SAMBIRU 57
Kumbi Mungachita Wuli Asani Mwachita Ubudi Ukulu?
Chinanga kuti mutimuyanja ukongwa Yehova ndipuso muyesesa kuchita vosi vo mungafiska kuti muleki kumuguŵiska, kweni nyengu zinyaki munganangisa vinthu vinyaki pamwenga mungabuda. Maubudi nganyaki ngakulu ukongwa kuluska nganyaki. (1 Akorinto 6:9, 10) Asani mwachita ubudi ukulu, mukumbukengi kuti Yehova waleka cha kukuyanjani, ndipu wakhumbisiska kukugowokiyani ndipuso kukuwovyani.
1. Kumbi tingachita wuli kuti Yehova watigowoke asani tachita ubudi?
Ŵanthu wo atimuyanja Yehova achita chitima ukongwa asani aziŵa kuti achita ubudi ukulu. Kweni apembuzgika ndi vo Yehova walayizga ŵanthu ŵaki kuti: “Chinanga maubudi nginu ngangaŵa ngayera, ngajengi ngatuŵa ukongwa.” (Yesaya 1:18) Yehova wangatigowoke asani talapa ndi mtima wosi. Kumbi kulapa nkhuchitanji? Munthu yo walapa watijivwiya chitima ukongwa chifukwa cha vinthu viheni vo wachita, wativileka ndipu wapempha Yehova kuti wamugowoke. Pavuli paki, wachitapu kanthu kuti waleki maŵanaŵanu pamwenga mijalidu yiheni yo yingumuchitiska kuti wachiti ubudi, ndipuso wayesesa kulondo fundu zaku Yehova za mijalidu yamampha.—Ŵerengani Yesaya 55:6, 7.
2. Kumbi Yehova watiŵagwiriskiya wuli ntchitu ŵara kuti atiwovyi asani tachita ubudi?
Yehova wakamba kuti asani munthu wachita ubudi ukulu “wajidaniyi ŵara a mpingu.” (Ŵerengani Yakobe 5:14, 15.) Ŵara ŵenaŵa atanja Yehova ndipuso mbereri zaki. Yiwu akusambizika mo angatiwovye kuti tinozgi ubwezi widu ndi Yehova.—Agalatiya 6:1.
Kumbi ŵara atitiwovya wuli asani tachita ubudi ukulu? Ŵara ŵaŵi pamwenga atatu agwiriskiya ntchitu fundu za mu Bayibolu kuti atiwovyi kuti tiziŵi vo tananga. Angatipaska so masachizgu ngakovya ndipuso ulongozgi unyaki wo ungatiwovya kuti tileki kuchita so ubudi. Yiwu angatikaniza kuchitaku vinthu vinyaki mumpingu kwa kanyengu mpaka po tayambiya so kuchita umampha mwauzimu. Asani munthu yo wachita ubudi ukulu walapa cha, ŵara angamusezga kuti waleki kutimbanyizga anyaki mumpingu..
SAMBIRANI VINANDI
Wonani vo Yehova wachita kuti watiwovyi asani tachita ubudi ukulu kweniso vo mungachita kuti mulongo kuwonga.
3. Kusumuwa ubudi wo tachita kutitiwovya kuti tinozgi ubwezi widu ndi Yehova
Yehova wakondwa cha ndi ubudi wewosi wo tingachita, mwaviyo tikhumbika kumukambiya ubudi wo tachita. Ŵerengani Salimo 32:1-5, pavuli paki kambiskanani fumbu ili:
-
Ntchifukwa wuli tikhumbika kumukambiya Yehova ubudi wo tachita mumalu mwakubisa?
Kusazgiyapu pa kumukambiya Yehova vo tachita, tituvwa so umampha mumtima asani ŵara atiwovya. Woneriyani VIDIYO, pavuli paki kambiskanani fumbu lo le mumphata.
-
Nge po tawone mu vidiyo, kumbi ŵara angumuwovya wuli Canon kuti wawere kwaku Yehova?
