LĒSONI 57
Ko e Hā ʻE Hokó Kapau Te Ke Fakahoko ha Angahala Mamafa?
Neongo ʻokú ke ʻofa lahi kia Sihova peá ke feinga mālohi ke fakaʻehiʻehi mei hono fai ha faʻahinga meʻa te ne mamahi ai, ka ʻe ʻi ai e taimi te ke fai ai ʻa e ngaahi fehālaaki. Kae kehe, ko e ngaahi angahala ʻe niʻihi ʻoku mafatukituki ange ia ʻi he niʻihi. (1 Kolinitō 6:9, 10) Kapau te ke fakahoko ha angahala mamafa, manatuʻi ʻoku kei ʻofa pē ʻa Sihova ʻiate koe. ʻOkú ne loto-lelei ke fakamolemoleʻi mo tokoniʻi koe.
1. Ko e hā kuo pau ke tau faí ke maʻu ai ʻa e fakamolemole ʻa Sihová?
Ko e faʻahinga ʻoku ʻofa kia Sihová ʻoku nau fonu ʻi he mamahi ʻi heʻenau ʻiloʻi kuo nau fakahoko ha angahala mamafa. Ka ʻoku fakafiemālieʻi kinautolu ʻe Sihova ʻaki ʻene talaʻofá: “Neongo ʻoku hangē hoʻomou angahalá ko ha tupenu kula ʻahoʻahó, ʻe ʻai ia ke hinehina ʻo hangē ko e sinoú.” (ʻAisea 1:18) Kapau ʻoku tau fakatomala moʻoni, ʻe fakamolemoleʻi fakaʻaufuli kitautolu ʻe Sihova. ʻE anga-fēfē ʻetau fakatomalá? ʻI hono ueʻi ʻe he fakaʻiseʻisa moʻoní, ʻoku tau taʻofi hono fai ʻa e meʻa ʻoku koví pea kōlenga kia Sihova ke ne fakamolemoleʻi kitautolu. ʻOku tau ngāue mālohi leva ke liliu ʻa e fakakaukau pe ngaahi tōʻonga hala naʻá ne taki atu kitautolu ke faiangahalá, pea tau feinga ke moʻuiʻaki ʻa e ngaahi tuʻunga maʻa ʻa Sihová.—Lau ʻa e ʻAisea 55:6, 7.
2. ʻOku anga-fēfē hono ngāueʻaki ʻe Sihova ʻa e kau mātuʻá ke tokoniʻi kitautolu ʻi heʻetau faiangahalá?
Kapau ʻoku tau fakahoko ha angahala mamafa, ʻoku tala mai ʻe Sihova ke tau “ui mai ʻa e kau mātuʻa ʻo e fakatahaʻangá.” (Lau ʻa e Sēmisi 5:14, 15.) Ko e kau tangata fakanofo ko ení ʻoku nau ʻofa kia Sihova mo ʻene fanga sipí. Kuo akoʻi kinautolu ki he founga ki hono tokoniʻi kitautolu ke toe maʻu ha vahaʻangatae lelei mo Sihova.—Kalētia 6:1.
ʻOku anga-fēfē hono tokoniʻi kitautolu ʻe he kau mātuʻá kapau ʻoku tau fakahoko ha angahala mamafa? ʻE fakatonutonu kitautolu ʻe ha mātuʻa ʻe ua pe tolu ʻo ngāueʻaki ʻa e akonaki ʻa e Tohi Tapú. Te nau toe ʻomai ʻa e ngaahi faleʻi ʻaonga mo e fakalototoʻa ke tokoniʻi kitautolu ke fakaʻehiʻehi mei he toe tō ki ha angahala. Te nau fili nai ke ʻoua te tau kau ʻi ha ngaahi meʻa ʻe niʻihi ʻa e fakatahaʻangá ʻi ha vahaʻa taimi kae ʻoua ke toe lelei hotau vahaʻangatae mo Sihová. Kapau kuo fakahoko ʻe ha taha ha angahala mamafa pea ʻikai fakatomala, ʻe tuʻusi ia ʻe he kau mātuʻá koeʻuhí ke ʻoua te ne tākiekina kovi ʻa e faʻahinga kehe ʻi he fakatahaʻangá.
KELI LOLOTO ANGE
Fakalahi hoʻo houngaʻia ki he anga hono tokoniʻi kitautolu ʻe Sihová kapau te tau fakahoko ha angahala mamafa.
3. Ko hono vete ʻetau angahalá ʻe tokoni ia ki hono fakaleleiʻi hotau vahaʻangatae mo Sihová
Ko ha faʻahinga angahala pē te tau fakahoko ʻoku fakamamahi ia kia Sihova, ko ia ʻoku totonu ai ke tau vete ʻetau angahalá kiate ia. Lau ʻa e Saame 32:1-5, pea lāulea leva ki he fehuʻi ko ení:
-
Ko e hā ʻoku lelei ai ke vete ʻetau ngaahi angahalá kia Sihová kae ʻikai feinga ke fūfuuʻi kinautolu?
Tānaki atu ki hono vete ʻetau ngaahi angahalá kia Sihová, ʻoku tau maʻu ʻa e fiemālie ʻi heʻetau kumi tokoni ki he kau mātuʻá. Huluʻi ʻa e VITIOÓ, pea lāulea leva ki he fehuʻi hokó.
-
ʻI he vitioó, naʻe anga-fēfē hono tokoniʻi ʻe he kau mātuʻá ʻa Canon ke foki kia Sihová?
