LESEN 57
Olsem Wanem Sapos Yu Mekim Wanpela Bikpela Sin?
Tru, yu laikim tru Jehova na yu wok strong long sakim ol samting we inap mekim em i bel hevi, tasol sampela taim yu inap mekim popaia. Sampela sin i bikpela winim ol narapela sin. (1 Korin 6:9, 10) Sapos yu mekim wanpela bikpela sin, tingim olsem Jehova i laikim yu yet; em i redi long fogivim yu na helpim yu.
1. Yumi mas mekim wanem na bai Jehova i ken fogivim yumi?
Ol man i laikim Jehova, ol i bel hevi tru taim ol i luksave olsem ol i mekim wanpela bikpela sin. Tasol tok promis Jehova i mekim long lain bilong em i mekim gut bel bilong ol, olsem: “Maski ol sin bilong yupela i olsem retpela kala, ol bai kamap waitpela olsem sno.” (Aisaia 1:18) Sapos yumi tanim bel tru, Jehova bai lusim tingting olgeta long sin bilong yumi. Olsem wanem yumi soim olsem yumi tanim bel? Yumi bel hevi tru long sin yumi mekim, na yumi no moa mekim dispela sin na yumi askim Jehova long fogivim yumi. Na yumi wok strong long senisim tingting o ol pasin we i kirapim yumi long mekim sin, na yumi wok strong long bihainim ol stretpela lo bilong Jehova.—Ritim Aisaia 55:6, 7.
2. Olsem wanem Jehova i yusim ol elda long helpim yumi taim yumi mekim sin?
Sapos yumi mekim wanpela bikpela sin, Jehova i tokim yumi long “singautim ol hetman bilong kongrigesen i kam.” (Ritim Jems 5:14, 15.) Ol dispela man Jehova i makim ol, ol i laikim em na ol sipsip bilong em. Ol i bin kisim skul long helpim yumi long stretim gen pasin pren bilong yumi wantaim Jehova.—Galesia 6:1.
Olsem wanem ol elda i helpim yumi taim yumi mekim wanpela bikpela sin? Tupela o tripela elda bai yusim tok bilong Baibel bilong stretim yumi. Na tu, ol bai givim ol tok bilong helpim na strongim yumi long no ken mekim gen sin. Ol bai putim tambu long yumi no inap mekim sampela wok Kristen i go inap pasin pren bilong yumi wantaim Jehova i kamap strong gen. Sapos wanpela i mekim wanpela bikpela sin na em i no tanim bel, ol elda bai rausim em na bai pasin bilong em i no ken bagarapim kongrigesen.
KISIM SAMPELA SAVE MOA
Pilim tru pasin bilong Jehova long helpim yumi taim yumi mekim wanpela bikpela sin.
3. Taim yumi autim sin bilong yumi dispela bai helpim yumi
Ol sin yumi mekim i save mekim Jehova i bel hevi, olsem na yumi mas autim sin bilong yumi long em. Ritim Buk Song 32:1-5, na stori long dispela askim:
-
Wai na em gutpela long autim sin bilong yumi long Jehova na yumi no haitim?
Taim yumi autim ol sin bilong yumi long Jehova, na tu, yumi kisim helpim long ol elda, bel bilong yumi bai stap isi. Pilaim VIDIO, na stori long dispela askim.
-
Long vidio, olsem wanem ol elda i helpim Canon long kam bek long Jehova?
Yumi mas mekim onest pasin na tokaut stret long ol samting long ol elda; ol i stap bilong helpim yumi. Ritim Jems 5:16, na stori long dispela askim:
-
Wai na em isi moa long ol elda i helpim yumi taim yumi mekim onest pasin na tokaut stret long ol samting?
Mekim onest pasin na tokaut long sin bilong yu long ol elda, na kisim helpim i kam long Jehova
4. Pasin bilong rausim man i lukautim kongrigesen na helpim man i raus
Sapos wanpela man i mekim wanpela bikpela sin na em i no laik bihainim ol bilong Jehova, em i no inap stap moa insait long kongrigesen. Em bai raus, na yumi no inap bung moa wantaim em na toktok wantaim em. Ritim 1 Korin 5:6, 11 na 2 Jon 9-11, na stori long dispela askim:
-
Wankain olsem yis i save mekim plaua i solap, olsem wanem pasin bilong bung wantaim wanpela i mekim sin na i no laik tanim bel inap bagarapim kongrigesen?
Planti i bin raus, bihain ol i kam bek long kongrigesen. Bilong wanem? Maski taim ol i raus ol i pilim nogut tru, dispela i bin helpim ol long luksave olsem ol i bin mekim rong. (Buk Song 141:5) Pilaim VIDIO, na stori long dispela askim.
-
Long vidio, taim Sonja i raus, olsem wanem dispela i helpim em?
Olsem wanem pasin bilong rausim man i . . .
-
givim ona long nem bilong Jehova?
-
soim stretpela pasin na pasin laikim bilong Jehova?
5. Jehova i save fogivim yumi taim yumi tanim bel
Jisas i mekim wanpela tok piksa we i helpim yumi long kliagut long filings bilong Jehova taim wanpela man i tanim bel. Ritim Luk 15:1-7, na stori long dispela askim:
-
Dispela tok piksa i givim wanem skul long yu long Jehova?
Ritim Esekiel 33:11, na stori long dispela askim:
-
Em bikpela samting long yumi mas mekim wanem bilong soim olsem yumi sori tru long rong yumi bin mekim?
Olsem wanpela wasman, Jehova i save tingim tru ol sipsip bilong em
SAMPELA MAN I TOK: “Mi pret long tokim ol elda long sin bilong mi, nogut mi bai raus long kongrigesen.”
-
Bai yu tok wanem long wanpela i gat kain tingting olsem?
OL BIKPELA POIN
Sapos yumi mekim wanpela bikpela sin tasol yumi bel hevi tru na yumi tingting strong long no ken mekim gen dispela sin, Jehova bai fogivim yumi.
Riviu
-
Wai na em gutpela long autim ol sin bilong yumi long Jehova?
-
Yumi mas mekim wanem na bai Jehova i ken lusim ol sin bilong yumi?
-
Sapos yumi mekim wanpela bikpela sin, wai na yumi mas go long ol elda bilong kisim helpim?
MEKIM WOK PAINIMAUT
Lukim olsem wanem Jehova i soim pasin marimari long wanpela man, em pasin marimari Aisaia 1:18 i stori long en.
Olsem wanem pasin bilong rausim man i helpim olgeta?
“Rausim Man—Mak Bilong Pasin Laikim” (Wastaua, Epril 15, 2015)
Kisim save long olsem wanem yu ken stori long wanpela i no wanbilip long pasin bilong rausim man.
Long stori, “Mi mas i go bek long Jehova,” kisim save long wai na wanpela man i bin lusim tok i tru i pilim olsem Jehova i kisim em i kam.
“Baibel i Save Senisim i Stap Bilong Man” (Wastaua, Epril 1, 2012)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