Tikhumbika kufwatuka ndi kuŵakambiya chechosi ŵara chifukwa yiwu mbakunozgeka kutiwovya. Ŵerengani Yakobe 5:16, pavuli paki kambiskanani fumbu ili:
-
Ntchifukwa wuli vija vambula kusuzga kuti ŵara atiwovyi asani tikamba vinthu mwauneneska?
Akambiyeni ŵara ubudi wo mwachita, mungaŵabisanga chechosi cha kweniso zomerezani kuti Yehova wakuwovyeni mwachanju
4. Kusezga kutovya
Asani munthu wachita ubudi ukulu ndipu wakana kulondo ulongozgi waku Yehova, wangalutirizga cha kuja mumpingu. Munthu waviyo wasezgeka mumpingu, ndipu ticheza nayu cha kweniso kukambiskana nayu. Ŵerengani 1 Akorinto 5:6, 11 ndipuso 2 Yohane 9-11, pavuli paki kambiskanani fumbu ili:
-
Nge mo chakutupisa chitupisiya bulunga la fulawu, kumbi kucheza ndi munthu wambula kulapa yo wachita ubudi kungatimbanyizga wuli mpingu?
Ŵanthu anandi wo angusezgekapu akuwere so mumpingu chifukwa cha ulongozgi wo angupaskika. Chinanga kuti venga vakuŵaŵa kusezgeka, kweni vinguŵawovya kuziŵa kuti vo anguchita venga viheni. (Salimo 141:5) Woneriyani VIDIYO, pavuli paki kambiskanani fumbu lo le mumphata.
-
Nge mo tawone mu vidiyo iyi, kumbi kusezgeka kungumuwovya wuli Sonja?
Kumbi kusezga munthu mumpingu . . .
-
kutumbika wuli zina laku Yehova?
-
kulongo wuli kuti Yehova ngwachanju?
5. Yehova watitigowoke asani talapa ndi mtima wosi
Yesu wangukonkhoska ntharika yo yingatiwovya kuziŵa mo Yehova wavwiya asani munthu walapa. Ŵerengani Luka 15:1-7, pavuli paki kambiskanani fumbu ili:
-
Kumbi ntharika yeniyi yitikusambizaninji vakukwaskana ndi Yehova?
Ŵerengani Ezekiyeli 33:11, pavuli paki kambiskanani fumbu ili:
-
Kumbi ntchinthu wuli chakukhumbika ukongwa cho munthu watenere kuchita kuti walongo kuti walapa nadi?.
Nge mliska, Yehova watiziphwere ukongwa mbereri zaki
ŴANTHU ANYAKI AKAMBA KUTI: “Nditopa kuti asani ndingakambiya ŵara ubudi wo ndachita, andisezgengi.”
-
Kumbi mungamukambiyanji munthu yo waŵanaŵana viyo?
KUMBI MWASAMBIRANJI?
Yehova wangatigowoke asani tachita ubudi ukulu ndipu talapa ndi mtima wosi kweniso asani tasimikiza kuti tiwerezengepu so cha.
Kuweriyamu
-
Ntchifukwa wuli tikhumbika kumukambiya Yehova ubudi wo tachita?
-
Kumbi tikhumbika kuchitanji kuti Yehova watigowoke maubudi ngidu?
-
Asani tachita ubudi ukulu, ntchifukwa wuli tikhumbika kupempha ŵara kuti atiwovyi?
FUFUZANI
Wonani mo munthu munyaki wanguwone lisungu laku Yehova lo likonkhoskeka pa Yesaya 1:18.
Kumbi kusezga munthu kutovya wuli?
“Kusezga Munthu Kutovya Ukongwa” (Chigongwi cha Alinda, April 15, 2015)
Wonani mo mungamukonkhoske munthu yo ndi Kaboni cha kuti waziŵi chifukwa cho munthu wasezgeke mumpingu.
Mu nkhani yakuti “Ndinguwona Kuti Ndikhumbika Kuwere Kwaku Yehova,” wonani chifukwa cho munthu munyaki yo wanguleka uneneska wanguwone kuti Yehova wangumuwovya kuti wawere so kwaku iyu.
“Bayibolu Lisintha Ŵanthu” (Chigongwi cha Alinda, April 1, 2012)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
