WEKELO 57
Kakɔna kayoyosala naka wɛ ambosala pɛkato kɛmɔtshi ka woke?
Kaanga mbokayɛ Jehowa ngandji k’efula ndo mbasalayɛ la wolo dia mbewɔ nsala oseka dui tshɛ diakoka mbonyangiya, wɛ ayosalaka munga lo ntena dimɔtshi. Koko pɛkato mɔtshi yekɔ weke ndeka nkina. (1 Kɔrɛtɔ 6:9, 10) Laasɔ, naka wɛ ambosala pɛkato kɛmɔtshi ka woke, ohɔka dia Jehowa hatotshika kooka ngandji. Nde ekɔ suke dia kodimanyiya ndo dia kokimanyiya.
1. Kakɔna kahombaso nsala dia Jehowa todimanyiya?
Wanɛ woka Jehowa ngandji mongaka la lɔkɔnyɔ l’efula etena keyawɔ dia wambosala pɛkato kɛmɔtshi ka woke. Koko vɔ tanaka ekeketshelo oma lo kɛnɛ kakalake Jehowa ekambi ande ɔnɛ: “Kaanga pɛkato yanyu yaya beela k’efula, yɔ yayonga wɛma oko loonge l’ekama.” (Isaya 1:18) Naka sho ndjatshumoya l’otema ɔtɔi, kete Jehowa ayotodimanyiya tshɛ lo tshɛ. Ngande wayatshumoyaso? Lonyangu l’efula longa laso totshutshuyaka dia ntshika kɛnɛ kele kɔlɔ ndo nɔmba Jehowa dia todimanyiya. Oma laasɔ, ko sho nsala la wolo dia ntshikitanya ekanelo kaso ka yimba ndo mbekelo ya kɔlɔ yakatokonya dia nsala pɛkato. Ndo sho pombaka nsala la wolo dia nsɛna lo ndjela atɔndɔ wa pudipudi wa Jehowa—Adia Isaya 55:6, 7.
2. Ngande wakamba Jehowa la dikumanyi dia tokimanyiya etena kasalaso pɛkato?
Naka tambosala pɛkato kɛmɔtshi ka woke, Jehowa totɛka dia ‘mbeta dikumanyi dia l’etshumanelo.’ (Adia Jakɔba 5:14, 15.) Apami wakasɔnama asɔ mbokaka Jehowa ndo ɛkɔkɔ ande ngandji. Vɔ wekɔ l’akoka wa tokimanyiya dia sho nɔngɔsɔla diɔtɔnganelo diasaso la Jehowa.—Ngalatiya 6:1.
Ngande watokimanyiya dikumanyi naka tambosala pɛkato kɛmɔtshi ka woke? Dikumanyi pende kana sato wayotongola lo nkamba l’alako w’oma l’Afundelo. Vɔ yayotosha nto alako wa shikaa ndo ekeketshelo dia tokimanyiya dia mbewɔ nsala pɛkato nto. Vɔ mbeyaka toshimba lo tshanda mɔtshi awui amɔtshi wendana l’elimu ɛmɔtshi w’Akristo polo lam’ayotɔkɔlɔngana lo nyuma. Dia nkokɛ etshumanelo oma lo tɔsɛngiya ta kɔlɔ, dikumanyi mbitshanyaka onto tshɛ lasala pɛkato ya weke ndo lahayatshumoya.
NYOMOTSHIMOLA
Fudia lowando layɛ lo woho watokimanyiya Jehowa naka tambosala pɛkato kɛmɔtshi ka woke.
3. Mbishola pɛkato tokimanyiyaka dia nkɔnɔ lo nyuma
Pɛkato tshɛ kasalaso nyangiyaka Jehowa, diakɔ diele sho pombaka kishola la ntondo kande. Nyadia Osambo 32:1-5, ndo oma laasɔ, nyɔkɛtshanya dimbola nɛ:
-
Lande na kele ekɔ dimɛna mbishola pɛkato yaso le Jehowa lo dihole dia nyanga dia ndjishɛ?
Ndo nto, etena kayangaso ekimanyielo le dikumanyi l’ɔkɔngɔ wa sho mbishola pɛkato yaso le Jehowa, sho ndjaokaka dimɛna. Nyende VIDƐO, ndo oma laasɔ, nyɔkɛtshanya dimbola diayela nɛ:
-
Lo vidɛo yɛnyiso, ngande wakakimanyiya dikumanyi Canon dia kalolɛ Jehowa?
Sho pombaka diholɛ dikumanyi otema ndo mbatɛ awui wa mɛtɛ nɛ dia oyango awɔ ele wa tokimanyiya. Nyadia Jakɔba 5:16, ndo oma laasɔ, nyɔkɛtshanya dimbola nɛ:
-
Lande na kele mbitɛ dikumanyi awui hwe hwe mbakimanyiyaka efula dia vɔ mbeya woho wa tokimanyiya?
