Kahit mahal na mahal mo si Jehova at nagsisikap kang hindi siya masaktan, nagkakamali ka pa rin kung minsan. Pero may ilang kasalanan na mas malubha kaysa sa iba. (1 Corinto 6:​9, 10) Kung makagawa ka ng malubhang kasalanan, tandaan na mahal ka pa rin ni Jehova. Handa ka niyang patawarin at tutulungan ka niya.

1. Ano ang kailangan nating gawin para mapatawad tayo ni Jehova?

Kapag nakagawa ng malubhang kasalanan ang mga taong nagmamahal kay Jehova, siguradong napakalungkot nila. Pero nakakapagpatibay ang pangako ni Jehova sa mga lingkod niya: “Kahit na ang mga kasalanan ninyo ay gaya ng iskarlata, mapapuputi ang mga ito na gaya ng niyebe.” (Isaias 1:18) Kung talagang nagsisisi tayo, siguradong papatawarin tayo ni Jehova. Paano natin maipapakita ang pagsisisi? Kung talagang nalulungkot tayo dahil sa ginawa natin, ihihinto natin ito at hihingi tayo ng kapatawaran kay Jehova. Magsisikap din tayong baguhin ang maling kaisipan o gawain na naging dahilan ng pagkakasala natin. At gagawin natin ang lahat para masunod ang malinis na pamantayan ni Jehova.​—Basahin ang Isaias 55:​6, 7.

2. Paano ginagamit ni Jehova ang mga elder para tulungan tayo kapag nagkasala tayo?

Kung makagawa tayo ng malubhang kasalanan, sinasabi ni Jehova na “tawagin [natin] ang matatandang lalaki sa kongregasyon.” (Basahin ang Santiago 5:​14, 15.) Mahal ng mga inatasang lalaking ito si Jehova at ang mga tupa niya. Matutulungan nila tayong maibalik ang magandang kaugnayan natin kay Jehova kasi tinuruan sila kung paano gagawin iyon.​—Galacia 6:1.

Paano tayo matutulungan ng mga elder kapag nakagawa tayo ng malubhang kasalanan? Gagamitin ng dalawa o tatlong elder ang Bibliya para maituwid tayo. Papayuhan nila tayo at sasabihin ang mga puwede nating gawin para hindi na natin maulit ang kasalanan natin. Baka magpasiya sila na hindi muna tayo puwedeng makibahagi sa ilang gawain sa kongregasyon hanggang sa tumibay muli ang kaugnayan natin kay Jehova. Kapag hindi nagsisi ang isang taong nakagawa ng malubhang kasalanan, ititiwalag siya ng mga elder para hindi siya makaimpluwensiya sa kongregasyon.

 PAG-ARALAN

3. Makakatulong kung ipagtatapat natin ang ating kasalanan

Nasasaktan si Jehova kapag nakakagawa tayo ng kasalanan. Kaya tama lang na ipagtapat natin ito sa kaniya. Basahin ang Awit 32:​1-5. Pagkatapos, talakayin ang tanong na ito:

• Bakit makakabuting ipagtapat kay Jehova ang mga kasalanan natin imbes na itago ito?

 4. Kung paano nakakatulong ang pagtitiwalag

Kung ayaw pa ring sumunod sa pamantayan ni Jehova ang isang taong nakagawa ng malubhang kasalanan, hindi na siya puwedeng maging bahagi ng kongregasyon. Matitiwalag siya, at hindi na tayo makikisama o makikipag-usap sa kaniya. Basahin ang 1 Corinto 5:​6, 11 at 2 Juan 9-​11. Pagkatapos, talakayin ang tanong na ito:

• Gaya ng lebadura na nagpapaalsa sa tinapay, paano puwedeng impluwensiyahan ng isang di-nagsisisi ang kongregasyon?

 SUMARYO

Kung makagawa tayo ng malubhang kasalanan, papatawarin tayo ni Jehova kung magsisisi tayo at magsisikap na hindi ito ulitin.

Ano ang Natutuhan Mo?

• Bakit magandang ipagtapat kay Jehova ang mga kasalanan natin?

• Ano ang kailangan nating gawin para mapatawad ang mga kasalanan natin?

• Kung makagawa tayo ng malubhang kasalanan, bakit mahalagang humingi ng tulong sa mga elder?