GIHEVBULO 57
Ginani u yedego gu gira wo tshuka u gira gighoho nya gikhongolo?
Ambari wo ba u mu haladza Jehovha khu monyo wago watshavbo u bwe u dzi garadzeya gu gira gugola gwaye, dzimbe dzitepo u na tshuka u gira sihoso. Ganiolu simbe sihoso sikhongolo guvbindra simbe. (1 Vakorinto 6:9, 10) Wo gira gighogo nya gikhongolo, dundruga gu khuwe Jehovha a ngo gu haladza; dzi emisede gu gu divaleya ni gu gu phasa.
1. Ginani hi yedego gu gira gasi Jehovha a hi divaleya?
Muthu a haladzago Jehovha a ngu vbisega ngudzu tepo a wonago gu khuye giride gighoho nya gikhongolo. Ganiolu va ngu thaveledwa khesi Jehovha a tumbisidego vathu vaye: “Ambari sighoho sanu na si sivbade kha nga wugala, nyi na si agisa kha nga hunguva.” (Isaya 1:18) Ho dzi laya khu monyo watshavbo, Jehovha a na hi divaleya. Hi nga yeyedza kharini gu khethu hi ngu dzi laya? Ho dzi laya khu lisine, hi na diga gu gira silo nyo vivbe hi bwe hi lomba divalelo ga Jehovha. Khavbovbo, hi na gira satshavbo hi si kodzago gasi gu vbindrugedza mapimo mwendro sigiro si hi giridego hi ghoha. Vbavbandze nya isoso, hi bwe hi dzi garadzeya gu vbanya khu milayo nya guage ya Jehovha. — Leri Isaya 55:6, 7.
2. Jehovha o thumisa kharini madhota gasi gu hi phasa tepo hi girago gighoho?
Ho tshuka hi gira gighoho nya gikhongolo, Jehovha o hi kutsa gu ‘rana madhota nya libandla.’ (Leri Jakobe 5:14, 15.) Madhota ma ngu haladza Jehovha ni dzinvuta dzaye. Ayo mo thumisa guti ma gu nago nya Bhibhiliya gasi gu hi phasa gu wusedza wupari wathu ni Jehovha.— Vagalatiya 6:1.
Madhota mo hi phasa kharini ho tshuka hi gira gighoho nya gikhongolo? Madhota mavili mwendro mararu ma na thumisa Bhibhiliya gasi gu hi yeyedza gighoho gyathu. Ayo gambe ma na hi ninga mawonelo ni wusingalagadzi wu na hi phasago gu mba gira gambe gighoho gya gimwegyo. Adzina ma nga hi emisa gu gira mithumo nyo khaguri libandlani khu tepo nyo khaguri kala hi wusedza wupari wathu ni Jehovha. Ganiolu, ahati o tshuka muthu a gira gighoho nya gikhongolo a vbedza a si dzi layi ke? Ga siemo soso, madhota ma na dusa muthu yoyo libandani gasi a si thapedzisi mavbanyelo yaye nyo vivbe ga vambe libandlani.
GIRA WUGEVISISI NYO ETE
Wona edzi Jehovha a nga hi phasago khidzo ho gira gighoho nya gikhongolo.
3. Gu bhuleya madhota sighoho sathu si ngu phasa
Tepo hi girago gighoho, ho zangarisa Jehovha. Khu kharato, hi yede gu mu embeya gighoho gyathu. Lerini Ndzimo 32:1-5, mu vbedza mu bhula khu giwudziso gegi:
-
Wulangani nyo zame gu siha gighoho gyathu, khu ginani si gu na ni lisima gu embeya gighoho gyogyo Jehovha?
Vbavbandze nyo bhuleye Jehovha basi sighoho sathu, monyo wathu wu na pepa ho lomba giphaso ga madhota. Sistirini VHIDHYU, mu vbedza mu bhula khu giwudziso gegi.
-
Kha nga hi si wonidego omu nya vhidhyu, madhota ma phaside kharini Canon gu bweleya ga Jehovha?
Gu vbwetega hi ma embeya satshavbo madhota hi si ma siheyi gilo, kholu mo vbweta gu hi phasa. Lerini Jakobe 5:16, mu vbedza mu bhula khu giwudziso gegi:
-
Khu ginani si vbevbugago ga madhota gu hi phasa ho mba ma siheya gilo?