Shola pɛkato kayɛ, tɛɛ dikumanyi akambo wa mɛtɛ, ndo etawɔ ekimanyielo ka Jehowa koludi la ngandji
4. Wotshanyelo kimanyiyaka
Naka onto ɔmɔtshi lambosala pɛkato ka woke ambotona dia ndjela atɔndɔ wa Jehowa, kete nde hakoke nto ntshikala l’etshumanelo. Nde mbitshanyemaka ndo hatekesanɛ la nde nto kana ntɛkɛta la nde. Nyadia 1 Kɔrɛtɔ 5:6, 11 ndo 2 Joani 9-11, ndo oma laasɔ, nyɔkɛtshanya dimbola nɛ:
-
Oko wele wodoya mbidiyaka ofushi, ngande wele diɔtɔnganelo dia l’otshi wa pɛkato wahayatshumoya mongaka la shɛngiya le etshumanelo?
Anto efula wakatshanyema wakayokalolaka nto l’etshumanelo, nɛ dia kaanga mbele ohokwelo wakawalongola akawasha paa, dui sɔ diakaakimanyiya dia nshihodia dia kɛnɛ kakawasale kaki kɔlɔ. (Osambo 141:5) Nyende VIDƐO, ndo oma laasɔ, nyɔkɛtshanya dimbola diayela nɛ:
-
Lo vidɛo yɛnyiso, ngande wele wotshanyelo akakimanyiya Sonja?
Ngande wele yɛdikɔ yendana la wotshanyelo kimanyiyaka dia . . .
-
ntombola lokombo la Jehowa?
-
mɛnya dia Jehowa ekɔ l’ekanelo k’ɔlɔlɔ ndo la ngandji?
5. Jehowa todimanyiyaka etena kayatshumoyaso
Yeso akakambe la wɛɛla ɔmɔtshi dia tokimanyiya dia sho nshihodia woho wayaoka Jehowa etena kayatshumoya onto ɔmɔtshi. Nyadia Luka 15:1-7, ndo oma laasɔ, nyɔkɛtshanya dimbola nɛ:
-
Kakɔna kaketsha dui sɔ lo kɛnɛ kendana la Jehowa?
Nyadia Ɛzɛkiyɛlɛ 33:11, ndo oma laasɔ, nyɔkɛtshanya dimbola nɛ:
-
Kakɔna kele ohomba nsala dia mɛnya dia tekɔ la ndjatshumoya ka mɛtɛ?
Oko olami w’ɛkɔkɔ, Jehowa ndjakiyanyaka efula dikambo d’ɛkɔkɔ ande
ANTO AMƆTSHI MBUTAKA ƆNƐ: “Lekɔ la wɔma! Naka dimi mbisholɛ dikumanyi pɛkato kami, kete wayombitshanya.”
-
Kakɔna kayoyotɛ onto lele la kanyi shɔ?
LO TSHENA PE
Naka tambosala pɛkato kɛmɔtshi ka woke ko tamboyatshumoya l’otema ɔtɔi ndo tamboyashikikɛ dia ntshika nsala kɛnɛ kele kɔlɔ, kete Jehowa ayotodimanyiya.
Ovuswelo
-
Lande na kele ekɔ ɔlɔlɔ le so dia mbisholɛ Jehowa pɛkato yaso?
-
Kakɔna kakokaso nsala dia pɛkato yaso dimanyiyama?
-
Naka tambosala pɛkato kɛmɔtshi ka woke, lande na kahombaso nyanga ekimanyielo oma le dikumanyi?
SALA EYANGELO
Enda woho wakɛnyi pami kɛmɔtshi kɛtshi ka Jehowa oko wadiɛnya Isaya 1:18.
Ngande wakoka yɛdikɔ yendana la wotshanyelo monga la wahɔ le onto tshɛ lendana la dui sɔ?
Eka woho wakokayɛ nembetshiya onto ɔmɔtshi lele bu Ɔmɛnyi wa Jehowa yɛdikɔ yendana la wotshanyelo.
“Onde Ɛmɛnyi wa Jehowa mbewɔka wanɛ waki l’ɔtɛmwɛlɔ awɔ ntondo?” (Sawo dia l’Ɛtɛrnɛtɛ)
L’ɔkɔndɔ wata ɔnɛ: “Lakɛnyi ohomba wa nkalolɛ Jehowa,” eka lande na kele pami kɛmɔtshi kakatakɔ akambo wa mɛtɛ akayaoke dia Jehowa akokaloya.
“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka nɛi 1, 2012)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
