpen. Shi i tese mbatamen mban er vea wase se, se hide se sôr mlu wase vea Yehova yô.—Mbagalatia 6:1.
Mbatamen ka ve wase se shighe u se er isholibo i vesen nena? Mbatamen uhar shin utar ka ve kôôm se, ve tese se ken Bibilo er kwagh u se er la a lu shami ga yô. Shi ka ve wa se kwagh shi ve tese se igbenda i se kar ve se kera kimbir eren kwaghbo ga yô. Ashighe agen vea kaa a vese ér gba u se kera er akaa agen ken tiônnongo ga shighe a wa karen, saa se hide se lu kôôsôô a Yehova. Nahan kpa or ka nana er asorabo a vesen shi nana soo u geman ishima ga yô, mbatamen ve dugh nan ken tiônnongo kera, sha er nana vihi mbagen sha ieren i nan la ken tiônnongo ga yô.
HEN KWAGH I ZA SHIMI
Hen fa er Yehova ka a wase se shighe u se er isholibo i vesen man er u seer lun a iwuese sha kwagh ne yô.
3. Ka sea pase isholibo yase yô, kwagh la a wase se hide se sôr mlu wase vea Yehova
Hanma isholibo i se er cii ka i vihi Yehova, nahan gba u se pase un isholibo yase la. Ôr Pasalmi 32:1-5, maa lam nen sha mpin ne:
-
Er nan ve i doo u se pase Yehova asorabo a ase, se ker u yeren a ga?
Shighe u se pase Yehova asorabo a ase yô, doo u shi se pase mbatamen kpaa ser ve wase se sha er ishima ia pever se yô. Nenge VIDIO i i lu heen ne, maa lam nen sha mpin u a dondo ne.
-
Ken vidio la, mbatamen yange ve wase Canon u hiden hen Yehova nena?
Tom u mbatamen yô, ka u wasen se, nahan gba u se ôr ve hanma kwagh cii sha mimi. Ôr Yakobu 5:16 maa lam nen sha mpin ne:
-
Aluer se ôr mbatamen hanma kwagh sha mimi yô, a hemba lun ve ican ga u wasen se nena?
Pase isholibo you, ôr mbatamen kwagh u u er la sha mimi, shi lumun iwasen i u doo Yehova ishima ve a lu nan we la
4. Ka a dugh or ken tiônnongo yô, kwagh la a wase nan shi a kura tiônnongo kpaa
Aluer or er isholibo i vesen shi nan venda u dondon atindi a Yehova yô, a de ér nana lu ken tiônnongo her ga. Ka i dugh nan ken tiônnongo kera nahan kwagh a kera zua se a nan ga, iliam tsô kpa se mba kera lamen a nan ga. Ôr 1 Mbakorinte 5:6, 11 man 2 Yohane 9-11, maa lam nen sha mpin ne:
-
Er kwa ka u samber sha ijenmwe nahan, aluer se mba lun imôngo vea orsholibo u nan vende u geman ishima yô, kwagh la una vihi tiônnongo nena?
Mbagenev kpishi mba i dugh ve ken tiônnongo kera la, shighe ka una karen yô, tsaha la u wase ve ve kav er kwagh u yange ve er la lu shami ga yô, nahan ve hide ken tiônnongo. (Pasalmi 141:5) Nenge VIDIO i i lu heen ne, maa lam nen sha mpin u a dondo ne.
-
Ken vidio la, yange i dugh Sonja ken tiônnongo kera nahan kwagh la wase un nena?
Ka a dugh or ken tiônnongo kera yô, kwagh la a . . .
-
va iti i Yehova a icivir nena?
-
tese er Yehova a eren kwagh sha inja man sha dooshima nena?
5. Ka sea gema ishima yô, Yehova a de se a asorabo a ase
Yesu yange ôr injakwagh igen u tesen er ka i lu Yehova ken ishima shighe u or gem ishima yô. Ôr Luka 15:1-7, maa lam nen sha mpin ne:
-
Ka nyi kwagh ne a tese u sha kwagh u Yehova?
Ôr Esekiel 33:11, maa lam nen sha mpin ne:
-
Ka nyi i gbe u or a er, u tesen ér nan vaa afanyô sha kwaghbo u nan er laa?
Yehova nengen sha iyôngo na doo doo er orkuranilev ka nan nengen sha iyôngo i nan tsembelee nahan
IOR MBAGENEV KA VE KAA ÉR: “M ngu cian mer aluer m pase mbatamen isholibo yam yô, a dughum ken tiônnongo kera.”
-
Ka nyi u fatyô u ôron imbaor laa?
KA NYI U HENE?
Aluer se er isholibo i vesen kpa se gema ishima sha mimi, se vaa afanyô shi se de u eren kwagh u bo yô, Yehova una de se a isholibo yase.
Mbampin mba umbur kwagh u i hen yô
-
Er nan ve i doo u se pase Yehova asorabo a ase?
-
Ka nyi i gbe u se er ve Yehova una de se a asorabo a ase?
-
Aluer se er isholibo i vesen yô, er nan i doo u se za hen mbatamen ser ve wase se?
SEER HENEN KWAGH
Nenge er Yehova yange zungwe orgen mhôônom er i nger ken Yesaia 1:18 la yô.
Mayange De Te Akperan sha Mhôônom ma Zungwen ma Yehova Ga (5:02)
Ka a dugh or ken tiônnongo nahan kwagh la a wase hanma or nena?
Hen fa er u fatyô u pasen or u nan lu Orshiada u Yehova ga, kwagh u a lu u dughun or ken tiônnongo kera yô.
Ôr ngeren u “Yange Gba u Me Hide hen Yehova” la nahan nenge er orgen u de u civir Yehova yô, yange nenge ér Yehova wase un, hide a na yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