Bhuleya madhota gighoho gyago, u ma embeya lisine u bwe u dzumeya giphaso gya Jehovha
4. Gu dusa muthu libandlani si ngu phasa
Muthu o gira gighoho nya gikhongolo a bwe a bomba gu vbanya khu milayo ya Jehovha, kha ngu yela gambe gu gira gipandre nya libandla. Muthu yoyo o duswa libandlani, nigu kha hi yeli gu manega ni wupari naye ambari gu bhula naye. Lerini 1 Vakorinto 5:6, 11 ni 2 Johane 9-11, mu vbedza mu bhula khu giwudziso gegi:
-
Livrina yi ngu gumugisa trigo yatshavbo. Khu ginani gu gira wupari ni gighohi gi gu mba dzi laya si ghohago libandla?
Gutala nya vathu va nga ba va dusidwe libandlani va vbedzide va wuya, kholu ndziya va nga kawukwa khiyo, yi va giride va pwisisa gu khavo va di ghohide. (Ndzimo 141:5) Sistirini VHIDHYU, mu vbedza mu bhula khu giwudziso gegi.
-
Kha nga hi si wonidego omu nya vhidhyu, Sumbi phasegide kharini khu gu duswa libandlani?
Gu dusa muthu libandlani so . . .
-
agisa kharini lina la Jehovha?
-
yeyedza kharini gu khiso Jehovha lulamide nigu na ni lihaladzo?
5. Ho dzi laya khu lisine, Jehovha a na hi divaleya
Jesu thumiside gipimaniso nyo khaguri gasi gu hi phasa gu pwisisa edzi Jehovha a dzi pwago khidzo tepo muthu a dzi layago. Lerini Luka 15:1-7, mu vbedza mu bhula khu giwudziso gegi:
-
Lowo wowu wo hi hevbudza ginani khu Jehovha?
Lerini Ezekiyeli 33:11, mu vbedza mu bhula khu giwudziso gegi:
-
Ginani egi muthu a yedego gu gira gasi a yeyedza gu khuye dzi layide khu lisine?
Gufana ni muhavisi, Jehovha a ngu khathala ngudzu khu dzinvuta dzaye
VAMBE VARI KHAVO: “Nyi ngu thava gu bhuleya madhota gighoho gyangu, kholu nyi nga duswa libandlani.”
-
Ginani u nga hadzi embeya muthu a dzi pwago khu ndziya yeyi?
REZUMO
Ho tshuka hi gira gighoho nya gikhongolo, ganiolu hi dzi laya na si khugeya monyoni hi bwe hi diga gu gira silo nyo vivbe, Jehovha a na hi divaleya.
Siwudziso nyo wusedze
-
Khu ginani si gu sadi gu dawuleya sighoho sathu ga Jehovha?
-
Ginani hi yedego gu gira gasi sighoho sathu si divaledwa?
-
Wo tshuka u gira gighoho nya gikhongolo, khu ginani u yedego gu lomba giphaso ga madhota?
HEVBULA SIMBE
Wona edzi mwama nyo khaguri a wonidego khidzo wuhindzi wa Jehovha wu thudwago omu ga Isaya 1:18.
Gu dusa muthu libandlani si nga phasa kharini vatshavbo va pategago?
“Khu ginani gu dusa muthu libandlani si yeyedzago lihaladzo?” (Mukhedziseyi nya 15 nya Abril nya 2015, khu Giputukezi)
Wona edzi u nga tshamuseyago khidzo muthu a sirigo Fakazi ya Jehovha gighelo gi girago muthu a duswa libandlani.
“Ina Dzifakazi dza Jehovha dzi ngu potsapotsa vathu va tshukidego va lumba wukhongeyi wawe?” (Ndrima nya jw.org, khu Giputukezi)
Omu nya matimu “Nyi di gu vbweta gu bweleya ga Jehovha,” wona wu khuwe khu ginani mwama nyo khaguri a nga ba a digide lisine a dzi pwidego na ranwa khu Jehovha gasi a wuya lisineni.
“Bhibhiliya yi ngu vbindrugedza womi nya vathu” (Mukhedziseyi nya 1 nya Abril nya 2012, khu Giputukezi)
You May Also Like
SIWUDZISO VA TALAGO GU GIRA
Ginani gihevbulo nya Bhibhiliya?
Mana mihlamulo nya edzi hi girago khidzo gihevbulo nya Bhibhiliya.