ʻOku fiemaʻu ke tau lea hangatonu mo faitotonu ki he kau mātuʻá he ʻoku nau ʻi ai ke tokoniʻi kitautolu. Lau ʻa e Sēmisi 5:16, pea lāulea leva ki he fehuʻi ko ení:
-
Ko e hā ʻe faingofua ange ai ki he kau mātuʻá ke tokoniʻi kitautolu ʻi he taimi ʻoku tau lea faitotonu aí?
Vete hoʻo angahalá, lea faitotonu ki he kau mātuʻá pea tali ʻa e tokoni anga-ʻofa ʻa Sihová
4. Ko e ʻaonga ʻo e tuʻusí
Kapau kuo fakahoko ʻe ha tokotaha ha angahala mamafa pea fakafisi ke muimui ʻi he ngaahi tuʻunga ʻa Sihová, heʻikai ke ne toe hoko ko ha konga ʻo e fakatahaʻangá. Kuo tuʻusi ia, pea ʻoku ʻikai ke tau toe feohi mo ia pe naʻa mo e lea kiate ia. Lau ʻa e 1 Kolinitō 5:6, 11 mo e 2 Sione 9-11, pea lāulea leva ki he fehuʻi ko ení:
-
Hangē pē ko e hūhū ʻa e lēvani ʻi he toú, ʻe anga-fēfē hano uesia ʻa e fakatahaʻangá ʻi he feohi mo ha taha angahala taʻefakatomalá?
Ko e faʻahinga tokolahi naʻe tuʻusí kuo toe fakafoki mai kinautolu ki he fakatahaʻangá. Ko e hā hono ʻuhingá? Neongo naʻe fakamamahi ʻa e tuʻusí, naʻe tokoniʻi heni kinautolu ke mahinoʻi ko ʻenau meʻa naʻe faí naʻe hala. (Saame 141:5) Huluʻi ʻa e VITIOÓ, pea lāulea leva ki he fehuʻi hokó.
-
ʻI he vitioó, naʻe tokoni fēfē ʻa e tuʻusí kia Sōniá?
ʻOku anga-fēfē hoko ʻa e fokotuʻutuʻu ʻo e tuʻusí ʻo . . .
-
fakalāngilangiʻi ai ʻa e huafa ʻo Sihová?
-
fakahaaʻi ai ʻa e fakamaau totonu mo e ʻofa ʻa Sihová?
5. ʻOku fakamolemoleʻi kitautolu ʻe Sihova ʻi heʻetau fakatomalá
Naʻe ngāueʻaki ʻe Sīsū ha talanoa fakatātā ke ne tokoniʻi kitautolu ke mahinoʻi ʻa e anga ʻo e ongoʻi ʻa Sihová ʻi he taimi ʻoku fakatomala ai ha tokotaha. Lau ʻa e Luke 15:1-7, pea lāulea leva ki he fehuʻi ko ení:
-
Ko e hā ʻokú ke ako heni fekauʻaki mo Sihová?
Lau ʻa e ʻIsikeli 33:11, pea lāulea leva ki he fehuʻi ko ení:
-
Ko e hā ʻa e sitepu mahuʻinga ʻoku kau ki he fakatomalá?
ʻI he hangē ko ha tauhi-sipí, ʻoku tokanga lahi ʻa Sihova ki heʻene fanga sipí
ʻOKU PEHĒ ʻE HE NIʻIHI: “ʻOku ou ilifia ʻi he lea ki he kau mātuʻá fekauʻaki mo ʻeku angahalá he ʻe tuʻusi ai au.”
-
Ko e hā te ke leaʻaki ki ha taha ʻokú ne ongoʻi pehē?
FAKANOUNOU
Kapau ʻoku tau fakahoko ha angahala mamafa kae fakatomala loto-moʻoni mo fakapapauʻi ke tuku hono fai ʻa e meʻa ʻoku koví, ʻe fakamolemoleʻi kitautolu ʻe Sihova.
Fakamanatu
-
Ko e hā ʻoku lelei ai kiate kitautolu ke vete ʻetau ngaahi angahalá kia Sihová?
-
Ko e hā kuo pau ke tau faí kae fakamolemoleʻi ʻe Sihova ʻetau ngaahi angahalá?
-
Kapau ʻoku tau fakahoko ha angahala mamafa, ko e hā ʻoku tau kumi ai ʻa e tokoni ʻa e kau mātuʻá?
AKO LAHI ANGE
Sio ki hono maʻu ʻe ha tangata ʻa e meesi ʻa Sihová ʻa ia ʻoku fakamatalaʻi ʻi he ʻAisea 1:18.
ʻI hono tuʻusi ha taha, ʻoku anga-fēfē tokoni eni ki he taha kotoa?
“ʻUhinga ko ha Tokonaki Anga-ʻOfa Ai ʻa e Tuʻusí” (Ko e Taua Leʻo, ʻEpeleli 15, 2015)
Ako ke fakamatalaʻi ki ha taha ʻoku ʻikai kau ki he moʻoní ʻa e ʻuhinga ʻoku tuʻusi ai ha taha mei he fakatahaʻangá.
ʻI he talanoa “Naʻe Fiemaʻu Ke U Foki kia Sihova,” ako ki he ʻuhinga naʻe ongoʻi ai ʻe ha tangata naʻe hē mei he moʻoní hono tohoakiʻi mai ia ʻe Sihová.
“Liliu ʻe he Tohi Tapú ʻa e Moʻuí” (Ko e Taua Leʻo, ʻEpeleli 1, 2012)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
